ବିପୁଳ ପରିମାଣର ଚୋରା ମଦ ସହ କାର୍‍ ଜବତ,୨ ଗିରଫ

ପାଟଣାଗଡ : କୋଭିଡ-୧୯ ଅବସରରେ ଚାଲିଥିବା ବିଭିନ୍ନ କଟକଣାର ସୁଯୋଗ ନେଇ ଦେଶୀ ଏବଂ ବିଦେଶୀ ଚୋରା ମଦ ବେପାରୀ ବେଶ୍‍ ସକ୍ରିୟ ହୋଇପଡିଥିବା ବେଳେ ଗୁରୁବାର ବିଳମ୍ବିତ ରାତିରେ ବିପୁଳ ପରିମାଣର ଚୋରା ବିଦେଶୀ ମଦ ସହ ୨ ଜଣ ବେପାରୀ ପାଟଣାଗଡ ପୁଲିସ ହାତରେ ଧରାପଡିଥିବା ଜଣାଯାଇଛି। ଏକ କାରରେ ସେମାନେ ଚାଲାଣ କରୁଥିବା ୩୫ ପେଟି ବିଦେଶୀ ମଦ(୩୯୯ ଲିଟର) ସହ କାରଟିକୁ ପୁଲିସ ଜବତ କରିଥିବା ସହ ୨ ଜଣ ଅଭିଯୁକ୍ତ ଛେଲିଆ ବେହେରା ଏବଂ ବିମଲେଶ ଯାଦବଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଉପଖଣ୍ଡ ପୁଲିସ ଅଧିକାରୀ ସୁରେଶ ଚନ୍ଦ୍ର ନାଏକ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି।
ପ୍ରକାଶ ଯେ, ଗତକାଲି ବିଳମ୍ବିତ ରାତିରେ ପେଟ୍ରୋଲିଂ କରୁଥିବା ବେଳେ ପାଟଣାଗଡ ଥାନାଧିକାରୀ ଏବଂ ସହଯୋଗୀ ସନ୍ଦେହଜନକ ଭାବରେ ଯାଉଥିବା ଏକ ମାରୁତି ୱାଗନର କାରକୁ ପାଟଣାଗଡ- ଘସିଏନ ରାସ୍ତାର ବରପଦର ପୋଲ ନିକଟରେ ଅଟକାଇଥିଲେ। ସେଥିରେ ବିଭିନ୍ନ ବ୍ରାଣ୍ଡର ୩୩ ପେଟି ମଦ ବୋଝେଇ ହୋଇ ଘସିଏନ ପଟକୁ ଯାଉଥିବା ଜାଣିବାକୁ ପାଇଥିଲେ। ଗାଡିଚାଳକ ତଥା ଗାଡିର ମାଲିକ ଆଗଲପୁର ଅଞ୍ଚଳ ଅନ୍ତର୍ଗତ ନଅଗାଁର ଛେଲିଆ ବେହେରା ଏବଂ ଝାଡଖଣ୍ଡ ରାଜ୍ୟର ମୂଳ ନିବାସୀ ତଥା ସ୍ଥାନୀୟ ଅଞ୍ଚଳରେ ରହି ମଦ ବେପାର ସହ ସଂପକ୍ତ ଥିବା ବିମଲେଶ ଯାଦବ ଉଭୟେ ବିଦେଶୀ ମଦ ଚାଲଣ ସଂପର୍କରେ ସନ୍ତୋଷଜନକ ଉତ୍ତର ଦେଇ ପାରି ନଥିଲେ। ସେମାନଙ୍କୁ ଧରିଆଣି ପଚରା ଉଚୁରା କରାଯିବା ପରେ ସେହି ମଦ ବେଆଇନ ଭାବରେ ଚୋରା ଚାଲାଣ ହେଉଥିବା ପୁଲିସ ଜାଣିବାକୁ ପାଇବା ପରେ ଏ ସଂକ୍ରାନ୍ତରେ ପାଟଣାଗଡ ଥାନାରେ ଏକ ମାମଲା ରୁଜୁ କରି ଉଭୟଙ୍କୁ କୋର୍ଟ ଚାଲାଣ କରିଥିବା ଜଣାଯାଇଛି। ସେମାନଙ୍କ ନିକଟରୁ ୮ ହଜାର ୧୦୦ ଟଙ୍କା ମଧ୍ୟ ପୁଲିସ ଜବତ କରିଥବା ଜଣାଯାଇଛି। ତେବେ ଏହି ମଦ କେଉଁଠାରୁ କେଉଁଠିକି ଯାଉଥିଲା ସେ ସଂପର୍କରେ ପଚାରାଯିବାରୁ ତାହା ଅଧିକ ତଦନ୍ତ ପରେ ଜଣାପଡିବ ବୋଲି ଉପଖଣ୍ଡ ପୁଲିସ ଅଧିକାରୀ ଶ୍ରୀ ନାଏକ ସୂଚନା ଦେଇଛନ୍ତି। ଗାଡି ଏବଂ ମଦକୁ ପୁଲିସ ଜବତ କରିଥିବା ବେଳେ ଜବତ ମଦର ଆନୁମାନିକ ମୂଲ୍ୟ ହାରାହାରି ଦେଢ ଲକ୍ଷରୁ ଊର୍ଦ୍ଧ୍ବ ଟଙ୍କା ହେବ ବୋଲି କୁହାଯାଇଛି।

Comments
Loading...