ବୋଲେରୋ-ଟ୍ରକ ମୁହାଁମୁହିଁ ଧକ୍କା, ୧ ମୃତ, ୧ ଗୁରୁତର

ଘସିପୁରା : କେନ୍ଦୁଝର ଜିଲ୍ଲା ରାମଚନ୍ଦ୍ରପୁର ଥାନା ଅନ୍ତର୍ଗତ ସାଇଁକୁଳ ଛକ ନିକଟରେ ରବିବାର ସକାଳ ସମୟରେ ଏକ ବୋଲେରୋ ସହ ଦଶଚକିଆ ଟ୍ରକର ମୁହାଁମୁହିଁ ଧକ୍କ। ହୋଇଛି। ଏହି ଦୁର୍ଘଟଣାରେ ଘଟଣାସ୍ଥଳରେ ହିଁ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟଜଣେ ଗୁରୁତର ହୋଇଛନ୍ତି । ସୂଚନାରୁ ଜଣାଯାଏ ଯେ, ଘଷିପୁରା ଅଞ୍ଚଳର ଏକ ବୋଲେରୋରେ ଜଣେ ରୋଗୀଙ୍କୁ ନେଇ କଟକ ବଡ଼ ମେଡ଼ିକାଲକୁ ଯାଉଥିଲା । ସେଠାରେ ଉକ୍ତ ରୋଗୀଙ୍କୁ ସୁରକ୍ଷିତରେ ଛାଡ଼ି ଫେରୁଥିବା ବେଳେ ସାଇଁକୁଳ ଛକ ନିକଟରେ କୌଣସି କାରଣରୁ ଗୋଟିଏ ଦଶଚକିଆ ଟ୍ରକକୁ ମୁହାଁମୁହିଁ ଧକ୍କା ଦେଇଥିଲା । ଫଳରେ ବୋଲେରୋଟି ସମ୍ପୂର୍ଣ୍ଣ ରୂପେ ଭାଙ୍ଗିଯାଇଥିବା ସହ ଗାଡ଼ି ମଧ୍ୟରେ ବସିଥିବା ସିଦ୍ଧାନ୍ତ ପାତ୍ର ନାମକ ଜଣେ ଯୁବକଙ୍କର ମୃତ୍ୟୁ ଘଟିଛି । ଏଥିସହ ବୋଲେରୋ ଚାଳକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆନନ୍ଦପୁର ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରାଯାଇଛି । ମୃତ ଯୁବକ ଜଣଙ୍କ ଘର ଘସିପୁରା ଅଞ୍ଚଳରେ ହୋଇଥିବାରୁ ଡାକ୍ତର ଖାନାରେ ସ୍ଥାନୀୟ ଲୋକଙ୍କ ଉତ୍ତେଜନା ଦେଖାଦେଇଛି । ଘଟଣାର ଖବର ପାଇଁ ପୋଲିସ ଘଟଣାସ୍ଥଳରେ ପହଞ୍ଚି ମୃତ ଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଥିବା ସହ ଉଭୟ ଗାଡିକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି ।

Comments
Loading...