ଭୁବନେଶ୍ବର : କରୋନା ମହାମାରୀ ଦ୍ଵାରା ଶିକ୍ଷା ବ୍ୟବସ୍ଥା ବହୁଳ ଭାବେ କ୍ଷତିଗ୍ରସ୍ତ ହୋଇଛି। ଏହି ପରିପ୍ରେକ୍ଷୀରେ ରାଜ୍ୟ ସମେତ ସାରା ଦେଶରେ ଆର୍ଥିକ ମାନ୍ଦା ଅବସ୍ଥା ଦେଖା ଦେଇଅଛି । ଅଭିଭାବକ ଓ ଛାତ୍ରଛାତ୍ରୀମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ରାଜ୍ୟରେ ଥିବା ସମସ୍ତ ଶିକ୍ଷାନୁଷ୍ଠାନକୁ ମାର୍ଚ୍ଚରୁ ଜୁନ୍ (ଚାରିମାସ) ଫି-ଛାଡ କରିବା ସହ ଫି ଦାଖଲ ଅବଧିକୁ ଅନ୍ୟୁନ ଛଅମାସ ବୃଦ୍ଧି କରିବା ପାଇଁ ଛାତ୍ର କଂଗ୍ରେସର ରାଜ୍ୟ ସମନ୍ବୟ କମିଟି ସଦସ୍ୟ ନିରଞ୍ଜନ ଦାସ ଦାବି କରିଛନ୍ତି ।
ଏହି ପ୍ରସଙ୍ଗକୁ ନେଇ କେନ୍ଦ୍ର ମାନବ ସମ୍ବଳ ମନ୍ତ୍ରୀ (ଭାରତ ସରକାର) ଓ ମୁଖ୍ୟମନ୍ତ୍ରୀ (ଓଡ଼ିଶା ସରକାର), ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ, ଉଚ୍ଚଶିକ୍ଷା ମନ୍ତ୍ରୀଙ୍କୁ ଛାତ୍ର କଂଗ୍ରେସର ଦାବିପତ୍ର ଦିଆଯାଇଛି । ଓଡ଼ିଶା ଏକ ଗରିବ ରାଜ୍ୟ ହୋଇଥିବାରୁ ଏଠାରେ ଅଧିକାଂଶ ଅଭିଭାବକ ଉଠାଦୋକାନୀ, ଦିନ ମଜୁରିଆ, କ୍ଷୁଦ୍ର ବ୍ୟବସାୟୀ ଭାବେ କାମ କରିଥାନ୍ତି । ଲକ୍-ଡାଉନ୍ କଟକଣାରେ ଜୀବନ ଜୀବିକା ପ୍ରଭାବିତ ହୋଇଥିବାରୁ ଫି ଦାଖଲ କରିବାରେ ସେମାନେ ଅସମର୍ଥ । ଏହି ଦିଗରେ ରାଜ୍ୟ ଓ କେନ୍ଦ୍ର ସରକାର ଯଦି ସାତଦିନ ଭିତରେ କୌଣସି ପଦକ୍ଷେପ ନ ନିଅନ୍ତି, ଏହି ପ୍ରସଙ୍ଗକୁ ନେଇ ଛାତ୍ରଛାତ୍ରମାନଙ୍କ ସ୍ବାର୍ଥକୁ ଦୃଷ୍ଟିରେ ରଖ୍ ଛାତ୍ର କଂଗ୍ରେସ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଆପଣେଇବ ବୋଲି ଛାତ୍ର କଂଗ୍ରେସ ଜଣାଇଛି ।
Comments are closed.