ବ୍ରାହ୍ମଣୀଗାଁ ପଞ୍ଚାୟତରେ ମହିଳା ଗାଁ ସାଥୀ ଚୟନ

ଫୁଲବାଣୀ: ପଞ୍ଚାୟତରାଜ ଓ ପାନୀୟଜଳ ବିଭାଗ ପକ୍ଷରୁ ମହିଳାମାନଙ୍କୁ ସଶକ୍ତିକରଣ କରିବା ପାଇଁ ପ୍ରତ୍ୟେକ ରାଜସ୍ୱ ଗ୍ରାମରେ ମହିଳା ଗାଁ ସାଥୀ ମାନଙ୍କୁ ପଲ୍ଲୀସଭା ମାଧ୍ୟମରେ ଚୟନ କରାଯିବାର ନିର୍ଦ୍ଦେଶ ପ୍ରକାରେ ଆଜି ବ୍ରାହ୍ମଣୀଗାଁରେ ଏହି ଚୟନ କାର୍ଯ୍ୟ ଅନୁଷ୍ଠିତ ହୋଇଯାଇଛି। କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ପଞ୍ଚାୟତର ରାଜସ୍ୱ ଗ୍ରାମ ବ୍ରାହ୍ମଣୀଗାଁର ୬ ଗୋଟି ୱାର୍ଡରୁ ଦୁଇଜଣ ମହିଳା ଗାଁ ସାଥୀଙ୍କୁ ଚୟନ କରାଯାଇଛି। ସେମାନେ ହେଲେ ୬ନଂ ୱାର୍ଡର କ୍ଲାରା ନାୟକ ଏବଂ ୮ନଂ ୱାର୍ଡର ସଂଯୁକ୍ତା ପ୍ରଧାନ। ପ୍ରତ୍ୟେକ ୱାର୍ଡରୁ ୬ଜଣ ଆବେଦନକାରୀଙ୍କୁ ନୋଟିସ୍‍ କରାଯାଇ ସ୍ଥାନୀୟ ରାଜୀବଗାନ୍ଧୀ ସେବାକେନ୍ଦ୍ରଠାରେ ଶତାଧିକ ଗ୍ରାମବାସୀଙ୍କ ଉପସ୍ଥିତିରେ ଚୟନ କରାଯାଇଛି। ଆବେଦନକାରୀଙ୍କ ମଧ୍ୟରୁ ୩ ଜଣ ଅନୁପସ୍ଥିତ ଥିବା ବେଳେ ଅନ୍ୟଜଣେ ଦୀପାଳୀ ନାୟକ ସ୍ୱେଛାକୃତଭାବେ ଚୟନ ପ୍ରକ୍ରୀୟାରୁ ଓହରିଥିଲେ। ସ୍ଥାନୀୟ ସରପଞ୍ଚ ରମେଶ ମାଝୀଙ୍କ ଅଧ୍ୟକ୍ଷତାରେ ଏହି ଚୟନ କାର୍ଯ୍ୟକ୍ରମ କରାଯାଇଥିବା ବେଳେ ଉପାଧ୍ୟକ୍ଷ ରମାକାନ୍ତ ବଲ୍ୟାର ସିଂ, କାର୍ଯ୍ୟନିର୍ବାହୀ ଅଧିକାରୀ ଟାଇଟସ୍‍ ନାୟକ, ଜିଆରଏସ୍‍ ତ୍ରୀଲୋଚନ ପରିଛା ଓ ସ୍ୱେଛାସେବୀ ପ୍ରଶାନ୍ତ ନାୟକ, ଚିତ୍ରସେନ ପାତ୍ର, ମହିଳା ନେତ୍ରୀ ଆରତୀ ନାୟକଙ୍କ ସମେତ ୬ଗୋଟି ୱାର୍ଡରୁ ଶତାଧିକ ମହିଳା ପୁରୁଷ ଯୋଗ ଦେଇଥିଲେ। ଶେଷରେ ଶ୍ରୀ ନାୟକ ସମସ୍ଥଙ୍କୁ ଧନ୍ୟବାଦ ଅର୍ପଣ କରିଥିଲେ ଏବଂ ବ୍ରାହ୍ମଣୀଗାଁ ବ୍ୟତୀତ ପଞ୍ଚାୟର ଅନ୍ୟ ରାଜସ୍ୱ ଗ୍ରାମ ଅଲାଂଜୁରୀ, କିନାରୀଗାଁ, ପୋଇଗୁଡା ଆଦି ଗ୍ରାମରେ ମଧ୍ୟ ମହିଳା ଗାଁ ସାଥୀ ଚୟନ କରାଯାଇଥିବା ନେଇ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ନାୟକ ସୂଚନା ପ୍ରଦାନ କରିଛନ୍ତି।

Comments are closed.