ଗଞ୍ଜାମ: ଗଞ୍ଜାମ ଜିଲ୍ଲାର ଋଷିକୁଲ୍ୟା ମୁହାଁଣ ନିକଟରେ ବେଳାଭୂମିରେ ଅଲିଭରିଡ଼ଲେ କଇଁଛ ଅଣ୍ଡାଗୁଡିକରୁ ଛୁଆ ଫୁଟି ବର୍ତମାନ ସେହି ଛୁଆ ଗୁଡିକ ସ୍ୱତଃ ପ୍ରବୃତ ଭାବେ ସମୁଦ୍ରକୁ ଯାଉଥିବା ଦୃଶ୍ୟ ଦେଖିବାକୁ ମିଳିଛି । ଏହି ପ୍ରକ୍ରିୟା ପାଞ୍ଚ ଦିନ ଧରି ଚାଲିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି । ଲକ୍ଷାଧିକ କଇଁଛ ଛୁଆଙ୍କ ଏହି ବିରଳ ଦୃଶ୍ୟ ଦେଖିବା ପାଇଁ ପର୍ୟ୍ୟଟକ ମାନେ ଭିଡ଼ ହୋଇଥିବା ବେଳେ ସେହି ଅଞ୍ଚଳକୁ ଲୋକଙ୍କୁ ଯିବାକୁ ବାରଣ କରାଯାଇଛି । ବ୍ରହ୍ମପୁର ଡ଼ି ଏଫ ଓ ସହ ଯୋଗାଯୋଗ ବେଳେ ସେ କହିଛନ୍ତି , ବର୍ତମାନ ଛୁଆ ମାନେ ସମୁଦ୍ର ଅଭିମୁଖେ ଯାଉଛନ୍ତି । ଏଥିପାଇଁ ସୁରକ୍ଷା ବ୍ୟବସ୍ଥା ମଧ୍ୟ କଡାକଡୀ କରାଯାଇଛି । ସୂଚନା ଯୋଗ୍ୟ, ଗଞ୍ଜାମ ବ୍ଲକ ଅନ୍ତର୍ଗତପୁରୁଣା ବନ୍ଦ ନିକଟରେ ଥିବା ଋଷିକୁଲ୍ୟା ମୁହାଣ ବେଳାଭୂମି ଅଂଚଳରେ ଚଳିତ ବର୍ଷ ମାର୍ଚ୍ଚ ମାସର ଶେଷ ସପ୍ତାହରେ ବିରଳ ସାମୁଦ୍ରିକ କଇଁଛ ଅଲିଭ ରିଡେଲ ଗଣ ଅଣ୍ଡା ଦାନ ପ୍ରକ୍ରିୟା ହୋଇଥିଲା । ସେଥିରେ ପ୍ରାୟ ପାଞ୍ଚ ଲକ୍ଷ ପଚାଶ ହଜାର କଇଁଛ ଅଣ୍ଡା ଦେଇଥିଲେ । ଯାହାର ୪୫ରୁ ୫୦ଦିନ ମଧ୍ୟରେ ଅଣ୍ଡା ରୁ ଛୁଆ ଫୁଟିବା ସହ ଛୁଆ ବାହାରି ସମୁଦ୍ର ଅଭିମୁଖେ ଯାଉଛନ୍ତି । ଗତ କିଛି ଦିନ ତଳେ ବାତ୍ୟା ଆଶାନୀ ପ୍ରଭାବ ଯୋଗୁଁ ସମୁଦ୍ରର ଉଚ୍ଚ ଲହଡି ଫଳରେ କଇଁଛ ଅଣ୍ଡା ଗୁଡିକ କିଛି ମାତ୍ର ରେ ନଷ୍ଟ ହୋଇଥିବା ଦେଖିବାକୁ ମିଳିଥିଲା । ବର୍ତମାନ ବନ ବିଭାଗ ପକ୍ଷରୁ ତଦାରଖ କରାଯାଉଛି ବୋଲି ରମ୍ଭା ଫରେଷ୍ଟ ଅବିନାଶ ଚୌଧୁରୀଙ୍କ ଠାରୁ ସୂଚନା ମିଳିଛି ।
Comments are closed.