ସିଫାରେ କୃଷକ ଓ ବୈଜ୍ଞାନିକଙ୍କ ମଧ୍ୟରେ ଭାବ ବିନିମୟ କାର୍ଯ୍ୟକ୍ରମ

ପିପିଲି : କୌଶଲ୍ୟାଗଙ୍ଗ ସ୍ଥିତ କେନ୍ଦ୍ରୀୟ ମଧୁରଜଳ ଜୀବପାଳନ ଅନୁସନ୍ଧାନ ସଂସ୍ଥା(ସିଫା) ଓ ଖୋର୍ଦ୍ଧା କୃଷି ବିଜ୍ଞାନ କେନ୍ଦ୍ରର ମିଳିତ ସହଯୋଗରେ ପ୍ରାକୃତିକ କୃଷି ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଦାନ କରିଥିବା ଅଭିଭାଷଣର ସିଧାସଳଖ ପ୍ରସାରଣ ସିଫା ସ୍ଥିତ ଭି.ଜି.ଝିଙ୍ଗାରନ୍ ପ୍ରେକ୍ଷାଳୟରେ ଗୁରୁବାର ଅନୁଷ୍ଠିତ ହୋଇଯାଇଛି । ଏହି ଅବସରରେ ସେଠାରେ କୃଷକ ଓ କୃଷି ବୈଜ୍ଞାନିକଙ୍କ ମଧ୍ୟରେ ଭାବ ବିନିମୟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିରେ ଖୋର୍ଦ୍ଧା ଜିଲାର ବାଲିପାଟଣା, ବାଲିଅନ୍ତା ଓ ଜଟଣୀ ବ୍ଲକର ୨୧୦ ଜଣ ଅଗ୍ରଣୀ କୃଷକ ଯୋଗ ଦେଇଥିଲେ।
ଏହି ଅବସରରେ ଖୋର୍ଦ୍ଧା କୃଷି ବିଜ୍ଞାନ କେନ୍ଦ୍ରର ମୁଖ୍ୟ ତଥା ବରିଷ୍ଠ ବୈଜ୍ଞାନିକ ଅଜୟ କୁମାର ଦାଶ ସ୍ୱାଗତ ଭାଷଣ ପ୍ରଦାନ କରିଥିଲେ । ଅଂଶଗ୍ରହଣକାରୀ କୃଷକ ଓ ବୈଜ୍ଞାନିକମାନେ ପ୍ରଧାନମନ୍ତ୍ରୀ ଶ୍ରୀମୋଦୀଙ୍କର ପ୍ରାକୃତିକ କୃଷି ଉପରେ ଆଧାରିତ ବକ୍ତବ୍ୟ ଶୁଣିଥିଲେ । ପରେ କୃଷକ ଓ କୃଷି ବୈଜ୍ଞାନିକଙ୍କ ମଧ୍ୟରେ ଭାବ ବିନିମୟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ସିଫାର ନିର୍ଦ୍ଦେଶକ ଡ଼ଃ ସରୋଜ କୁମାର ସ୍ୱାଇଁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବରିଷ୍ଠ ବୈଜ୍ଞାନିକ ତଥା କେଭିକେ ମୁଖ୍ୟ ଅଜୟ କୁମାର ଦାଶ,  ଶସ୍ୟ ଉତ୍ପାଦନ ଏସ୍ଏମ୍ଏସ୍ ଏସ୍.କେ.ସିଂହ, ସିଟିଓ ପଶୁବିଜ୍ଞାନ ଡ଼ଃ ବି.କେ.ବଞ୍ଜା, ଏସ୍ଏମ୍ଏସ୍ ମତ୍ସ୍ୟବିଜ୍ଞାନ ପି.ଆର୍‍ ସାହୁ, ଏସ୍ଏମ୍ଏସ୍ ଗୃହବିଜ୍ଞାନ ଡ଼ଃ ହରପ୍ରିୟା ନାୟକ, ଏସିଟି ଓ ଗୃହବିଜ୍ଞାନ ଏସ୍.ବେହେରାଙ୍କ ସମେତ ଅଭିଜ୍ଞ ବୈଜ୍ଞାନିକ ଓ ବୈଷୟିକ ଅଧିକାରୀମାନେ ଯୋଗଦେଇ ପ୍ରାକୃତିକ କୃଷି ସଂପର୍କିତ କୃଷକଙ୍କର ବିଭିନ୍ନ ପ୍ରଶ୍ନର ଦେଇଥିଲେ ।