ଟ୍ରେନରେ କଟିଗଲେ ୪ ଗ୍ୟାଙ୍ଗମ୍ୟାନ
ଲକ୍ଷ୍ନୌ : ଉତ୍ତରପ୍ରଦେଶ ହରଦୋଇ ଜିଲାର ସାଣ୍ଡିଲା ଏବଂ ଉମରତାଲି ରେଳ ଷ୍ଟେସନ୍ ମଝି ରେଳ ପଥରେ ରବିବାର ଟ୍ରେନ୍ରେ କଟି ୪ ଜଣ ଗ୍ୟାଙ୍ଗମ୍ୟାନଙ୍କ ମୃତ୍ୟୁ ଘଟିଛି। ଗ୍ୟାଙ୍ଗମ୍ୟାନମାନେ ରେଳ ଧାରଣା ମରାମତି କରୁଥିବାବେଳେ ଦୁର୍ଘଟଣାର ଶିକାର ହୋଇଥିବା ଜାଣିବାକୁ ମିଳିଛି।
ସୂଚନା ଅନୁସାରେ ରବିବାର ମଧ୍ୟାହ୍ଣ ପ୍ରାୟ ୧୨ଟା ସମୟରେ ୪ ଜଣ ଗ୍ୟାଙ୍ଗମ୍ୟାନ ସାଣ୍ଡିଲା- ଉମରତାଲି ରେଳ ଧାରଣା ମରାମତି କରୁଥିଲେ। ସେହି ସମୟରେ ଅକାଲ ତଖ୍ତ ଏକ୍ସପ୍ରେସ୍ ଦ୍ରୁତଗତିରେ ଆସି ସେମାନଙ୍କ ଉପରେ ମାଡ଼ି ଯାଇଥିଲା। ଏହି ଘଟଣାରେ ରେଳ ବିଭାଗର ବଡ଼ ଅବହେଳା ସାମ୍ନାକୁ ଆସିଛି। ଘଟଣାର ତଦନ୍ତ ନିର୍ଦେଶ ଦିଆଯାଇଛି। ରେଲୱେ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ପ୍ରତ୍ୟକ୍ଷଦର୍ଶୀ ଓ ଅନ୍ୟ ଗ୍ୟାଙ୍ଗମ୍ୟାନଙ୍କ କହିବା ଅନୁସାରେ ଗ୍ୟାଙ୍ଗମ୍ୟାନମାନେ ରେଳ ଧାରଣାରେ କାମ କରୁଥିବାବେଳେ ପଥକୁ ବନ୍ଦ (ବ୍ଲକ୍) କରାଯାଇନଥିଲା । ରେଳ ପଥ ନିକଟରେ କୌଣସି ପତାକା ଟଙ୍ଗା ଯାଇନଥିବାରୁ ଟ୍ରେନ୍ ଚାଳକ ହର୍ଣ୍ଣ ବଜାଇ ନଥିଲେ । ଫଳରେ ଧାରଣାରେ କାମ କରୁଥିବା ଗ୍ୟାଙ୍ଗମାନ ଟ୍ରେନ୍ ଆସୁଥିବା ଜାଣିପାରିନଥିଲେ । ଟ୍ରେନ୍ ଅତି ନିକଟରେ ପହଞ୍ଚିବା ପରେ କିଛି ଗ୍ୟାଙ୍ଗମ୍ୟାନ ରେଳ ଧାରଣାରୁ ବାହାରକୁ ଡେଇଁ ଜୀବନ ବଞ୍ଚାଇଥିଲେ । ହେଲେ ୪ ଜଣ ଗ୍ୟାଙ୍ଗମ୍ୟାନ ଟ୍ରେନରେ କଟିଯାଇଥିଲେ । ଦୁର୍ଘଟଣା ସମୟରେ ସେଠାରେ ପ୍ରାୟ ୮ରୁ ୧୦ ଜଣ ଗ୍ୟାଙ୍ଗମ୍ୟାନ କାମ କରୁଥିଲେ ବୋଲି କୁହାଯାଉଛି ।