ସ୍ତ୍ରୀ ନିର୍ଯ୍ୟାତନା ଅଭିଯୋଗରେ ସ୍ୱାମୀ ଗିରଫ

ଫୁଲବାଣୀ: କନ୍ଧମାଳ ଜିଲା ଗୋଛାପଡ଼ା ପୁଲିସ୍‍ ଆଜି ସ୍ତ୍ରୀ ନିର୍ଯ୍ୟାତନା ଅଭିଯୋଗରେ ସ୍ୱାମୀକୁ ଗିରଫ କରି କୋର୍ଟ ଚାଲାଣ କରିଛି। ଏହି ଘଟଣା ସଂପୃକ୍ତ ଅଞ୍ଚଳରେ ଆଲୋଚ୍ୟର ବିଷୟ ହୋଇଥିବା ବେଳେ ସ୍ୱାମୀ ଦ୍ୱାରା ସ୍ତ୍ରୀ ବାରମ୍ବାର ନିର୍ଯ୍ୟାତିତ ହେବାରୁ ସେ ଆତ୍ମହତ୍ୟା କରିଥିବା ନେଇ ମଧ୍ୟ ଥାନାରେ ଏତଲା ଦିଆଯାଇଛି। ଏନେଇ ଗୋଛାପଡ଼ା ପୁଲିସ୍‍ କେସ ନଂ ୫୭ା୨୦ରେ ଏକ ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଛି।

ଘଟଣା ପ୍ରକାରେ, ଗତ ୪ ବର୍ଷ ତଳେ ଗୋଛାପଡ଼ା ଥାନା ଅନ୍ତର୍ଗତ କୋଇରିମାଣ୍ଡୁ ପଂଚାୟତର ତେତରିପାଲା ଗ୍ରାମର ରାଜେନ୍ଦ୍ର ଦିଗାଲକୁ ଲୁଇସିଂ ପଂଚାୟତ ଅନ୍ତର୍ଗତ କଂଜାମେଇ ଗ୍ରାମର ଲକ୍ଷ୍ମୀ ଦିଗାଲ(୩୦) ବିବାହ କରିଥିଲେ। ବିବାହାର କିଛିଦିନ ଭଲରେ କଟିଥିଲେ ମଧ୍ୟ ପରବର୍ତ୍ତି ସମୟରେ ସ୍ୱାମୀ ମଦ୍ୟପାନ କରି ସବୁବେଳେ ମାରପିଟ କରିବା ସହିତ ନାନା ପ୍ରକାର ନିର୍ଯ୍ୟାତନା ଦେଉଥିଲା। ନିର୍ଯ୍ୟାତନା ଅସହ୍ୟ ହେବା ଯୋଗୁଁ ଗତ ୧୨ ତାରିଖରେ ସ୍ତ୍ରୀ ଲକ୍ଷ୍ମୀ ବିଷପାନ କରିଦେଇଥିଲେ। ଗୁରୁତର ଅବସ୍ଥାରେ ପ୍ରଥମେ ଗୋଛାପଡ଼ା ଓ ପରେ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ଆଣିବା ବେଳେ ତାଙ୍କର ବାଟରେ ମୃତ୍ୟୁ ହୋଇଥିଲା। ଏନେଇ ମଧ୍ୟ ପୁଲିସ୍‍ ଏକ ଅପମୃତ୍ୟୁ ମାଲା ରୁଜୁକରି ତଦନ୍ତ ଆରମ୍ଭ କରିଛି। ତେବେ ଆଜି ମୃତ ମହିଳାଙ୍କ ଭାଇ ବାଲେଶ୍ୱର ଦିଗାଲ ଦେଇଥିବା ରିପୋର୍ଟ ପ୍ରକାରେ ତାଙ୍କ ଭଉଣୀକୁ ଭିଣୋଇ ନିର୍ଯ୍ୟାତନା ଦେବା ଯୋଗୁଁ ସେ ଆତ୍ମହତ୍ୟା କରିଥିବା ନେଇ ଏତଲା ଦେବାପରେ ପୁଲିସ୍‍ ରାଜେନ୍ଦ୍ରକୁ ଗିରଫ କରି କୋର୍ଟ ଚାଲାଣ କରିଥିବା ଥାନା ଅଧିକାରୀ ତୃପ୍ତି ରଂଜନ ନାୟକ ସୂଚନା ଦେଇଛନ୍ତି।

Comments
Loading...