ମାର୍ଚ୍ଚ ୧୪ରୁ ହରିରାଜପୁର ପ୍ରସିଦ୍ଧ ପଞ୍ଚୁଦୋଳ ମେଳଣ 

ପିପିଲି :ଓଡିଶାରେ ପ୍ରସିଦ୍ଧି ଲାଭ କରିଥିବା ପୁରୀ ଜିଲା ହରିରାଜପୁରର ପଞ୍ଚୁଦୋଳ ମେଳଣର ଜମାଣ ଉତ୍ସବ ଆସନ୍ତା ମାର୍ଚ୍ଚ୧୪ ତାରିଖ ଶନିବାର ମଧ୍ୟରାତ୍ରରୁ ଆରମ୍ଭ ହେବ। ୧୭ତାରିଖ ମଙ୍ଗଳବାର ଅପରାହ୍ନରେ ଗୋଧୂଳୀ ଲଗ୍ନରେ ଠାକୁର ମାନଙ୍କର ଦିଅଁମେଳଣ ଉତ୍ସବ ତଥା ହରିହର ଭେଟ କରାଯାଇ ଏହି ପଞ୍ଚୁଦୋଳ ମେଳଣ ସମାପନ ହେବ। ପିପିଲି ନିର୍ବାଚନମଣ୍ଡଳୀର ଡେଲାଙ୍ଗ ଥାନା ଅନ୍ତର୍ଗତ ଏହି ପ୍ରସିଦ୍ଧ ମେଳଣ ପଡିଆ ପିପିଲି-ଜଟଣୀ ରାସ୍ତାର ପିପିଲି ଠାରୁ ୧୦କିମି, ଜଟଣୀ ଠାରୁ ୪କିମି ଓ ଭୁବନେଶ୍ୱର ଠାରୁ କପିଳପ୍ରସାଦ ରାସ୍ତାରେ ୧୫ କିମି ଦୂରରେ ଅବସ୍ଥିତ।

୧୪ତାରିଖ ମଧ୍ୟ ରାତ୍ରରେ ପୁର୍ବ ରିତୀନିତୀ, ବିଧି ଓ ପରମ୍ପରା ଅନୁଯାଇ ଏହି ପ୍ରସିଦ୍ଧ ମେଳଣର ସ୍ଥାନାଧିପତି ପ୍ରଭୁ ଶ୍ରୀଶ୍ରୀପଶ୍ଚିମାଶମ୍ଭୁ ସୋମନାଥ ଦେବଙ୍କୁ ଏକ ସୁସଜ୍ଜିତ ଦୋଳବିମାନରେ ମନ୍ଦିରରୁ ଅଣାଯାଇ ଏକ ବର୍ଣ୍ଣାଢ୍ୟ ଶୋଭାଯାତ୍ରାରେ ଚିତ୍ତାକର୍ଷକ ଆତସବାଜି ପ୍ରଦର୍ଶନ, ଆଲୋକ ସଜ୍ଜା, ଭଜନ କୀର୍ତ୍ତନ, ଘଣ୍ଟ, ଘଣ୍ଟା, ତୁରୀ, ଶଙ୍ଖ ନାଦ, ଘୋଡାନାଚ, ନାଗାନୃତ୍ୟ ସହ ଲକ୍ଷାଧିକ ଭକ୍ତଙ୍କ ଗହଣରେ ମେଳଣ ପଡିଆରେ ବିଜେ କରାଯିବ। ଆଖପାଖ ଅଞ୍ଚଳର ୮୦ଟି ଠାକୁରଙ୍କ ଦୋଳବିମାନ ଏଥିରେ ଅଂଶଗ୍ରହଣ କରିବେ। ଉକ୍ତ ଜମାଣ ରାତ୍ରିରେ ଚିତ୍ତାକର୍ଷକ ଆତସବାଜି ପ୍ରଦର୍ଶନ ଅନ୍ୟ କୌଣସି ମେଳଣରେ ଦେଖିବାକୁ ମିଳିନଥାଏ। ପୁରୀ, ବ୍ରହ୍ମପୁର, ଖୋର୍ଦ୍ଧା, କଟକ, ଗଞ୍ଜାମ ସମେତ ରାଜ୍ୟର ବିଭିନ୍ନ ଅଞ୍ଚଳରୁ ବାଣ କାରିଗର ମାନେ ଏଠାରେ ସେମାନଙ୍କର ଅତ୍ୟାଧୁନିକ ଆତସବାଜି ପ୍ରଦର୍ଶନ କରିଥାନ୍ତି। ୧୭ତାରିଖ ମଙ୍ଗଳବାର ଗୋଧୂଳି ସଂନ୍ଧ୍ୟାରେ ବହୁ ପ୍ରତିକ୍ଷିତ ଠାକୁର ମେଳଣ ଉତ୍ସବ ତଥା ହରିହର ଭେଟ କାର୍ଯ୍ୟକ୍ରମ ପୂର୍ବ ରୀତି ନୀତି ଅନୁଯାଇ ଅନୁଷ୍ଠିତ ହେବ ବୋଲି ମେଳଣ ପରିଚାଳନା ପରିଷଦ ପକ୍ଷରୁ ସୂଚନା ଦିଆଯାଇଥିବା ବେଳେ ଏଥିପାଇଁ ପୁଲିସ ଓ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ସୂଚନା ମିଳିଛି। ପ୍ରତ୍ୟେକ ବର୍ଷ ଭଳି ଏଥର ମଧ୍ୟ ୪ଲକ୍ଷରୁ ଉର୍ଦ୍ଧ ଭକ୍ତ ଓ ଶ୍ରଦ୍ଧାଳୁଙ୍କ ସମାଗମ ହେବ ବୋଲି ଅନୁମାନ କରାଯାଉଛି। ମେଳଣକୁ ଚଳିତବର୍ଷ ଅଧିକ ଆକର୍ଷଣ କରିବା ପାଇଁ ମେଳଣ ପରିଚାଳନା ପରିଷଦ, ହରିରାଜପୁର ଗ୍ରାମବାସୀଙ୍କ ସମେତ ବିଭିନ୍ନ ସଂଗଠନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି।

Comments are closed.