ଗୁରୁଡିଝାଟିଆ: ଗୁରୁଡିଝାଟିଆ ପୂର୍ବ ଆଠଗଡ ଭାବେ ବେଶ ପରିଚିତ। ଗୁରୁଡିଝାଟିଆ ଅଞ୍ଚଳର ପ୍ରାଚୀନ କୀର୍ତ୍ତିରାଜି, ପରମ୍ପରା ଓ ସଂସ୍କୃତିକୁ ବାଦଦେଇ ଆଠଗଡ ଇତିହାସ ଲେଖିବା ସମ୍ଭବପର ନୁହେଁ। ରାଜାରାଜୁଡାଙ୍କ ସମୟରେ ଆଠଗଡର ବିଭିନ୍ନ ସ୍ଥାନରେ ନିର୍ମିତ ହୋଇଥିଲା ମନ୍ଦିର। ଏହାର ଉଦାହରଣ ହେଉଛି ଗୁରୁଡିଝାଟିଆର ମଦନମୋହନ ମନ୍ଦିର। ସାଂସ୍କୃତିକ ଭାବଧାରାକୁ ଅତୁଟ ରଖି ଆଧ୍ୟାତ୍ମିକ କ୍ଷେତ୍ରରେ ସମଗ୍ର ଆଠଗଡ ଅଞ୍ଚଳରେ ଏକ ସମୃଦ୍ଧ ସଭ୍ୟତାର ଅଭିବୃଦ୍ଧି ପାଇଁ ମନ୍ଦିର ନିର୍ମିତ ହୋଇଥିଲା। ଏହାର ପରିଚାଳନା ରାଜାରାଜୁଡାମାନେ କରୁଥିବା ବେଳେ ଏବେ ଦେବୋତ୍ତର ବିଭାଗ ଏହାର ସମସ୍ତ କାର୍ଯ୍ୟକୁ ସଂପାଦନ କରୁଛି। ଏପରିକି ମନ୍ଦିରର ପୂଜକଙ୍କ ପାଇଁ ଠାକୁରଙ୍କ ନାମରେ ଜମି ମଧ୍ୟ ରହିଛି। କିନ୍ତୁ ଗୁରୁଡିଝାଟିଆ ମଦନମୋହନ ମନ୍ଦିର ପ୍ରାୟ ୨ଶହ ବର୍ଷର ହୋଇଥିଲେ ମଧ୍ୟ ଏବେ ରକ୍ଷଣାବେକ୍ଷଣା ଅଭାବରୁ ମନ୍ଦିର ଉପରେ ୧୦ଫୁଟ ଉଚ୍ଚର ଗଛ ଉଠି ମନ୍ଦିରକୁ ଫଟାଇଦେଲାଣି।
ମନ୍ଦିରର ଏକାଧିକ ସ୍ଥଳରେ ଏଭଳି ଗଛ ଉଠିଥିଲେ ମଧ୍ୟ ଆଠଗଡ ଦେବୋତ୍ତର ବିଭାଗର କୁମ୍ଭକର୍ଣ୍ଣ ନିଦ୍ରା ଭାଙ୍ଗୁନାହିଁ। ଏକଥା ନୁହେଁ ଯେ ଆଠଗଡ ଦେବୋତ୍ତର ବିଭାଗ ମନ୍ଦିରର ଦୂରାବସ୍ଥା ସଂପର୍କରେ ଅବଗତ ନାହାନ୍ତି। ଗୁରୁଡିଝାଟିଆର ଉତ୍ସାହି ଯୁବକମାନେ ଏକାଧିକବାର ମନ୍ଦିରର ଉନ୍ନତି, ରଙ୍ଗଲଗାଇବା ସଂପର୍କରେ ଆଠଗଡ ଦେବୋତ୍ତର କାର୍ଯ୍ୟାଳୟ ଅଧିକାରୀଙ୍କୁ ଅବଗତ କରାଇଛନ୍ତି। ହେଲେ ତାର ସୁଫଳ ମିଳିପାରିନାହିଁ। ଗତ ୨ବର୍ଷତଳେ ଗାଁର ଯୁବକମାନେ ମିଶିକରି ମନ୍ଦିର ଉପରେ ହୋଇଥିବା ଗଛଗୁଡିକୁ କାଟିବା ସହିତ ଊଇଖାଇଯାଇଥିବା ମନ୍ଦିରର ପୁନଉଦ୍ଧାର କରିଥିଲେ। ହେଲେ ଏବେ ପୁଣି ମନ୍ଦିର ଉପରେ ଗଛ ଉଠିଲାଣି। ଦେବୋତ୍ତର ବିଭାଗର ଉଦାସୀନତା ପାଇଁ ରାଜାରାଜୁଡାଙ୍କ ସମୟରୁ ଗ୍ରାମର ବୁଦ୍ଧିଜୀବିମାନଙ୍କ ମହତ ଉଦ୍ଦେଶ୍ୟରେ ନିର୍ମିତ ହୋଇଥିବା ମଦନମୋହନ ମନ୍ଦିରଟି ଏବେ ଭଗ୍ନାବସ୍ଥାକୁ ଆସିବାର ସମ୍ଭାବନା ଦେଖାଦେଇଛି। ତେଣୁ ଦେବୋତ୍ତର ବିଭାଗ ସଠିକ୍ ଭାବରେ ଅନୁଧ୍ୟାନ କରି ଏହାର ରକ୍ଷଣାବେକ୍ଷଣା କରିବା ପାଇଁ ସ୍ଥାନୀୟ ମୁରବୀ ଓ ଆଧ୍ୟାତ୍ମିକବାଦୀମାନେ ଦାବି କରିଛନ୍ତି।
Comments are closed.