ପରିବା ଦର ଆକାଶ ଛୁଆଁ ; ଶସ୍ତାରେ ମିଳୁଥିବା ସ୍ଥାନରେ ଲୋକେ ଭୁଲି ଯାଉଛନ୍ତି ସାମାଜିକ ଦୂରତ୍ୱ

ବଲାଣି : କେନ୍ଦୁଝର ଜିଲା ଖଣି ଅଂଚଳ ବଲାଣିରେ ପରିବା ଦର ଆକାଶ ଛୁଆଁ ହୋଇପଡିଛି । ତେବେ ଝାଡ଼ଖଣ୍ଡ ରାଜ୍ୟର ମନୋହରପୁର ଠାରୁ କିଛି ମହିଳା ପରିବା ବିକାଳୀ ଏଠାରେ ବଜାର ଦର ଠାରୁ ଶସ୍ତାରେ ପରିବା ବିକୁଥିବା ବେଳେ ଶସ୍ତାରେ ପରିବା କିଣିବାକୁ ଆସି ସାମାଜିକ ଦୂରତ୍ୱର କଟକଣାକୁ ସ୍ଥାନୀୟ ବାସିନ୍ଦା ଭୁଲି ଯାଉଛନ୍ତି । ବଲାଣି ଅଂଚଳର ସ୍ଥାନୀୟ ପରିବା ବେପାରୀ ସ୍ଥାନୀୟ ହାଟରୁ ପରିବା ସଂଗ୍ରହ କରି ଏଠାରେ ପରିବା ବିକ୍ରି କରୁଥିବା ବେଳେ ଲାଭଖୋର ମନୋବୃତ୍ତି ଯୋଗୁଁ ସେମାନେ ପରିବା ଚଢା ଦରରେ ବିକ୍ରି କରୁଛନ୍ତି । ସ୍ଥାନୀୟ ପ୍ରଶାସନ ପରିବା ଦର ଉପରେ ନିୟନ୍ତ୍ରଣ କରିବାକୁ କୌଣସି ପଦକ୍ଷେପ ଗ୍ରହଣ କରୁନଥିବାରୁ ସେମାନେ ବଜାର ଦର ଠାରୁ ପ୍ରାୟ ଦୁଇ ଗୁଣ ସାଧାରଣ ଖାଉଟିଙ୍କ ଠାରୁ ଦାବି କରୁଛନ୍ତି । ବଲାଣି ଅଂଚଳରେ ଉକ୍ତ ପରିବା ବେପାରୀ ବିମ କିଲୋ ପ୍ରତି ୧୨୦ , ଭେଣ୍ଡି ୪୦ ଟଙ୍କା, ବିଲାତି ୮୦ ଟଙ୍କା, ବରବଟି ୬୦ ଟଙ୍କା, ବାଇଗଣ ୮୦ ଓ ଫୁଲ କୋବି ଗୋଟା ୬୦ ଟଙ୍କାରେ ବିକ୍ରି କରୁଛନ୍ତି । ଅନ୍ୟ ପକ୍ଷରେ ମନୋହରପୁରର ମହିଳା ପରିବା ବିକାଳୀମାନେ ବିମ କିଲୋ ପ୍ରତି ୮୦, ଭେଣ୍ଡି ୨୦ ଟଙ୍କା, ବିଲାତି ୬୦ ଟଙ୍କା, ବରବଟି ୪୦ ଟଙ୍କା , ବାଇଗଣ ୪୦ ଟଙ୍କାରେ ବିକ୍ରି କରୁଛନ୍ତି । ତେବେ ଏହି କରୋନା ମହାମାରୀ ସମୟରେ ଜିଲା ପ୍ରଶାସନ ପକ୍ଷରୁ ବଲାଣି ଅଂଚଳକୁ ବଫର ଜୋନ ଭାବରେ ଘୋଷଣା କରାଯିବା ସହିତ ଅଂଚଳରେ କରୋନାକୁ ପ୍ରତିହତ କରିବାକୁ ନାକ ଓ ମୁହଁକୁ ଘୋଡାଇ ରଖିବାକୁ ମାସ୍କ ଓ ସର୍ବନିମ୍ନ ୬ ଫୁଟ ସହିତ ୨ ରୁ ଅଧିକ ଲୋକଙ୍କୁ ଦୋକାନରେ ଛିଡା ହେବାକୁ ବାରଣ କରାଯାଇଥିଲେ ସୁଦ୍ଧା ଶସ୍ତାରେ ପରିବା ପାଇବା ଆଶାରେ ଲୋକେ ଏହି ନିୟମକୁ ଭୁଲି ଯାଉଛନ୍ତି ଯାହା ଲୋକଙ୍କ ସ୍ୱାସ୍ଥ୍ୟ ସୁରକ୍ଷା ପ୍ରତି ବିପଦ ସୃଷ୍ଟି କରିଛି । ଏପରି ପରିସ୍ଥିତିରେ ଜିଲା ପ୍ରଶାସନ ପରିବା ଦର ଉପରେ ନିୟନ୍ତ୍ରଣ ରକ୍ଷା କରି ଚଢା ଦର ରେ ବିକ୍ରି କରୁଥିବା ପରିବା ବିକାଳୀଙ୍କ ଉପରେ ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କଲେ ଅଂଚଳରେ ପରିବା ଦର ନିୟନ୍ତ୍ରଣରେ ରହିବା ସହିତ ପରିବା ବଜାରରେ ଭିଡ଼ ଉପରେ ଅଙ୍କୁଶ ଲାଗି ପାରିବ । ପ୍ରଶାସନିକ ଅଧିକାରୀ ଏହି ଗୁରୁତ୍ୱପୂର୍ଣ୍ଣ ବିଷୟ ଉପରେ ଦୃଷ୍ଟି ଦେଇ ବଜାର ଦରକୁ ନିୟନ୍ତ୍ରଣ କରିବାକୁ ବିଭିନ୍ନ ମହଲରୁ ଦାବି କରାଯାଇଛି।

Comments are closed.