ବିଶ୍ୱକପର ଓଡ଼ିଆ ଗୀତ ଗାଇଲେ ମିକା ଓ ଲିପ୍‍ସା

0

ଭୁବନେଶ୍ୱର : ଆସ କରିବା ଏତେ ବୋବାଲ …ଓଡ଼ିଶା ନାଁ ହେବ ଗ୍ଲୋବାଲ। ଏଭଳି ଓଡ଼ିଆ ସଙ୍ଗୀତରେ କମ୍ପିବ ହକି ବିଶ୍ୱକପ। କଳିଙ୍ଗ ଷ୍ଟାଡ଼ିୟମରେ ଆସନ୍ତା ନଭେମ୍ବର ୨୮ରୁ ଡିସେମ୍ବର ୧୬ ପର୍ଯ୍ୟନ୍ତ ଖେଳାଯିବାକୁ ଥିବା ପୁରୁଷ ହକି ବିଶ୍ୱକପ ଲାଗି ପ୍ରସ୍ତୁତ ହୋଇଛି ଓଡ଼ିଆ ଗୀତ। ଡ. ନୀଳମାଧବ ପଣ୍ଡାଙ୍କ ପ୍ରଯୋଜନାରେ ଓଡ଼ିଆରେ ଏକ ଚମତ୍କାର ମ୍ୟୁଜିକ୍‍ ଭିଡ଼ିଓ ପ୍ରସ୍ତୁତ କରାଯାଇଛି। ଯାହାର ନାମ ହୋଇଛି ଆସ କରିବା ଏତେ ବୋବାଲ… ଓଡ଼ିଶା ନାଁ ହେବ ଗ୍ଲୋବାଲ। ସଙ୍ଗୀତ ନିର୍ଦେଶକ ମାନବ ରଥ ଏହାକୁ ନିର୍ଦେଶନା ଦେଇଥିବାବେଳେ କଣ୍ଠଦାନ କରିଛନ୍ତି ବଲିଉଡ୍‍ର ଆଗଧାଡ଼ିର ଗାୟକ ମିକା ସିଂହ ଓ ଓଲିଉଡ୍‍ ଗାୟିକା ଲିପ୍‍ସା। ହକି ଉପରେ ଆଧାରିତ ଏହି ଗୀତକୁ ଲେଖିଛନ୍ତି ସଚିନ ଦାସ ଓ ସଙ୍ଗୀତରେ ଏହାକୁ ସଜାଇଛନ୍ତି ଓଲିଉଡ୍‍ କମ୍ପୋଜର ଗୁଡ୍‍ଲି ରଥ। ସିନେ ନିର୍ଦେଶକ ସୁଶାନ୍ତ ମଣିଙ୍କ ନିର୍ଦେଶନାରେ ପ୍ରସ୍ତୁତ କରାଯାଇଛି। ପ୍ରଥମ କରି ଓଡ଼ିଆ ଗୀତ ଗାଇଥିବା ମିକା କହିଛନ୍ତି ଆମର ଜାତୀୟ କ୍ରୀଡ଼ା ହକି ପାଇଁ ଗୀତ ଗାଇବା ମୋ ପାଇଁ ଅତ୍ୟନ୍ତ ଗୌରବର ବିଷୟ। ଏଥିସହ ମିକା ଭାରତୀୟ ଦଳର ବିଜୟ ମଧ୍ୟ ଶୁଭକାମନା କରିଛନ୍ତି। ସଙ୍ଗୀତ ନିର୍ଦେଶକ ମାନବ ରଥ କହିଛନ୍ତି ଏହି ଗୀତ କେବଳ ହକି ବିଶ୍ୱକପକୁ ଦର୍ଶାଉନାହିଁ, ବରଂ ଓଡ଼ିଶାର ରଙ୍ଗିନ, ଆତିଥ୍ୟ ଓ ଉତ୍ସବ ପାଳନ କରିବାର ଚିନ୍ତାଧାରାକୁ ମଧ୍ୟ ବ୍ୟକ୍ତ କରୁଛି। ଓସ୍କାର ପୁରସ୍କାର ବିଜେତା ବଲିଉଡ୍‍ ସଙ୍ଗୀତ ନିର୍ଦେଶକ ଏ.ଆର ରେହମାନଙ୍କ କଣ୍ଠରୁ ବିଶ୍ୱକପ ହିନ୍ଦୀ ସଙ୍ଗୀତ ପ୍ରସ୍ତୁତ ହେବାକୁ ଥିବାବେଳେ ମିକା ସିଂହ ଓ ଲିପ୍ପାଙ୍କ କଣ୍ଠରୁ ଓଡ଼ିଆ ସଙ୍ଗୀତ ବିଶ୍ୱକପରେ ଦର୍ଶକଙ୍କୁ ଉତ୍ସାହିତ କରିବ ବୋଲି ଆଶା କରାଯାଇଛି।

Leave A Reply