ବିନା ଭକ୍ତରେ ପୂଜା ପାଇଲେ ସିଦ୍ଧ ବିନାୟକ

ଗୋପାଳପୁର: ଆଜି ବିନାୟକ ଚତୁର୍ଥୀ, ବିଘ୍ନ ବିନାଶକ ଗଣେଶଙ୍କ ବେଶ ଧୂମଧାମରେ ଚାରିଆଡ଼େ ପୂଜାର୍ଚ୍ଚନା ହେବା କଥା କିନ୍ତୁ କରୋନା କଟକଣା ଯୋଗୁଁ ଏହା କେବଳ ଘରେ ଘରେ ପାଳିତ ହେଉଥିବା ବେଳେ ମନ୍ଦିର ମାନଙ୍କରେ ବିନା ଭକ୍ତରେ ପୂଜାର୍ଚ୍ଚନା ସମାହିତ ହୋଇଥିବା ଜଣାପଡିଛି। ଗଞ୍ଜାମ ଜିଲ୍ଲାର ପ୍ରସିଦ୍ଧ ତଥା ରଣ୍ଢା ପଞ୍ଚାୟତ ଅନ୍ତର୍ଗତ ପଞ୍ଚମାଠାରେ ଥିବା ସିଦ୍ଧ ବିନାୟକ ପିଠରେ ମଧ୍ୟ ପ୍ରଶାସନିକ କଟକଣା ଯୋଗୁଁ କେବଳ ପୂଜାରୀଙ୍କ ଦ୍ବାରା ଗଣେଶଙ୍କ ପୂଜାର୍ଚ୍ଚନା କରାଯାଇଛି।

ଏହି ପରିପ୍ରେକ୍ଷୀରେ ମନ୍ଦିର ପରିଚାଳନା କମିଟି ନିଷ୍ପତ୍ତି ଅନୁସାରେ ଭୋର ୪ଟାରେ ମନ୍ଦିର ପହଡ଼ ଖୋଲାଯିବା ସହ ପୂଜକଙ୍କ ଦ୍ୱାରା ରୀତିକାନ୍ତି କରାଯାଇ ପାଞ୍ଚଟା ୩୦ମିନଟରେ ମନ୍ଦିର ବନ୍ଦ ବନ୍ଦ କରାଯାଇ ମୁଖ୍ୟ ତାଲା ପକାଇ ଦିଆଯାଇଥିଲା। ଦକ୍ଷିଣ ଓଡିଶା ତଥା ଆନ୍ଧ୍ର ସୀମାନ୍ତରେ ପଞ୍ଚାମା ଗ୍ରାମରେ ସିଦ୍ଧ ବିନାୟକ ପୀଠ ଅବସ୍ଥିତ। ବହୁ ପୁରାତନ କାଳରୁ ଏହି ପୀଠରେ ଗଣେଶ ଚତୁର୍ଥୀ ଧୁମଧାମରେ ପାଳନ କରାଯାଉଥିଲା।

ବର୍ତ୍ତମାନ କରୋନା କଟକଣା ଯୋଗୁଁ ମନ୍ଦିର କମିଟି ଓ ସ୍ଥାନୀୟ ପ୍ରଶାସନ ତରଫରୁ ଜନସାଧାରଣଙ୍କ ପାଇଁ ଦର୍ଶନକୁ ସମ୍ପୂର୍ଣ୍ଣ ବାରଣ କରାଯାଇଥିବା ବେଳେ କେବଳ ପୂଜକଙ୍କୁ ନେଇ ଦେଵନୀତି କରାଯିବା ପାଇଁ ନିଷ୍ପତ୍ତି ନିଆଯାଇଥିଲା। ବିନା ଭକ୍ତରେ ମନ୍ଦିର ଖାଁ ଖାଁ ଲାଗୁଥିଲା। ମନ୍ଦିର ପ୍ରବେଶର ୧ କିଲୋମିଟର ପୂର୍ବରୁ ଉଭୟ ପଟ ରାସ୍ତାକୁ ପ୍ରଶାସନ ପକ୍ଷରୁ ସିଲ କରାଯିବା ସହ ଯାତାୟାତ ବନ୍ଦ ବ୍ୟବସ୍ଥା କରାଯାଇ ପୁଲିସ ଫୋର୍ସ ନିୟୋଜିତ କରାଯାଇଥିଲା। କନିସି ତହସିଲଦାର ତାପସ ରାଉତ, ଅତିରିକ୍ତ ତହସିଲଦାର ଦେବେନ୍ଦ୍ର କୁମାର ସାହୁ, ଗୋଳନ୍ଥରା ଥାନାଧିକାରୀ ବାବୁଲି ନାୟକ, ରଣ୍ଢl ସରପଞ୍ଚ ପ୍ରଦୀପ ସାହୁ ପ୍ରମୁଖ ମନ୍ଦିର ପରିଚାଳନା ଦାୟିତ୍ୱରେ ରହି ସହଯୋଗ କରିଥିଲେ।

ତଥାପି ଆଜି ସକାଳୁ ଅନେକ ଭକ୍ତ ପରିବାର ସହ ଗଣେଶଙ୍କ ଦର୍ଶନ ପାଇଁ ପହଞ୍ଚି ଥିଲେ ମଧ୍ୟ ପୁଲିସ୍ ପକ୍ଷରୁ ସେମାନଙ୍କୁ ରାସ୍ତାରେ ଅଟକାଯିବା ସହ ସଟଡାଉନ୍ ଘୋଷଣା ସତ୍ତ୍ୱେ ଘରୁ ବାହାରକୁ ବାହାରିଥିବା ଯୋଗୁଁ ତାଗିଦ୍ କରାଯାଇଥିବା ଦେଖିବାକୁ ମିଳିଥିଲା। ଅନ୍ୟ ପଟେ ପରିବାର ସହ ଗଣେଶଙ୍କ ଦର୍ଶନ ପାଇଁ ଭଗବାନଙ୍କ ଦର୍ଶନ ନମିଳିବାରୁ ନିରାଶାରେ ଫେରିଥିଲେ। ଅନ୍ୟପଟେ କିଛି ଭକ୍ତ କନିଷି ଏବଂ ଜୁଗୁଡି ଦେଇ ପଞ୍ଚମାକୁ ସଂଯୋଗ କରୁଥିବା ଚନ୍ଦନପୁର ନିକଟରେ ରାସ୍ତା ଉପରେ ଏକ ପଥର ରଖି ସେଥିରେ ସିନ୍ଦୁର ଚନ୍ଦନ ଲଗାଇ ପଞ୍ଚମା ଗଣେଷ ବୋଲି ଭ୍ରମ ସୃଷ୍ଟି କରି ମନ୍ଦିର ସମୁଖକୁ ଚାହିଁ ନଡ଼ିଆ, କଦଳୀ ଭୋଗ କରିବା ସହ ଦୀପ ଲଗାଉଥିବା ମଧ୍ୟ ଦେଖିବାକୁ ମିଳିଥିଲା।

Comments
Loading...