ବେଆଇନ ବାରୁଦ ବିସ୍ଫୋରଣ, ୨ ମହିଳାଙ୍କ ସହ ୩ ଶ୍ରମିକ ମୃତ

ଗୁଣପୁର: ରାୟଗଡ଼ା ଜିଲା ଗୁଣପୁର ସହରଠାରୁ ୧ କିମି ଦୂରରେ ଥିବା ଓକିଲଗୁଡ଼ା ପଥର ଖାଦାନରେ ଆଜି ଅପରାହ୍ନରେ ୩ଟା ସମୟରେ ଭୟାନକ ବାରୁଦ ବିସ୍ଫୋରଣରେ ୩ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ୯ ଜଣ ଆହତ ହୋଇଛନ୍ତି। ମୃତକ ତିନି ଜଣ ହେଲେ ଗୁଣପୁର ନିକଟ ଲୁଙ୍ଗୁରତାଲ ଗ୍ରାମର ଜୋମେସ ଶବର, କୁଳବତୀ ଶବର ଓ ସାମ୍ପୁନି ଗ୍ରାମର ଡୁଡି ଶବର। ଆହତମାନେ ହେଲେ ନିକଟ ଗ୍ରାମର ବୁଡା ଶବର, ପାନ୍ତୁଲୁ ଶବର, ସୁକୁ ଶବର, ବଳିଆ ଶବର, ସମିଆଁ ଶବର ଓ ଅନ୍ୟମାନ ବୋଲି ଜଣାପଡିଛି। ୯ ଆହତ ଶ୍ରମିକଙ୍କୁ ଗୁଣପୁର ଡାକ୍ତରଖାନାରେ ଭର୍ତ୍ତି କରାଯାଇଛି।

ଏଭଳି ଅଭାବନୀୟ ଘଟଣା ସମଗ୍ର ଅଞ୍ଚଳରେ ଆଲୋଡନ ସୃଷ୍ଟି କରିଛି। ସୂଚନା ମୁତାବକ ଉକ୍ତ ପଥର ଖାଦାନରେ ଆଜି ଅପରାହ୍ଣରେ ସାମ୍ପୁନି ଓ ଲୁଙ୍ଗୁରତାଲ ଗାଁର ପ୍ରାୟ ୧୫ ଜଣରୁ ଊର୍ଦ୍ଧ୍ବ ଶ୍ରମିକ କାମ କରୁଥିଲେ। କିଛି ଭାବିବା ପୂର୍ବରୁ ହଠାତ୍‍ ସେଠାରେ ବିସ୍ଫୋରଣ ଘଟିଥିଲା। ଆଖି ପିଛୁଳାକେ ଅନେକ ଶ୍ରମିକଙ୍କ ମୃତ, ଆହତ ଭଳି ପରିସ୍ଥିତି ଦେଖା ଦେଇଥିଲା। ବିସ୍ଫୋରଣ ଏତେ ପ୍ରଚଣ୍ଡ ଥିଲା ଯେ ଆଖପାଖ ଅଞ୍ଚଳର ଲୋକେ ଭୟଭୀତ ହୋଇପଡିଥିଲେ। ଉକ୍ତ ଖାଦାନରେ ଥିବା ଏକ ଟ୍ରାକ୍ଟର ମଧ୍ୟ ଓଲଟି ପଡିଥିଲା।

ସେଠାରେ ପୂର୍ବରୁ ଖାଦାନର ବଡ ପଥର ଭିତରେ ବାରୁଦ ଭରି କରି ରଖାଯାଇଥିବା ଶ୍ରମିକ ଜାଣି ନ ଥିଲେ। ସାମାନ୍ୟ ଆହତ ହୋଇଥିବା କିଛି ଶ୍ରମିକ ଘଟଣା ସମ୍ପର୍କରେ ଆମ୍ବୁଲାନ୍ସକୁ ସୂଚନା ଦେଇଥିଲେ। ଘଟଣାସ୍ଥଳରେ ୩ ଜଣଙ୍କ ମୃତ୍ୟୁ ଘଟିଥିଲା। ମୃତକଙ୍କ ମଧ୍ୟରୁ ଜଣଙ୍କ ଶରୀରଠାରୁ ମୁଣ୍ଡ ଗଣ୍ଡି ଅଲଗା ହୋଇ ଯାଇଥିବା ମଧ୍ୟ ଦେଖିବାକୁ ମିଳିଥିଲା। ଆମ୍ବୁଲାନ୍ସ ପହଞ୍ଚି ଆହତ ୯ ଜଣଙ୍କୁ ସ୍ଥାନୀୟ ଡାକ୍ତରଖାନାକୁ ନିଆଯାଇଥିଲା।

Comments
Loading...