କୋର୍ଟରେ ୨ ଅଭିଯୁକ୍ତଙ୍କୁ ଗୁଳି କରି ହତ୍ୟା, ଜୀବନ ବଞ୍ଚାଇ ଦୌଡ଼ି ପଳାଇଲେ ବିଚାରପତି

ଲକ୍ଷ୍ନୌ: ଉତ୍ତରପ୍ରଦେଶର ବିଜନୌରରେ ଥିବା ମୁଖ୍ୟ ବିଚାର ବିଭାଗୀୟ କୋର୍ଟରେ ମଙ୍ଗଳବାର ଗୁଳିକାଣ୍ଡ ଘଟିଛି। କୋର୍ଟ​‌ରେ ହାଜର ପାଇଁ ଆସିଥିବା ୨ ଅଭିଯୁକ୍ତଙ୍କୁ ଶାର୍ପ ଶୁଟର୍‌ ଗୁଳି କରି ହତ୍ୟା କରିଛନ୍ତି। କୋର୍ଟ ରୁମ୍‌ ପରିସରରେ ଏଭଳି ଘଟଣା ଦେଶବ୍ୟାପୀ ଚାଞ୍ଚଲ୍ୟ ଖେଳାଇ ଦେଇଛି। ପୁଲିସ ଶାର୍ପ ଶୁଟରମାନଙ୍କୁ କୋର୍ଟ ପରିସରରେ କାବୁ କରିନେବା ସହିତ କୋର୍ଟକୁ ସମ୍ପୂର୍ଣ୍ଣ ଭାବେ ସିଲ୍‌ କରିଦେଇଛି। ଏପରି କି ଗୁଳିକାଣ୍ଡ ସମୟରେ ବିଚାରପତି ଭୟଭୀତ ହୋଇ ନିଜ ଜୀବନ ବଞ୍ଚାଇ ଦୌଡ଼ି ପଳାଇଥିଲେ।

ସୂଚନା ଅନୁସାରେ, ଗତ ମେ ୨୮ରେ ଜଣେ ବିଲ୍ଡର ହାଜୀ ଅହସାନ ଏବଂ ତାଙ୍କ ଭଣଜା ଶାଦାବଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ମାମଲାରେ କନକପୁର ନିବାସୀ ଶୁଟର୍‌ ଦାନିଶ ସହିତ ଅନେକ ଅଭିଯୁକ୍ତଙ୍କୁ ପୁଲିସ ଗିରଫ କରିଛି। ଦିଲ୍ଲୀ ପୁଲିସ ହତ୍ୟାକାରୀ ଗ୍ୟାଙ୍ଗର ମୁଖ୍ୟ ତଥା ଶୁଟର ଅବଦୁଲ ଜବ୍ବାର ଓ ଶାହାନୱାଜକୁ ଗିରଫ କରିଥିଲା। ଏହି ହତ୍ୟାକାଣ୍ଡରେ ପୁଲିସ ନଜୀବାବାଦର ଉବ୍ବନୱାଲା ଗାଁର ଶୁଟର ଇକରାର, ଅଫଜାଲ, ଆସିଫ, ଅସଲମ ଏବଂ ଇରଶାଦକୁ ମଧ୍ୟ ଗିରଫ କରିଥିଲା।

ମଙ୍ଗଳବାର ମୁଖ୍ୟ ବିଚାର ବିଭାଗୀୟ କୋର୍ଟରେ ୩ ଅଭିଯୁକ୍ତଙ୍କୁ ହାଜର କରିବା ଲାଗି ପୁଲିସ ଆଣିଥିଲା। କିନ୍ତୁ ଅଭିଯୁକ୍ତମାନଙ୍କୁ ହତ୍ୟା କରିବା ଲାଗି ପୂର୍ବରୁ ଶାର୍ପ ଶୁଟରମାନେ ଉପସ୍ଥିତ ଥିଲେ। ଅଭିଯୁକ୍ତମାନେ କୋର୍ଟକୁ ଆସିବା କ୍ଷଣି ଶାର୍ପ ଶୁଟରମାନେ ସେମାନଙ୍କୁ ଗୁଳି କରିଥିଲେ। ଶାର୍ପ ଶୁଟରମାନେ ପାଖାପାଖି ୨୦ ରାଉଣ୍ଡୁ ଗୁଳି ଚଳାଇଥିଲେ। ଗୁଳି ଶବ୍ଦ ଶୁଣି କୋର୍ଟ ପରିସରରେ ଆତଙ୍କର ବାତାବରଣ ସୃଷ୍ଟି ହୋଇଥିଲେ। ଲୋକମାନେ ଭୟରେ ଏତେତେଣେ ଦୌଡ଼ିଥିଲେ। ଗୁଳିକାଣ୍ଡରେ ଅଭିଯୁକ୍ତ ଶହନୱାଜ ଏବଂ ଅବଦୁଲ ଜବ୍ବାରର ମୃତ୍ୟୁ ଘଟିଛି। ଅନ୍ୟତମ ଅଭିଯୁକ୍ତ ଦାନିଶର ମୃତ୍ୟୁ ସମ୍ପର୍କରେ କିଛି ସୂଚନା ମିଳିନାହିଁ।