ରୋହିଙ୍ଗ୍ୟାମାନଙ୍କ ଗଣହତ୍ୟାକୁ ରୋକିବା ପାଇଁ ମ୍ୟାଁମାରକୁ ଆନ୍ତର୍ଜାତିକ ନ୍ୟାୟାଳୟର ନିର୍ଦ୍ଦେଶ

ହଗ୍ :  ରୋହିଙ୍ଗ୍ୟାମାନଙ୍କର ଗଣହତ୍ୟାକୁ ରୋକିବା ପାଇଁ ଜରୁରିକାଳୀନ ପଦକ୍ଷେପ ଗ୍ରହଣ କରିବାକୁ ଆନ୍ତର୍ଜାତିକ ନ୍ୟାୟାଳୟ ମ୍ୟାଁମାରକୁ ନିର୍ଦ୍ଦେଶ ଦେଇଛନ୍ତି। ଏ କ୍ଷେତ୍ରରେ ମ୍ୟାଁମାର ସରକାର କ’ଣ ପଦକ୍ଷେପ ଗ୍ରହଣ କରୁଛନ୍ତି ସେ ସଂକ୍ରାନ୍ତରେ ୪ ମାସ ମଧ୍ୟରେ ଜଣାଇବାକୁ ମଧ୍ୟ ଆନ୍ତର୍ଜାତିକ ନ୍ୟାୟାଳୟ ମ୍ୟାଁମାର ସରକାରକୁ କହିଛନ୍ତି। ଆନ୍ତର୍ଜାତିକ ନ୍ୟାୟାଳୟରେ ଏହି ମାମଲାର ବିଚାର ମନ୍ଥରଗତିରେ ଚାଲିଥିବା ଦୃଷ୍ଟିରୁ ପ୍ରତି ୬ ମାସରେ ଥରେ ଏ ସଂକ୍ରାନ୍ତରେ ରିପୋର୍ଟ କରିବାକୁ ମଧ୍ୟ କୋର୍ଟ କହିଛନ୍ତି। ଆନ୍ତର୍ଜାତିକ ନ୍ୟାୟାଳୟ ସଭାପତି ଜଜ୍‍ ଅବଦୁଲ କାୱି ଅହମ୍ମଦ ୟୁସୁଫ୍‍ କହିଛନ୍ତି, ମ୍ୟାଁମାରର ରୋହିଙ୍ଗ୍ୟାମାନେ ସବୁଠୁ ଅସୁରକ୍ଷିତ ଅବସ୍ଥାରେ ରହିଛନ୍ତି ବୋଲି ଆନ୍ତର୍ଜାତିକ ନ୍ୟାୟାଳୟ ମତାମତ ଦେଉଛନ୍ତି।
କୋର୍ଟ କହିଛନ୍ତି, ରୋହିଙ୍ଗ୍ୟାମାନଙ୍କର ସୁରକ୍ଷା ପାଇଁ କୋର୍ଟଙ୍କୁ ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ଦେବାକୁ ପଡ଼ିଥିଲା ଓ ମ୍ୟାଁମାରକୁ ଏହା ପାଳନ କରିବାକୁ ବାଧ୍ୟତାମୂଳକ କରାଯାଇଛି। ଏକ ଆଫ୍ରିକୀୟ ଦେଶ ଗାମ୍ବିଆ ପକ୍ଷରୁ ଆନ୍ତର୍ଜାତିକ ନ୍ୟାୟାଳୟଙ୍କର ଦୃଷ୍ଟି ଆକର୍ଷଣ କରାଯିବା ପରେ ଏହି ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ଜାରି କରାଯାଇଥିଲା। ମ୍ୟାଁମାରର କିଛି ସୈନ୍ୟ
ଦେଶର ସଂଖ୍ୟାଲଘୁ ରୋହିଙ୍ଗ୍ୟାମାନଙ୍କର ଗଣହତ୍ୟା କରିଥାଇ ପାରନ୍ତି ବୋଲି ସେଠାକାର ଏକ କମିଶନ ରିପୋର୍ଟ ଦେବାର ମାତ୍ର କିଛି ଦିନ ପରେ ଆନ୍ତର୍ଜାତିକ ନ୍ୟାୟାଳୟ ଏହି ରାୟ ଦେଇଛନ୍ତି। ୭ଲକ୍ଷ ୪୦ହଜାର ରୋହିଙ୍ଗ୍ୟା ଶରଣାର୍ଥୀ ବାଙ୍ଗଲାଦେଶକୁ ପଳାୟନ କରିବା ପରେ ସେମାନଙ୍କ ପ୍ରତି ବଳାତ୍କାର, ଜଳାପୋଡ଼ା ଓ ଗଣହତ୍ୟା ଭଳି ଘଟଣାମାନ ଘଟିଥିବାର
ଉଲ୍ଲେଖ କରି ଗାମ୍ବିଆ ଆନ୍ତର୍ଜାତିକ ନ୍ୟାୟାଳୟରେ ଆବେଦନ କରିଥିଲା। ଗାମ୍ବିଆର ଏହି ଆବେଦନକୁ ୫୭ ସଦସ୍ୟ ରାଷ୍ଟ୍ର ବିଶିଷ୍ଟ ଇସଲାମିୟ ସହଯୋଗ ସଂଗଠନ ପକ୍ଷରୁ ଦୃଢ଼ ସମର୍ଥନ ପ୍ରଦାନ କରାଯାଇଥିଲା। କାନାଡ଼ା ଓ ନେଦରଲ୍ୟାଣ୍ଡସ୍‍ ଭଳି ଦେଶମାନେ ମଧ୍ୟ ଏହାକୁ ସମର୍ଥନ କରିଥିଲେ।

Get real time updates directly on you device, subscribe now.