ଫାରୁକାବାଦ (ଉତ୍ତରପ୍ରଦେଶ) : ବାହା ଭୋଜିରେ ଗଣ୍ଡଗୋଳ, ଖାଇବାକୁ ନେଇ ବରପକ୍ଷ ଓ କନ୍ୟାପକ୍ଷର ଲୋକଙ୍କ ମଧ୍ୟରେ ପାଟିତୁଣ୍ଡ ଓ ମାରପିଟ୍ । ତା ପରେ ଯାହା ହେଲେ ତାହା କେବେ କେଉଁଠି ଘଟି ନ ଥିବ । ବାହା ହେବାକୁ ଆସିଥିବା ବର ନିଶାରେ ଚୁର୍ ହୋଇ ଭାବୀ ଶଳା ଉପରେ ଗାଡ଼ି ମଡ଼ାଇ ଦେବା ଘଟଣା ଏଠାରେ ବେଶ୍ ଚର୍ଚା ସୃଷ୍ଟି କରିଛି ।
ସମସାବାଦ ଥାନା ଅଞ୍ଚଳର ଗୋବିନ୍ଦପୁରକୁ ବର ହୋଇ ଆସିଥିଲେ ମନୋଜ କୁମାର । ସୋମବାର ରାତିରେ ବର ଓ ବରଯାତ୍ରୀ ଆସି ଗୋବିନ୍ଦପୁରର ଅସଦଉଲ୍ଲା ଗାଁରେ ପହଞ୍ଚିଥିଲେ । ଅଧିକାଂଶ ବରଯାତ୍ରୀ ନିଶାରେ ଥିଲେ ଆଉ ବର ମନୋଜ କୁମାର ବି ବାଦ ପଡ଼ି ନ ଥିଲେ । ବରଯାତ୍ରୀ କନ୍ୟା ଘରେ ପହଞ୍ଚିବା ପରେ ଖାଇବା ପିଇବା ବ୍ୟବସ୍ଥା ହୋଇଥିଲା । ମାତ୍ର ଏହାକୁ ନେଇ ମନୋଜଙ୍କ ସାଙ୍ଗସାଥୀ କନ୍ୟାପକ୍ଷର ଲୋକଙ୍କୁ ଗାଳିଗୁଲଜ କରିଥିଲେ ।
ଏହାପରେ କନ୍ୟାପକ୍ଷ ମଧ୍ୟ ଜବାବ ଦେବାକୁ ବାହାରି ଆସିଲେ । କନ୍ୟାର ଭାଇ ପୁନିତଙ୍କ କହିବା ଅନୁସାରେ ସେମାନେ ଅତ୍ୟନ୍ତ ଅଭଦ୍ର ବ୍ୟବହାର କଲେ । ଆମେ ତାହାକୁ ସହିଗଲୁ, ମାତ୍ର ଖାଇବା ବେଳେ ମିଠା ପରସାଯିବା ବେଳେ ସେମାନେ ଆମର ଜଣେ ସମ୍ପର୍କୀୟ ମାମୁଙ୍କୁ ଅଭଦ୍ର ବ୍ୟବହାର କଲେ । ଏହାପରେ ଗଣ୍ଡଗୋଳ ବଢ଼ି ଯାଇଥିଲା । ରାତି ପ୍ରାୟ ୩ଟା ବେଳେ ବାହା ହେବାକୁ ଆସିଥିବା ମନୋଜ ଏସୟୁଭି ମଡ଼ାଇ ଦେବାରୁ ବରଯାତ୍ରୀଙ୍କୁ ପାଣି ଦେଉଥିବା ୯ ବର୍ଷର ପ୍ରାଂଶୁ (କନ୍ୟାର ଭାଇ) ମୃତ୍ୟୁ ଘଟିଥିଲା । ଏହି ଘଟଣାରେ ବିମଳା (୫୦), ମିଥିଳେଶ (୩୫), ସ୍ବପ୍ନା (୧୭) ମଧ୍ୟ ଆହତ ହୋଇଛନ୍ତି । ସେମାନଙ୍କୁ ଫାରୁଖାବାଦର ଲୋହିଆ ହସପିଟାଲରେ ଭର୍ତି କରାଯାଇଛି । ଏ ସମ୍ପର୍କରେ କନ୍ୟାର ବାପା ରାମପାଲ ଯାତଭ ଥାନାରେ ଏତଲା ଦେଇଛନ୍ତି । କାମାୟଗଞ୍ଜ ସର୍କଲ ଅଫିସର ରାଜବୀର ସିଂହ ଗୌର ଘଟଣାର ଅନୁସନ୍ଧାନ ଆରମ୍ଭ କରିଛନ୍ତି ।
Comments are closed.