ମଣିଷ ପରେ ଏବେ ପଶୁକୁ ଡେଇଁଲା କରୋନା : ହଂକଂରେ ଏକ କୁକୁର ଆକ୍ରାନ୍ତ

ହଂକଂ : ବିଶ୍ବରେ ୫୦ରୁ ଅଧିକ ଦେଶରେ ହଇଚଇ ସୃଷ୍ଟି କରିଥିବା କରୋନା ଭୂତାଣୁରେ ବର୍ତ୍ତମାନ ଏକ ପୋଷା କୁକୁର ଆକ୍ରାନ୍ତ ହୋଇଛି। ହଂକଂରେ ଜଣେ ମହିଳାଙ୍କ ପୋଷା କୁକୁର ଏହି ଭୂତାଣୁରେ ସଂକ୍ରମିତ ହୋଇଥିବା ଜଣାପଡିଛି। ବର୍ତ୍ତମାନ ସୁଦ୍ଧା ମଣିଷଠାରୁ କୌଣସି ପଶୁକୁ ଏହି ଭୂତାଣୁ ସଂକ୍ରମିତ ଏହା ହେଉଛି ପ୍ରଥମ ଘଟଣା। ଏନେଇ ଶୁକ୍ରବାର ଜଣାପଡିଲା ପରେ ପୀଡିତ କୁକୁରକୁ ପଶୁ କେନ୍ଦ୍ରରେ ଅଲଗା ରଖାଯାଇଛି। ସ୍ଥାନୀୟ କୃଷି, ମତ୍ସ୍ୟ ସଂରକ୍ଷଣ ବିଭାଗ (ଏଫସିଡି) ପାଲମେରିଆ କୁକୁରର ସ୍ବାସ୍ଥ୍ୟାବସ୍ଥା ଯାଞ୍ଚ କରି କରୋନାରେ ପୀଡିତ ଥିବା ସୂଚନା ଦେଇଥିଲେ।

ଏଫସିଡି ପକ୍ଷରୁ କୁହାଯାଇଛି ଯେ, କୁକୁରମାନଙ୍କୁ କରୋନା ଭୂତାଣୁ ସଂକ୍ରମିତ ହେବା ନେଇ ବିଶ୍ବବିଦ୍ୟାଳୟ ଏବଂ ପଶୁ ସ୍ୱାସ୍ଥ୍ୟ ବିଶେଷଜ୍ଞମାନେ ସମ୍ମତି ପ୍ରକାଶ କରିଛନ୍ତି। ମନୁଷ୍ୟଠାରୁ ପଶୁକୁ ଏହି ଭୂତାଣୁ ସଂକ୍ରମିତ ହେବା ସମ୍ଭବ ବୋଲି ସେ କହିଛନ୍ତି। କିନ୍ତୁ କୁକୁର ଠାରେ କରୋନା ଭୂତାଣୁର କୌଣସି ଲକ୍ଷଣ ଦେଖିବାକୁ ମିଳିନାହିଁ। ସେହିପରି କରୋନା ସଂକ୍ରମିତ ଲୋକଙ୍କ ଠାରୁ କୁକୁର ଓ ବିଲେଇ ପରି ଗୃହପାଳିତ ପଶୁଙ୍କୁ ଅଲଗା ରଖିବାକୁ ଏଫସିଡି ବିଭାଗ ପକ୍ଷରୁ ପରାମର୍ଶ ଦିଆଯାଇଛି। କରୋନାରେ ଆକ୍ରାନ୍ତ ହୋଇଥିବା ପଶୁଙ୍କୁ ୧୪ ଦିନ ପର୍ଯ୍ୟନ୍ତ ଅଲଗା ରଖାଯିବ। କୌଣସି ପରିସ୍ଥିତିରେ ଗୃହପାଳିତ ପଶୁମାନଙ୍କୁ ଛାଡ଼ିଦେବା ଉଚିତ୍ ନୁହେଁ ବୋଲି ଏଫ୍‌ସିଡି ମୁଖପାତ୍ର କହିଛନ୍ତି। ବର୍ତ୍ତମାନ ସୁଦ୍ଧା ହଂକଂରେ ୧୦୨ଟି କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଦୁଇ ଜଣଙ୍କର ମୃତ୍ୟୁ ଘଟିଛି।

Comments
Loading...