ଫୋନରେ କଥା ହେଲେ; ଗୁଲଜାରଙ୍କୁ କୃତଜ୍ଞତା ଜଣାଇଲେ ହଲଧର

ବରଗଡ଼ : ଆପଣ ବହୁତ ଭଲ କବି…ଆପଣ ଭାରୀ ସରଳ…ଆପଣଙ୍କ କବିତା ମୋତେ ବହୁତ ଭଲ ଲାଗେ… ମୋର ଅନୁବାଦ ଆପଣଙ୍କୁ ଭଲ ଲାଗିଲା ତ ? ଯଦି କେବେ ସୁଯୋଗ ମିଳେ ଆପଣଙ୍କ ପାଖକୁ ଯାଇ ସାକ୍ଷାତ କରିବି । ସାଂପ୍ରତିକ ଭାରତୀୟ ସାହିତ୍ୟର ଅପ୍ରତିଦ୍ୱନ୍ଦ୍ବୀ ତଥା ବହୁମୁଖୀ ପ୍ରତିଭା, ଚଳଚ୍ଚିତ୍ର ଜଗତର ସର୍ବୋଚ୍ଚ ସମ୍ମାନ ‘ଦାଦା ସାହେବ ଫାଲକେ’ ପୁରସ୍କାରପ୍ରାପ୍ତ ଗୁଲଜାର ଏଭଳି ଭାଷାରେ ସମ୍ବଲପୁରୀ ସାହିତ୍ୟର ଗୌରବ ହଲଧର ନାଗଙ୍କ ସହ ଆଜି ବାର୍ତ୍ତାଳାପ କରିଛନ୍ତି। ଗୁଲଜାରଙ୍କ ପୁସ୍ତକ ଉପହାର ପାଇଁ ହଲଧର ତାଙ୍କୁ ଫୋନ କରି କୃତଜ୍ଞତା ଜଣାଇଥିଲେ। ଏହାର ପ୍ରତ୍ୟୁତ୍ତରରେ ଗୁଲଜାର ଉପରୋକ୍ତ ମର୍ମରେ ନିଜ ପ୍ରତ୍ୟୁତ୍ତର ରଖିଥିଲେ।
ସାରା ଭାରତର ୩୪ଟି ଭାଷାରୁ ୨୭୯ ଜଣ କବିଙ୍କ ୩୬୫ଟି ବଛା ବଛା କବିତାକୁ ନେଇ ଗୁଲଜାର ସଂପାଦନ କରିଥିବା ବହୁ ଚର୍ଚ୍ଚିତ କବିତା ସଂକଳନ ‘ଏ ପଏମ ଏ ଡେ’ ର ପ୍ରଥମ କବି ଭାବେ କବି ହଲଧରଙ୍କ ‘ପାଁଚ ଅମୃତ’ ଏବଂ ‘ଚିଠି ଲେଖୁଛେଁ’ ଦ୍ୱୟକୁ ସ୍ଥାନୀତ କରିବା ସହ ଏକମାତ୍ର ବରେଣ୍ୟ କବି ହଲଧରଙ୍କ ସଂକ୍ଷିପ୍ତ ପରିଚୟ ନିଜେ ଲେଖିଛନ୍ତି। ସୋମବାର ସନ୍ଧ୍ୟାରେ ହୋଇଥିବା ଏହି ବାର୍ତ୍ତାଳାପରେ ଗୁଲଜାରଙ୍କ ମନରେ ସମ୍ବଲପୁରୀ ଭାଷା ଓ ହଲଧରଙ୍କ ପ୍ରତି ଥିବା ଆଗ୍ରହ ଓ ଆଦର ନିମନ୍ତେ ହଲଧର ତାଙ୍କୁ କୃତଜ୍ଞତା ଜଣାଇଛନ୍ତି। ଏଠାରେ ପ୍ରକାଶଯୋଗ୍ୟ ଯେ, ଗୁଲଜାରଙ୍କ ବହିରେ ହଲଧରଙ୍କୁ ଯଥେଷ୍ଟ ଗୁରୁତ୍ୱ ପ୍ରଦାନ କରାଯାଇଥିବା ଖବର ଜାଣିଲା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଟ୍ୱିଟ କରି ଗୁଲଜାରଙ୍କୁ ଧନ୍ୟବାଦ ଦେଇଛନ୍ତି।

Comments are closed.