ମାଲାମାଲ ହେଲେ ମତ୍ସ୍ୟଜୀବୀ ; ଜାଲରେ ଫସିଲେ କୋଟିଏ ଟଙ୍କାର ମାଛ

0

ଅହମଦାବାଦ୍: ‘ଉପରୱାଲା ଯବ ଦେତା ହୈ ଛପର ଫାଡକେ ଦେତା ହୈ’ ଏହି ଉକ୍ତିଟି ସତ୍ୟ ପ୍ରମାଣ କରିଛି ଗୁଜୁରାଟର ଏକ ଘଟଣା । ଏକ ପ୍ରକାରର ସାମୁଦ୍ରିକ ମାଛ ୮ ଜଣ ମତ୍ସ୍ୟଜୀବୀଙ୍କୁ ରାତାରାତି କୋଟିପତି କରି ଦେଇଛି । ଏହି ସାମୁଦ୍ରିକ ମାଛକୁ ସ୍ଥାନୀୟ ଅଞ୍ଚଳରେ ଘୋଲ ମାଛ ବୋଲି କୁହାଯାଏ । ଗୋଟିଏ ରାତିରେ ସେମାନେ ୧.୧୦ କୋଟି ଟଙ୍କାର ମାଛ ଧରିଛନ୍ତି ।

ଆରବସାଗର ଏକ ସ୍ଥାନକୁ ଗୁଜୁରାଟ ଓ ମହାରାଷ୍ଟ୍ରର ମତ୍ସ୍ୟଜୀବୀମାନେ ମାଛ ଧରିବାକୁ ଯାଆନ୍ତି । ସବୁ ଦିନ ଭଳି ଏଥର ମଧ୍ୟ ଜାଫରାବାଦର କାନଜିଭାଇ ପୋଲଭାଇ ବାରେୟା ନିଜ ୮ ଜଣ ସାଥୀଙ୍କ ସହ ମାଛ ଧରିବାକୁ ରାମପ୍ରସାଦ ନାମକ ଏକ ବୋଟରେ ସମୁଦ୍ରକୁ ଯାଇଥିଲେ । ସମୁଦ୍ର ମଧ୍ୟରେ ୪୨ ନଟିକାଲ ମାଇଲ ଦୂରରେ ମାଛ ଧରିବା ପାଇଁ ଏହି ମତ୍ସ୍ୟଜୀବୀମାନେ ୪ଟି ଜାଲ ପକାଇଥିଲେ । ସେଥିମଧ୍ୟରୁ ଗୋଟିଏ ଜାଲରେ ସାମୁଦ୍ରିକ ମାଛ ଘୋଲ ଫସିଥିଲା । ଗୋଟିଏ କି ଦୁଇଟି ନୁହେଁ ପ୍ରାୟ ୧୧୦୧ଟି ଘୋଲ ମାଛ(ସ୍ଲିମ ଫିସ୍) ଜାଲରେ ଫସି ଥିଲେ । ଯାହାର ମୂଲ୍ୟ ହେଉଛ ୧.୧୦ କୋଟି ଅର୍ଥାତ୍ ଏକ କୋଟି ୧୦ ଲକ୍ଷ ଟଙ୍କା । ପ୍ରାୟ ୨୦ ବର୍ଷ ପରେ ସେଠାରେ ପ୍ରଥମ ଥର ଏଭଳି ଘଟଣା ଘଟିଛି । ଯାହା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।

ଗୋଟିଏ ଘୋଲ ମାଛର ଓଜନ ହେଉଛି ୮ କେଜି । ଏହା କେଜି ପ୍ରତି ୨୫୦ ରୁ ୩୦୦ ଟଙ୍କା ମଧ୍ୟରେ ବିକ୍ରି କରାଯାଏ । ହେଲେ ବିଦେଶରେ ଏହି ମାଛର ଚାହିଦା ଅଧିକ । ଏହି ମାଛର ଲିଭର ବିଦେଶକୁ ରପ୍ତାନି କରାଯାଏ । କାରଣ ଶଲ୍ୟ ଚିକିତ୍ସା ବେ​‌ଳେ ବ୍ୟବହୃତ ହେଉଥିବା ସୂତାରେ ଏହାକୁ ପ୍ରୟୋଗ କରାଯାଏ । ତେଣୁ ବିଦେଶର ଏହି ମାଛର ମୂଲ୍ୟ ଅଧିକ ।

Comments
Loading...