ଭୁବନେଶ୍ୱର: ଦେଶରେ ପଶୁ ସମ୍ପଦର ସୁରକ୍ଷା ପାଇଁ ଅଗ୍ରଣୀ ଟିକା ନିର୍ମାତା ଇଣ୍ଡିଆନ୍ ଇମ୍ୟୁନୋଲୋଜିକାଲ୍ସ ଲିମିଟେଡ ‘ଗୋଟ୍ ପକ୍ସ ଭାକ୍ସିନ୍’ର ଶୁଭାରମ୍ଭ କରିଛି । ଏହି ଟିକା ସହାୟତାରେ ଦେଶରେ ଛେଳିମାନଙ୍କୁ ଆକ୍ରାନ୍ତ କରୁଥିବା ଗୋଟ୍ ପକ୍ସ ରୋଗର ନିୟନ୍ତ୍ରଣ କରାଯାଇପାରିବ । ଏହା ଦ୍ୱାରା ଆମ ଦେଶରେ ପଶୁସମ୍ପଦ ପାଳନ ଉପରେ ନିର୍ଭରଶୀଳ ବ୍ୟକ୍ତିମାନେ ଅର୍ଥନୈତିକ ଭାବରେ ଲାଭବାନ ହୋଇପାରିବେ । ଏକ ଆକଳନ ଅନୁଯାୟୀ ଭାରତରେ ପ୍ରାୟ ୧୫୦ ନିୟୁତ ଛେଳି ରହିଛନ୍ତି ଓ ଏହି ରୋଗ ଏସିଆ, ଆଫ୍ରିକା, ମଧ୍ୟପ୍ରାଚ୍ୟର କେତେକ ସ୍ଥାନରେ ଦେଖାଯାଇଥାଏ । ଏହି ରୋଗ ବହୁ ମାତ୍ରାରେ ସଂକ୍ରାମକ ଓ ଏହା ଏରୋସୋଲ୍, ଯୋଗାଯୋଗ ଓ ବିଭିନ୍ନ ପ୍ରକାର ଭେକ୍ଟର ଯଥା ମାଛି ଆଦି ମାଧ୍ୟମରେ ବ୍ୟାପିଥାଏ । ଗୋଟ ପକ୍ସ ରୋଗେହେଲେ ୮୫% ପର୍ଯ୍ୟନ୍ତ ମୃତ୍ୟୁ ସମ୍ଭାବନା ରହିଥାଏ । ତେଣୁ ଏହାଦ୍ୱାରା କ୍ଷୁଦ୍ର ପଶୁ ବା ପଶୁସମ୍ପଦ ପାଳନକାରୀମାନଙ୍କୁ ବହୁତ କ୍ଷତି ସହିବାକୁ ହୋଇଥାଏ । ତେବେ ସଂପ୍ରତି ପ୍ରସ୍ତୁତ କରାଯାଇଥିବା ଏହି ଟିକାକୁ ଭେରୋ ସେଲ୍ କଲ୍ଚର ଅନୁସାରେ ବିକଶିତ କରାଯାଇଛି । ଭାରତ ସରକାରଙ୍କ କୃଷି ଗବେଷଣା ପରିଷଦ ପକ୍ଷରୁ ଏହାକୁ ସ୍ୱୀକୃତି ପ୍ରଦାନ ସହିତ ଏହାର ବାଣିଜ୍ୟିକ ଉତ୍ପାଦନକୁ ମଧ୍ୟ ପ୍ରାମାଣିତ କରାଯାଇଛି ବୋଲି ଆଇଆଇଏଲର ମ୍ୟାନେଜିଂ ଡାଇରେକ୍ଟର ଡା. କେ ଆନନ୍ଦ କୁମାର କହିଛନ୍ତି ।
Comments are closed.