ନୂଆଦିଲ୍ଲୀ : ମଣିପୁରର ଜ୍ଞାନେନ୍ଦ୍ର ନିନଙ୍ଗୋବାମ୍ ଶୁକ୍ରବାର ହକି ଇଣ୍ଡିଆର ନୂତନ ସଭାପତି ଭାବେ ସର୍ବସମ୍ମତିକ୍ରମେ ନିର୍ବାଚିତ ହୋଇଛନ୍ତି। ମହମ୍ମଦ ମୁସ୍ତାକ ଅହମ୍ମଦଙ୍କ ସ୍ଥାନରେ ଜ୍ଞାନେନ୍ଦ୍ର ସଭାପତି ଭାବେ ଦାୟିତ୍ବ ଗ୍ରହଣ କରିଛନ୍ତି। କରୋନା ମହାମାରୀ କାରଣରୁ ଭିଡ଼ିଓ କନ୍ଫରେନସିଂରେ ଆୟୋଜିତ ବୈଠକରେ ବିଭିନ୍ନ ରାଜ୍ୟ ୟୁନିଟ୍ର କର୍ମକର୍ତ୍ତାମାନେ ଯୋଗଦେଇଥିଲେ। ଏଥିରେ ସଭାପତି ଭାବେ ଜ୍ଞାନେନ୍ଦ୍ରଙ୍କୁ ବିନା ପ୍ରତିରୋଧରେ ବିଭିନ୍ନ କର୍ମକର୍ତ୍ତା ମାନେ ସମର୍ଥନ କରିଥିଲେ। ଜ୍ଞାନେନ୍ଦ୍ର ଉତ୍ତରପୂର୍ବ ରାଜ୍ୟରୁ ପ୍ରଥମ ବ୍ୟକ୍ତି ଭାେବ ହକି ଇଣ୍ଡିଆର ସଭାପତି ଭାବେ ନିର୍ବାଚିତ ହୋଇଛନ୍ତି।
ହକି ଇଣ୍ଡିଆ ଓ କ୍ରୀଡ଼ା ମନ୍ତ୍ରାଳୟ ମଧ୍ୟରେ ବିବାଦ କାରଣରୁ ଗତ ଜୁଲାଇରେ ଅହମ୍ମଦ ହକି ଇଣ୍ଡିଆର ସଭାପତି ପଦରୁ ଇସ୍ତଫା ଦେଇଥିଲେ। ଅହମ୍ମଦ ୨୦୧୮ ନିର୍ବାଚନରେ ଜାତୀୟ କ୍ରୀଡ଼ା ନୀତିକୁ ଅବମାନନା କରିଥିଲେ। ଫଳରେ କ୍ରୀଡ଼ା ମନ୍ତ୍ରାଳୟ ସଭାପତି ପଦକୁ ରଦ୍ଦ କରିବା ସହିତ ତୁରନ୍ତ ନୂତନ ସଭାପତି ନିର୍ବାଚିତ କରିବାକୁ ହକି ଇଣ୍ଡିଆକୁ ପରାମର୍ଶ ଦେଇଥିଲେ। ଅହମ୍ମଦ ୨୦୧୦ରୁ ୨୦୧୪ ପର୍ଯ୍ୟନ୍ତ ହକି ଇଣ୍ଡିଆ ସାଧାରଣ ସମ୍ପାଦକ ରହିଥିବାବେଳେ ୨୦୧୪ରୁ ୨୦୧୮ ପର୍ଯ୍ୟନ୍ତ ସଭାପତି ଭାବେ ନିର୍ବାଚିତ ହୋଇଥିଲେ। ୨୦୧୮ ନିର୍ବାଚନରେ ଜାତୀୟ କ୍ରୀଡ଼ା ନିୟମକୁ ଅବମାନନା କରି ପୁନର୍ବାର ସଭାପତି ଭାବେ ନିର୍ବାଚିତ ହୋଇଥିଲେ। ନିୟମ ଅନୁସାରେ ୨ଥରରୁ ଅଧିକ ଜଣେ ବ୍ୟକ୍ତି ପଦରେ ରହିପାରିବେ ନାହିଁ। ଜ୍ଞାନେନ୍ଦ୍ର ହକି ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବେ ୨୦୦୯ରୁ ୨୦୧୪ ପର୍ଯ୍ୟନ୍ତ ଦାୟିତ୍ବ ତୁଲାଇଥିଲେ।
Comments are closed.