ପ୍ରସିଦ୍ଧ ସଙ୍ଗୀତ ନିର୍ଦେଶକ ବାଚୁ ମୁଖାର୍ଜୀଙ୍କ ପରଲୋକ

ବାରିପଦା/ଭୁବନେଶ୍ବର: ଓଡ଼ିଆ ଚଳଚ୍ଚିତ୍ର ଜଗତର ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ଅଶୋକ ଓରଫ ବାଚୁ ମୁଖାର୍ଜୀଙ୍କର ରବିବାର ସନ୍ଧ୍ୟାରେ ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ହସପିଟାଲରେ ପରଲୋକ ଘଟିଛି। ହଠାତ୍‍ ଛାତିରେ ଯନ୍ତ୍ରଣା ହେବାରୁ ତାଙ୍କୁ ଡାକ୍ତରଖାନାକୁ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ୍ୟୁବେଳକୁ ବାଚୁଙ୍କୁ ୬୪ ବର୍ଷ ବୟସ ହୋଇଥିଲା। ତାଙ୍କ ମୃତ୍ୟୁରେ ମୟୂରଭଞ୍ଜ ଜିଲାରେ ଶୋକର ଛାୟା ଖେଳିଯାଇଛି। ବହୁ ବିଶିଷ୍ଟ ବ୍ୟକ୍ତି ଗଭୀର ଶୋକପ୍ରକାଶ କରି ଅମର ଆତ୍ମାର ସଦଗତି କାମନା କରିଛନ୍ତି। ସେହିପରି  ଅନ୍ତିମ ଦର୍ଶନ ପାଇଁ ଲାଲବଜାରସ୍ଥିତ ତାଙ୍କ ବାସଭବନରେ ବହୁ ଲୋକଙ୍କର ଭିଡ଼ ଲାଗିରହିଥିଲା। ସହରର ବହୁ ବିଶିଷ୍ଟ ବ୍ୟକ୍ତି ତାଙ୍କର ଶବାଧାର ଉପରେ ପୁଷ୍ପମାଲ୍ୟ ଅର୍ପଣ କରି ଶେଷ ଦର୍ଶନ କରିଛନ୍ତି। ଆସନ୍ତାକାଲି ସ୍ଥାନୀୟ ବାରୁଣୀ ଶ୍ମଶାନ ଘାଟରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ।

ପିଲାଟି ଦିନରୁ ସଙ୍ଗୀତ ମନସ୍କ ଥିବା ବାଚୁ ମୁଖାର୍ଜୀ ଫୁଲ ଚନ୍ଦନ, ଅଭିଳାଷ ଓ ହାକିମ ବାବୁ ଫିଲ୍ମରେ ପ୍ରତିଭାବାନ ସଙ୍ଗୀତ ନିର୍ଦ୍ଦେଶକ ସରୋଜ ପଟ୍ଟନାୟକଙ୍କ ସହକାରୀ ଭାବେ କାର୍ଯ୍ୟ କରିଥିଲେ। ଏହା ପରେ ସାଧୁ ମେହେରଙ୍କ ନିର୍ଦେଶିତ ‘ଗୋପରେ ବଢୁଚି କଳା କହ୍ନେଇଁ’ରେ ପ୍ରଥମେ ସ୍ବର ସଂଯୋଜନା କରି ଲୋକପ୍ରିୟ ହୋଇଥିଲେ।  ଅରୁଣ ମହାନ୍ତିଙ୍କ ନିର୍ଦେଶିତ ‘ପୁଅ ଭାଙ୍ଗିଦେଲା ସୁନା ସଂସାର’ ଫିଲ୍ମ ଥିଲା ବାଚୁଙ୍କ ଦ୍ବିତୀୟ ନିଜସ୍ବ ସଂଗୀତ ନିର୍ଦେଶନା। ପରେ ପରେ ‘କଥା ରହିଯିବ କାଳ କାଳକୁ’, ‘ମୋତେ ତ ଲଭ୍‌ ହେଲାରେ’ ଆଦି ଲୋକପ୍ରିୟ ଚଳଚ୍ଚିତ୍ରରେ ସଙ୍ଗୀତ ନିର୍ଦ୍ଦେଶନା ଦେଇ ଦର୍ଶକଙ୍କ ବେଶ୍‌ ପ୍ରଶଂସା ସାଉଁଣ୍ଟିଥିଲେ। ତାଙ୍କ ପରଲୋକ ସଙ୍ଗୀତ ଜଗତ ପାଇଁ ଅପୂରଣୀୟ କ୍ଷତି ତଥା ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହେଲା ବୋଲି ବହୁ ବିଶିଷ୍ଟ କଳାକାର ମତବ୍ୟକ୍ତ କରିଛନ୍ତି।

Comments
Loading...