ଇମ୍ରାନ୍‍ଙ୍କ ୨୦ଜଣିଆ ମନ୍ତ୍ରିମଣ୍ଡଳ ; ରାଷ୍ଟ୍ରପତି ହେବେ ଅରିଫ୍‍ ଅଲ୍‍ଭି

0

ଇସ୍‍ଲାମାବାଦ : ପାକିସ୍ତାନର ନୂଆ ପ୍ରଧାନମନ୍ତ୍ରୀ ଭାବେ ଶନିବାର ଶପଥ ନେଇଥିାବ ଇମ୍ରାନ୍‍ ଖାଁ ୨୦ ଜଣିଆ ସଦସ୍ୟ ବିଶିଷ୍ଟ ମନ୍ତ୍ରିମଣ୍ଡଳ ଘୋଷଣା କରିଛନ୍ତି। ନୂଆ ମନ୍ତ୍ରୀମାନେ ସୋମବାର ଶପଥ ନେବେ। ତେବେ ଇମ୍ରାନ୍‍ ଙ୍କ  ତେହେରିକ୍‍-ଇ-ଇନ୍‍ସାଫ୍‍ ପାର୍ଟି ପକ୍ଷରୁ କୁହାଯାଇଛି ବିଶିଷ୍ଟ ଆଇନଜ୍ଞ ଡକ୍ଟର ଅରିଫ୍‍ ଅଲ୍‍ଭିଙ୍କୁ ପାର୍ଟି ପକ୍ଷରୁ ପାକିସ୍ତାନର ରାଷ୍ଟ୍ରପତି ପଦ ପାଇଁ ମନୋନିତ କରାଯାଇଛି ।

ଅନ୍ୟପକ୍ଷରେ ପାକିସ୍ତାନ ତେହେରିକ୍‍-ଇ-ଇନ୍‍ସାଫ୍‍ ପାର୍ଟିର ମୁଖପାତ୍ର ଫୱଦ୍‍ ଚୌଧୁରୀ କହିଛନ୍ତି ୨୦ ଜଣ ସଦସ୍ୟଙ୍କ ମଧ୍ୟରୁ ୧୫ ଜଣ ମନ୍ତ୍ରୀ ହେବେ ଏବଂ ଅନ୍ୟ ପାଞ୍ଚ ଜଣ ପ୍ରଧାନମନ୍ତ୍ରୀଙ୍କ ଉପଦେଷ୍ଟା ଭାବେ କାର୍ଯ୍ୟ ତୁଲାଇବେ। ଶାହା ମେହମୁଦ୍‍ କ୍ୟୁରେସି ବୈଦେଶିକ ମନ୍ତ୍ରୀ ଭାବେ କାର୍ଯ୍ୟ ତୁଲାଇବେ, ଯିଏକି ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ ସମୟରେ ପାକିସ୍ତାନର ବୈଦେଶିକ ମନ୍ତ୍ରୀ ଥିଲେ  ଓ ଭାରତ ଗସ୍ତରେ ଆସିଥିଲେ । ପରଭୈଜ୍‍ ଖଟ୍ଟକ୍‍ଙ୍କୁ ପ୍ରତିରକ୍ଷା ମନ୍ତ୍ରୀ ଦାୟିତ୍ୱ ଦିଆଯାଇଥିଲାବେଳେ ଅସଦ୍‍ ଉମର୍‍ ଅର୍ଥମନ୍ତ୍ରୀ ଓ ରାଓଲ୍‍ପିଣ୍ଡିର ଶେଖ୍‍ ରସିଦ୍‍ଙ୍କୁ ରେଳ ବିଭାଗର ଦାୟିତ୍ୱ ଦିଆଯାଇଛି। ଇମ୍ରାନ୍‍ଙ୍କ ଏହି ୨୦ ଜଣିଆ ମନ୍ତ୍ରିମଣ୍ଡଳରେ ୩ ଜଣ ମହିଳା ସ୍ଥାନ ପାଇଛନ୍ତି। ସେମାନେ ହେଲେ – ଶିରେନ୍‍ ମଜାରୀ, ଯୁବେଦା ଜଲାଲ ଓ ପେହେମିଦା ମିର୍ଜା। ମନ୍ତ୍ରୀ ପଦ ପାଇଥିବା ପାଞ୍ଚଜଣ ପ୍ରଧାନମନ୍ତ୍ରୀଙ୍କ ଉପଦେଷ୍ଟା ମାନଙ୍କ ମଧ୍ୟରେ ପୂର୍ବତନ ବ୍ୟାଙ୍କିଙ୍ଗ୍‍ ବିଶେଷଜ୍ଞ ଇସ୍ରତ୍‍ ହୁସେନ୍‍, ବିଶିଷ୍ଟ ବ୍ୟବସାୟୀ ଅବଦୁଲ୍‍ ରଜାକ୍‍ ଦାଉଦ୍‍ ଓ ବାବର୍‍ ଅୱନ ଅଛନ୍ତି।

Leave A Reply