ଋଷିକୂଲ୍ୟା ମୁହାଁଣରୁ ଆନ୍ଧ୍ର ଟ୍ରଲର ଜବତ

ବେଆଇନ ଭାବେ ମାଛ ମାରିବା ଅଭିଯୋଗରେ ୭ ମତ୍ସ୍ୟଜୀବି ଅଟକ,୩୪୦ କିଲୋ ମାଛ ଜବତ

ଗଞ୍ଜାମ : ଗଞ୍ଜାମ ବ୍ଲକ ଅନ୍ତର୍ଗତ ପୁରୁଣା ବନ୍ଧ ନିକଟରେ ଥିବା ଋଷିକୂଲ୍ୟା ମୁହାଁଣ ଠାରୁ ୭ କିମି ଗଭୀର ସମୁଦ୍ର ମଧ୍ୟରେ ବେଆଇନ ଭାବେ ମାଛ ମାରୁଥିବା ବେଳେ ବନ ବିଭାଗ ର ପାଟ୍ରୋଲିଂ ସ୍କ୍ବାର୍ଡ ଆନ୍ଧ୍ରପ୍ରଦେଶର ଏକ ଟ୍ରଲର କୁ ମାଛ ମାରୁଥିବା ବେଳେ ଜବତ କରିଛି। ସେଥିରେ ଥିବା ୭ ଜଣ ମତ୍ସ୍ୟଜୀବୀଙ୍କୁ ଅଟକ ରଖି ମତ୍ସ୍ୟବିଭାଗକୁ ହସ୍ତାନ୍ତର କରିଛି। ଟ୍ରଲର ମଧ୍ୟରେ ୩୪୦ କିଲୋ ମାଛକୁ ସ୍ଥାନୀୟ ମା ଗଙ୍ଗାଦେବୀ ଓ ତୁମ୍ବେଶ୍ଵର ସ୍ୱୟଂ ସହାୟିକା ଗୋଷ୍ଟିକୁ ୧୪ ହଜାର ୭ ଶହ ଟଙ୍କାରେ ବିକ୍ରି ହୋଇଥିବା ଜଣା ପଡିଛି।

ସୂଚନା ଯୋଗ୍ୟ ଯେ, ବର୍ତ୍ତମାନ ଋଷିକୂଲ୍ୟା ମୁହାଁଣ ସମୁଦ୍ରର ଜଳରାଶି ମଧ୍ୟରେ ବିରଳ ପ୍ରଜାତିର ସାମୁଦ୍ରିକ କଇଁଚ ଅଲିଭ ରିଡ଼ଲେଙ୍କ ମିଳନ ପ୍ରକ୍ରିୟା ଜାରି ରହିଛି। ଏହି ସମୟରେ ସେହିସବୁ ଅଂଚଳ ରେ ମାଛ ମାରିବା ପାଇଁ କଟକଣା ଲାଗୁ କରାଯାଇଛି। ସେହିସବୁ ଅଞ୍ଚଳ ହେଲା ଋଷିକୂଲ୍ୟା ମୁହାଁଣ ସମୁଦ୍ର ମଧ୍ୟରେ ଉତ୍ତରରେ ପ୍ରୟାଗୀ, ଦକ୍ଷିଣରେ ଆର୍ଜିପଲ୍ଲୀ ଓ ସମୁଦ୍ର ମଧ୍ୟରେ ବନ ବିଭାଗ ପକ୍ଷରୁ କଡା କଟକଣା ଜାରି କରାଯାଇଛି ।
ଖଲ୍ଲିକୋଟ ରେଞ୍ଜର ସିଦ୍ଧାର୍ଥ ଶଙ୍କର ସାହୁଙ୍କ ନେତୃତ୍ୱରେ ଏକ ପାଟ୍ରୋଲିଂ ଟିମ ଆନ୍ଧ୍ରପ୍ରଦେଶର ଏକ ଟ୍ରଲର ମାଛ ମାରୁଥିବା ଦେଖି ତାକୁ ସମୁଦ୍ର ମଧ୍ୟରେ ଘେରି ଯାଇ ଜବତ କରିଥିଲେ।
ଖଲ୍ଲିକୋଟ ରେଞ୍ଜରଙ୍କ ସହ ରମ୍ଭା ଫରେଷ୍ଟର ଅବିନାଶ ଚୌଧୁରୀ, ରାଜେଶ୍ବର, ପ୍ରସାଦ, କ୍ରୀଷ୍ଣା, ଦୀନବନ୍ଧୁ,ଆଶାର୍ବାଦ, କେଦାର, କୁନା, ପଙ୍କଜ ପ୍ରମୁଖ ଫରେଷ୍ଟ ଗାର୍ଡ ପାଟ୍ରୋଲିଂ ଟିମ ସ୍କ୍ବାର୍ଡ ଚଢ଼ାଉରେ ସାମିଲ ଥିଲେ।

Comments are closed.