ଶ୍ରୀନଗର : ଜାମ୍ମୁ କାଶ୍ମୀରର ଜାମ୍ମୁ ଡିଭିଜନ୍ ଅନ୍ତର୍ଗତ ରମ୍ବନ ଜିଲ୍ଲାରେ ଏକ ସଡ଼କ ଦୁର୍ଘଟଣାରେ ୪ ଜଣଙ୍କର ମୃତ୍ୟୁ ଘଟିଛି। ଜାମ୍ମୁ-ଶ୍ରୀନଗର ଜାତୀୟ ରାଜପଥରେ ଯାଉଥିବା ଏକ କାର୍ ସଡ଼କ ତଳକୁ ଖସି ପଡ଼ିବାରୁ ଏହି ଦୁର୍ଘଟଣା ଘଟିଛି। ସମ୍ପୃକ୍ତ ରାଜପଥର ଖୁନି-ନାଲ୍ଲାଃ ନିକଟରେ କାର୍ ଚାଳକ ଜଣକ ନିଜର ନିୟନ୍ତ୍ରଣ ହରାଇବା ଫଳରେ ଏଭଳି ଦୁର୍ଘଟଣା ଘଟିଛି ବୋଲି ରମ୍ବନ୍ର ବରିଷ୍ଠ ପୁଲିସ୍ ଅଧିକ୍ଷକ ପି.ଡି. ନିତ୍ୟା ସୂଚନା ଦେଇଛନ୍ତି।
ସେ କହିଛନ୍ତି, ଏହି କାରଟି ଜାତୀୟ ରାଜପଥରୁ ୫୦୦ ଫୁଟ୍ ତଳକୁ ବିସଲାରୀ ଜଳପ୍ରପାତ ମଧ୍ୟକୁ ଖସି ପଡ଼ିଥିଲା। ପୁଲିସ୍, ସେନା ଏବଂ ସ୍ଥାନୀୟ ସ୍ୱେଚ୍ଛାସେବୀ ଉଦ୍ଧାର କାର୍ଯ୍ୟରେ ଲାଗିଥିଲେ ବୋଲି ସେ କହିଛନ୍ତି। ଘଟଣା ସ୍ଥଳରେ ଜଣେ ମହିଳାଙ୍କ ସମେତ ୪ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇ ଜଣ ଗୁରୁତର ଆହତଙ୍କୁ ରମ୍ବନ୍ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଛି। ତେବେ କାରରେ ଥିବା ଯାତ୍ରୀମାନଙ୍କ ମଧ୍ୟରୁ ଜଣେ ନିଖୋଜ ଅଛନ୍ତି ବୋଲି ଏସ୍.ଏସ୍.ପି. ଶ୍ରୀ ନିତ୍ୟା କହିଛନ୍ତି। ଜାମ୍ମୁ କାଶ୍ମୀର ଉପରାଜ୍ୟପାଳ ମନୋଜ ସିଂହ୍ନା ଏହି ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି। ଏଥିସହିତ ଦୁର୍ଘଟଣାର କାରଣ ଏବଂ ସଡ଼କ ସୁରକ୍ଷା ଦିଗରେ ସମ୍ପୃକ୍ତ ସ୍ଥାନରେ ନିଆ ଯାଉଥିବା ବିଭିନ୍ନ ପଦକ୍ଷେପ ସମ୍ପର୍କରେ ଏକ ସପ୍ତାହ ମଧ୍ୟରେ ରିପୋର୍ଟ ଦେବାକୁ ବିଭାଗୀୟ ଅଧିକାରଙ୍କୁ ନିର୍ଦ୍ଦେଶ ଦେଇଛନ୍ତି
Comments are closed.