ସାପ କାମୁଡ଼ାରେ ଯୁବତୀଙ୍କ ମୃତ୍ୟୁ

ପିପିଲି: ବିଷାକ୍ତ ସାପ କାମୁଡାରେ ମଙ୍ଗଳପୁର ନିକଟ ଠଣଠଣା ଅଞ୍ଚଳର ସୁମିତ୍ରା ଚଉଁରୀ(୨୫) ନାମ୍ନି ଯୁବତୀଙ୍କର ଅକାଳ ମୃତ୍ୟୁ ଘଟିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ସୁମିତ୍ରା ଏକ ଓଡ଼ିଆ ଖବର କାଗଜ ସଂସ୍ଥାରେ କପି ଏଡ଼ିଟର ଭାବେ କାର୍ଯ୍ୟ କରୁଥିଲେ।

ସୂଚନା ଅନୁସାରେ, ମଙ୍ଗଳପୁର ଅଞ୍ଚଳରେ ରହୁଥିବା ଠଣଠଣା ଗ୍ରାମର ଦିବ୍ୟାଙ୍ଗ ବ୍ୟକ୍ତି ମାଗା ଚଉଁରୀଙ୍କର ଏକମାତ୍ର କନ୍ୟା ସୁମିତ୍ରା(୨୫) ପୋଷାକ ଆଣିବାକୁ ଘର ମଧ୍ୟକୁ ଯିବା ସମୟରେ ଉକ୍ତ ଘର ମଧ୍ୟରେ ଥିବା ଏକ ନାଗସାପ ତାଙ୍କର ଡାହାଣ ଗୋଡ଼କୁ ଦଂଶନ କରିଥିଲା। ପରିବାର ଲୋକେ ତାଙ୍କୁ ତୁରନ୍ତ ମଙ୍ଗଳପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିବା ବେଳେ ସେଠାରେ ଆବଶ୍ୟକ ଚିକିତ୍ସା ପରେ ଅବସ୍ଥା ଅଧିକ ସଂକଟାପନ୍ନ ହେବାରୁ କ୍ୟାପିଟାଲ ହସପିଟାଲକୁ ସ୍ଥାନାନ୍ତର କରାଯାଇଥିଲା। ତେବେ ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କ ପରଲୋକ ଘଟିଥିଲା। ତାଙ୍କ ମୃତଦେହକୁ ଠଣଠଣା ଗ୍ରାମକୁ ଅଣାଯିବା ପରେ ଏକ ଶୋକାକୂଳ ପରିବେଶରେ ଗ୍ରାମ ଶ୍ମଶାନରେ ଶେଷକୃତ ସଂପନ୍ନ କରାଯାଇଥିଲା। ମୃତା ସୁମିତ୍ରାଙ୍କ ବାପା ଜଣେ ଦିବ୍ୟାଙ୍ଗ ବ୍ୟକ୍ତି ହୋଇଥିବା ବେଳେ ସେ ପରିବାରର ଏକମାତ୍ର ରୋଜଗାରକ୍ଷମ ଥିଲେ ଓ ପରିବାର ପ୍ରତିପୋଷଣ କରୁଥିଲେ। ସୁମିତ୍ରାଙ୍କ ବିୟୋଗରେ ତାଙ୍କ ପରିବାର ଲୋକେ ସଂପୂର୍ଣ୍ଣ ଭାଙ୍ଗି ପଡିଥିବା ବେଳେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ତାଙ୍କ ପରିବାରକୁ ତୁରନ୍ତ ସରକାରଙ୍କ ପକ୍ଷରୁ ଆର୍ଥିକ ସହାୟତା ପ୍ରଦାନ ପାଇଁ ଅଞ୍ଚଳବାସୀ ପ୍ରଶାସନ ନିକଟରେ ଦାବି କରିଛନ୍ତି।

Comments
Loading...