ମାଟ୍ରିକ ଶ୍ରେଷ୍ଠଙ୍କୁ ୧ଲକ୍ଷ ଟଙ୍କା ଗୋପବନ୍ଧୁ ଛାତ୍ରବୃତ୍ତି ପ୍ରଦାନ

କଟକ: ଗତ ମାଟ୍ରିକ ପରୀକ୍ଷାରେ ରାଜ୍ୟରେ ପ୍ରଥମସ୍ଥାନ ଅଧିକାର କରିଥିବା କେନ୍ଦ୍ରାପଡ଼ା ଜିଲାର ଛାତ୍ର ହରିଶଚନ୍ଦନ ସାହୁଙ୍କୁ ଶୁକ୍ରବାର ଅପରାହ୍ଣରେ ଗୋପବନ୍ଧୁ ଭବନସ୍ଥିତ ‘ସମାଜ’ କାର୍ଯ୍ୟାଳୟରେ ସମ୍ବର୍ଦ୍ଧନା ପ୍ରଦାନ କରାଯାଇଛି। ଶ୍ରୀମାନ ସାହୁଙ୍କୁ ଗୋପବନ୍ଧୁ ଶିକ୍ଷା, ସ୍ୱାଭିମାନ ଓ ତ୍ୟାଗ ମେଧାବୃତ୍ତି ବାବଦରେ ୧ଲକ୍ଷ ଟଙ୍କାର ଚେକ ପ୍ରଦାନ କରାଯାଇଥିଲା। ସିଙ୍ଗାପୁରଠାରେ ରହୁଥିବା ପ୍ରବାସୀ ଓଡ଼ିଆ ଯୁବକ ସତ୍ୟ ସୂତାରଙ୍କ ଦ୍ୱାରା ଗତବର୍ଷଠାରୁ ଆରମ୍ଭ ହୋଇଥିବା ଏହି ପରମ୍ପରା ଅନୁସାରେ ୨୦୨୦-୨୧ ମାଟ୍ରିକ ପରୀକ୍ଷାରେ ସର୍ବୋଚ୍ଚ ନମ୍ବର ରଖି ଉତ୍ତୀର୍ଣ୍ଣ ହୋଇଥିବା ଶ୍ରୀମାନ ସାହୁଙ୍କୁ ଏହି ଅର୍ଥ ରାଶି ପ୍ରଦାନ କରାଯାଇଛି। ଏହି ଅବସରରେ ଗୋପବନ୍ଧୁ ଭବନରେ ଆୟୋଜିତ ସମ୍ବର୍ଦ୍ଧନା ସଭାରେ ‘ସମାଜ’ର ମୁଦ୍ରାକର ଓ ପ୍ରକାଶକ ନିରଞ୍ଜନ ରଥ ହରିଶଙ୍କ ଭଳି ଛାତ୍ର ସମସ୍ତଙ୍କ ପାଇଁ ଆଦର୍ଶ। ତାଙ୍କର ଅଦମ୍ୟ ଇଚ୍ଛାଶକ୍ତି ଓ ସାଧନା ଅନ୍ୟମାନଙ୍କ ପାଇଁ ଅନୁକରଣୀୟ ହେବା ଉଚିତ ବୋଲି କହିଥିଲେ।

‘ସମାଜ’ର ମୁଖ୍ୟ ପ୍ରଶାସନିକ ଅଧିକାରୀ ଡ. ପ୍ରଭାସଚନ୍ଦ୍ର ଆଚାର୍ଯ୍ୟ ସ୍ୱାଗତ ଭାଷଣ ଦେଇ ମେଧାବୀ ଛାତ୍ରଛାତ୍ରୀଙ୍କୁ ଏପରି ଉତ୍ସାହିତ କରିବା ଏକ ଆଦର୍ଶ ପରମ୍ପରା ବୋଲି ମତ ଦେଇଥିଲେ। ହରିଶ ସମ୍ବର୍ଦ୍ଧନା ଉତ୍ତରରେ ଗୋପବନ୍ଧୁ ତାଙ୍କର ପିଲାଟିବେଳୁ ଆଦର୍ଶ ରହିଆସିଛନ୍ତି। ତେଣୁ ଗୋପବନ୍ଧୁ ଭବନରେ ଏହି ସମ୍ମାନ ଗ୍ରହଣ କରିବା ତାଙ୍କ ପାଇଁ ସୌଭାଗ୍ୟର ବିଷୟ ବୋଲି କହିଥିଲେ। ‘ସମାଜ’ର କାର୍ଯ୍ୟକାରୀ ସମ୍ପାଦକ ସୁଶାନ୍ତକୁମାର ମହାନ୍ତି କୃତଜ୍ଞତା ଅର୍ପଣ କରିବା ପରିପ୍ରେକ୍ଷୀରେ ବିଦେଶରେ ରହି ମେଧାବୀ ଓଡ଼ିଆ ଛାତ୍ରଛାତ୍ରୀଙ୍କ କଥା ଚିନ୍ତା କରୁଥିବା ଶ୍ରୀ ସୂତାରଙ୍କୁ କୃତଜ୍ଞତା ଜଣାଇଥିଲେ।

Comments
Loading...