ବ୍ରହ୍ମପୁର: କୁକୁଡ଼ାଖଣ୍ଡି ବ୍ଲକ୍ ସଦର ଥାନା ଅନ୍ତର୍ଗତ ନିମଖଣ୍ଡି ଗ୍ରାମରେ ଗୋଷ୍ଠୀ ସଂଘର୍ଷ ଘଟିଛି । ପୂର୍ବ ଶତ୍ରୁତାକୁ କେନ୍ଦ୍ରକରି ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଥିବା ଜଣାପଡିଛି । ଗତକାଲି ସଂନ୍ଧ୍ୟାରେ ପ୍ରାୟ ୧୫ ଜଣ ଯୁବକ ୮ ଟି ବାଇକରେ ଆସି ନିମଖଣ୍ଡି ଗ୍ରାମରେ ଆତଙ୍କରାଜ ଚଳାଇ ଥିଲେ । ବୁରିଗାଁର ବାବୁ ସାହୁ ବି.ଜଗନ୍ନାଥପୁର ଗ୍ରାମର ୧୫ ଜଣ ଯୁବକଙ୍କ ସହ ମିଳିତ ଭାବେ ନିମଖଣ୍ଡି ଗ୍ରାମ ମହାନ୍ତି ସାହିରେ କାଉଖତ ଗ୍ରାମର ବଳରାମର ମୋବାଇଲକୁ ଭଙ୍ଗାରୁଜା କରିବା ସହ ତାଙ୍କୁ ଆକ୍ରମଣ କରିଥିଲେ । ବଳରାମର ମାମୁ ନାରାୟଣ ଗୌଡ଼ ଆକ୍ରମଣକାରୀଙ୍କୁ ଅଟକାଇବା ସମୟରେ ସେ ମଧ୍ୟ ଆକ୍ରମଣର ଶିକାର ହୋଇଥିଲେ । ଆକ୍ରମଣକାରୀଙ୍କ ଖଣ୍ଡା ଦ୍ୱାରା ନାରାୟଣଙ୍କ ମୁଣ୍ଡ ଫାଟି ଯାଇଥିବା ଅଭିଯୋଗ ହୋଇଛି । ଆକ୍ରମଣକାରୀ ବାବୁ ଆଣିଥିବା ସ୍କୁଟି ଗାଡ଼ିକୁ ଗ୍ରାମବାସୀ ଭାଙ୍ଗିଦେଇଥିଲେ । ସ୍ଥାନୀୟ ଲୋକେ ଦୁର୍ବୃତ୍ତମାନଙ୍କୁ କାବୁ କରିବା ପାଇଁ ଚେଷ୍ଟା କରିଥିଲେ ମଧ୍ୟ ସେମାନେ ଫେରାର ହୋଇଯାଇଥିଲେ । ନାରାୟଣଙ୍କୁ ଗୁରୁତର ଅବସ୍ଥାରେ ଗ୍ରାମବାସୀ ଉଦ୍ଧାର କରି ବ୍ରହ୍ମପୁର ବଡ଼ ମେଡ଼ିକାଲରେ ଭର୍ତ୍ତି କରିଥିଲେ । ଘଟଣା ସଂପର୍କରେ ଥାନାରେ ଅଭିଯୋଗ ହେବା ପରେ ଅଭିଯୁକ୍ତମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ନିମଖଣ୍ଡି ଫାଣ୍ଡି ଅଧିକାରୀ କହିଛନ୍ତି ।
