ବଲାଙ୍ଗିର: ବଲାଙ୍ଗିର ସହରର ୧୫ ନମ୍ବର ୱାର୍ଡ। ବଲାଙ୍ଗିର ସହରରେ ତାତି କେତେ ତାହା ଜଣାଇବା ପାଇଁ ଅଭିନବ ପ୍ରୟାସ କରିଥିଲେ ସ୍ଥାନୀୟ ଯୁବକମାନେ। ଖରାରେ ଅଧ ଘଣ୍ଟା ଧରି ଏକ ତାୱା ରଖିଥିଲେ। ତା’ପରେ ଜଣେ ଯୁବକ ତାୱାରେ ଅଣ୍ଡା ଫଟାଇ ପକେଇଥିଲେ। ଆଉ ତାହା ଆମଲେଟ୍ ହେଇଯାଇଥିଲା। ଏହି ଭିଡିଓ ଏବେ ମୋବାଇଲରୁ ମୋବାଇଲକୁ ଘୁରି ବୁଲୁଛି। ତା’ ସହ ବଲାଙ୍ଗିରରେ ତାତି କେମିତି ତାହା ଜଣାପଡି ଯାଉଛି।
ତତଲା ତାୱାରେ ଭାଜି ହେଉଛି ସାରା ବଲାଙ୍ଗିର। ଜିଲାର ସମସ୍ତ ସ୍ଥାନରେ ପାରଦ ୪୦ ଡିଗ୍ରୀ ପାର କରି ସାରିଛି। ତାଳୁ ଫଟା ଖରା ସାଙ୍ଗକୁ ଝାଞ୍ଜି ପବନରେ ଜନ ଜୀବନ ଅସ୍ତବ୍ୟସ୍ତ। ଦିନ ୧୦ଟା ହେଲେ ଲୋକେ ଘରୁ ବାହାରିବାକୁ ଭୟ କରୁଥିବା ବେଳେ କୌଣସି ଜରୁରୀ କାମରେ ପଦାକୁ ଗୋଡ଼ କାଢିଥିବା ଲୋକ କଲବଲ ହେଉଛନ୍ତି। ବଲାଙ୍ଗିର ଜିଲାରେ ଲାଗି ରହିଛି ରୌଦ୍ର ତାଣ୍ଡବ। ସକାଳ ପାହିଲେ ଦିନ ଦିପହର ଭଳି ଅନୁଭୂତ ହୋଇଛି। ଦିନକୁ ଦିନ ତାପମାତ୍ରା ବଢୁଥିବା ବେଳେ ଲୋକେ ଗ୍ରୀଷ୍ମପ୍ରବାହ ଜନିତ ସମସ୍ୟାର ସମ୍ମୁଖୀନ ହେଉଛନ୍ତି। ଗତ ଏକ ସପ୍ତାହ ମଧ୍ୟରେ ଜିଲାର ତାପମାତ୍ରା ୪୦ ଡିଗ୍ରୀରୁ ଉପରେ ରହିଛି। ଯେଉଁଥିରେ ଟିଟିଲାଗଡ଼ ଓ ବଲାଙ୍ଗିର ସହରର ତାପମାତ୍ରା ୪୪ ଡିଗ୍ରୀ ରହିଥିବା ସୂଚନା ମିଳିଛି। ଆଗକୁ ଆହୁରି ଖରା ବଢିବା ସମ୍ଭାବନା ରହିଥିବାରୁ ଲୋକଙ୍କ ମନରେ ଛନକା। ସହରରେ ଗରମ ସାଙ୍ଗକୁ ଅଘୋଷିତ ବିଦ୍ୟୁତ କାଟ୍ ‘କଟା ଘାରେ ଚୁନ’ ଦେବା ସଦୃଶ ହୋଇଛି। ଅନ୍ୟପଟେ କିଛିଦିନ ତଳେ ସହର ମଧ୍ୟରେ ଥିବା ବହୁ ବର୍ଷ ପୁରୁଣା ଗଛ ଗୁଡିକୁ କଟାଯାଇଥିବା, ଜଙ୍ଗଲରେ ନିଆଁ ଲାଗିବା, ରାସ୍ତାଘାଟ ସବୁ କଂକ୍ରିଟ ହେବା ଯୋଗୁଁ ଏଭଳି ଗରମ ଅନୁଭୂତ ହେଉଥିବା ବୁଦ୍ଧିଜୀବୀ ମହଲରେ ଚର୍ଚ୍ଚା ଵିଷୟ ପାଲଟିଛି।
Comments are closed.