ଦିଲ୍ଲୀ ସୀମାରେ ଆନ୍ଦୋଳନରତ କୃଷକମାନଙ୍କୁ ସରକାରଙ୍କ ପକ୍ଷରୁ ଆଲୋଚନା ପାଇଁ ଦିଆଯାଇଥିବା ପ୍ରସ୍ତାବ ୪୦ଟି କୃଷକ ସଂଗଠନକୁ ନେଇ ଗଠିତ ସଂଯୁକ୍ତ କିସାନ ମୋର୍ଚ୍ଚା ଗ୍ରହଣ କରିଛି। କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟକୁ ଚିଠି ଲେଖି ଡିସେମ୍ବର ୩୦ରେ ଆଲୋଚନା ପାଇଁ କେନ୍ଦ୍ରର ପ୍ରସ୍ତାବକୁ ଗ୍ରହଣ କରିଥିବା ସଂଗଠନ ଜଣାଇଛି। କୃଷି ମନ୍ତ୍ରଣାଳୟ ସଚିବ ସଞ୍ଜୟ ଅଗ୍ରୱାଲଙ୍କୁ ଏକ ଚିଠିରେ ଏକ ମାସରୁ ଅଧିକ ସମୟ ଧରି କେନ୍ଦ୍ରର ନୂତନ କୃଷି ଆଇନକୁ ବିରୋଧ କରୁଥିବା କୃଷକ ସଂଗଠନ ୪ ସୂତ୍ରୀ ପ୍ରସଙ୍ଗ ଦୋହରାଇଛନ୍ତି।
ଏହି ଦାବିଗୁଡିକ ମଧ୍ୟରେ କୃଷି ଆଇନ ପ୍ରତ୍ୟାହାର, ସର୍ବନିମ୍ନ ସହାୟତା ମୂଲ୍ୟ ସ୍ଥିର ନିମନ୍ତେ ଆଇନଗତ ବ୍ୟବସ୍ଥା କରିବା, ସମସ୍ତ କୃଷକ ଏବଂ କୃଷିଜାତ ଦ୍ରବ୍ୟ ପାଇଁ ଆଇନଗତ ଅଧିକାର ଏବଂ ଦିଲ୍ଲୀରେ ଜାରି ହୋଇଥିବା ଜାତୀୟ ରାଜଧାନୀ ଆକ୍ଟରେ ସଂଶୋଧନ ପୂର୍ବକ ଜୋରିମାନା ଦେବା ପ୍ରକ୍ରିୟାରୁ କୃଷକଙ୍କୁ ବାଦ ଦେବା ବିଷୟ ରହିଛି।
ସଂଯୁକ୍ତ କିସାନ ମୋର୍ଚ୍ଚା କହିଛି ଯେ ପ୍ରାସଙ୍ଗିକ ପ୍ରସଙ୍ଗଗୁଡ଼ିକର ଯୁକ୍ତିଯୁକ୍ତ ସମାଧାନ ପାଇଁ ସଂଗଠନ ଦ୍ୱାରା ଦିଆଯାଇଥିବା ଏଜେଣ୍ଡା ଅନୁଯାୟୀ ଆଲୋଚନା ହେବା ଉଚିତ୍। ଡିସେମ୍ବର ୩୦ରେ ଦିଲ୍ଲୀର ବିଜ୍ଞାନ ଭବନରେ ଏହି ଆଲୋଚନା ହେବ। ଇତି ମଧ୍ୟରେ ବିରୋଧୀ କୃଷକ ଏବଂ ସରକାର ୫ ରାଉଣ୍ଡ ଆଲୋଚନା କରିଛନ୍ତି। ପୂର୍ବରୁ କୃଷକ ସଂଗଠନର ପ୍ରତିନିଧିମାନେ ଗୃହମନ୍ତ୍ରୀ ଅମିତ ଶାହାଙ୍କ ସହ ବୈଠକ କରିଥିଲେ।
Comments are closed.