ନୂଆଦିଲ୍ଲୀ: କେନ୍ଦ୍ର ସରକାରଙ୍କ ନୂଆ କୃଷି ଆଇନ ବିରୋଧରେ ୨୦୨୪ ମେ ମାସ ପର୍ଯ୍ୟନ୍ତ ଆନ୍ଦୋଳନ ଜାରି ରଖିବାକୁ କୃଷକମାନେ ପ୍ରସ୍ତୁତ ଅଛନ୍ତି। ରବିବାର ଏପରି ମନ୍ତବ୍ୟ ଦେଇଛନ୍ତି ଭାରତୀୟ କୃଷକ ସଂଘ ନେତା ରାକେଶ ଟିକାୟତ। ସେ କହିଛନ୍ତି, ଦିଲ୍ଲୀ ସୀମାରେ ଚାଲିଥିବା କୃଷକ ଆନ୍ଦୋଳନ ଏକ ‘ବୈଚାରିକ କ୍ରାନ୍ତି’।
ନାଗପୁରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଟିକାୟତ କହିଥିଲେ ଯେ, ସେ ସର୍ବନିମ୍ନ ସହାୟକ ମୂଲ୍ୟ (ଏମଏସପି)କୁ ନେଇ ଆଇନଗତ ଗ୍ୟାରେଣ୍ଟି ଚାହୁଁଛନ୍ତି। ଏହି ବୈଚାରିକ କ୍ରାନ୍ତି ବିଫଳ ହେବ ନାହିଁ। ଗାଁରେ ଚାଷୀମାନେ ଚାହୁଁଛନ୍ତି ଯେ ଆମେ ସେପର୍ଯ୍ୟନ୍ତ ଘରକୁ ନ ଫେରୁ, ଯେପର୍ଯ୍ୟନ୍ତ ୩ଟି ଯାକ ଆଇନ ପ୍ରତ୍ୟାହାର ନ ହୋଇଛି। ସରକାର ଦାବି ପୂରଣ ନ କରିବା ଲାଗି ନିଜ ଜିଦରେ ଅଟଳ ଅଛନ୍ତି। ତେଣୁ ଆନ୍ଦୋଳନ ଦୀର୍ଘ ସମୟ ପର୍ଯ୍ୟନ୍ତ ଚାଲୁ ରହିବ।
ସୂଚନାଯୋଗ୍ୟ, କୃଷି ଆଇନ ବିରୋଧରେ ଗତ ନଭେମ୍ବର ୨୬ରୁ ଦିଲ୍ଲୀର ବିଭିନ୍ନ ସୀମାରେ ଚାଷୀମାନେ ବିକ୍ଷୋଭ ପ୍ରଦର୍ଶନ କରିବା ସହିତ ଧାରଣା ଦେଇଛନ୍ତି। କେନ୍ଦ୍ର ସରକାର ୩ଟି ଯାକ ଆଇନ ପ୍ରତ୍ୟାହାର ନ କରିବା ଯାଏ ସେମାନେ ଧାରଣା ସ୍ଥଳରୁ ହଟିବେ ନାହିଁ ବୋଲି ଚେତାବନୀ ଦେଇଛନ୍ତି।
Comments are closed.