ନୂଆଦିଲ୍ଲୀ: ଦେଶରେ ବ୍ୟବହୃତ କାର୍ ବ୍ୟବସାୟ ବୃଦ୍ଧିପାଉଥିବାବେଳେ ତାହାକୁ ପ୍ରୋତ୍ସାହିତ କରିବା ଲାଗି ବ୍ୟବହୃତ କାର୍ ଉପରେ ଦ୍ରବ୍ୟ ଓ ସେବା ଟିକସ (ଜିଏସଟି) ହାର ୫%କୁ ହ୍ରାସ କରିବାକୁ ଫେଡେରେସନ ଅଫ ଅଟୋମୋବାଇଲ ଡିଲର୍ସ ଆସୋସିଏସନ (ଏଫଏଡିଏ) ପକ୍ଷରୁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦିଆଯାଇଛି। ଆଗାମୀ ଫେବ୍ରୁଆରୀରେ ସାଧାରଣ ବଜେଟ ଉପସ୍ଥାପନ ହେବାକୁ ଯାଉଥିବାବେଳେ ତାହା ପୂର୍ବରୁ ଏହି ସଂଗଠନ ପକ୍ଷରୁ ସରକାରଙ୍କୁ କେତେକ ପ୍ରସ୍ତାବ ଦିଆଯାଇ ତାହାକୁ ବଜେଟରେ ସ୍ଥାନିତ କରିବାକୁ ଅନୁରୋଧ କରାଯାଇଛି।
ଏଫଡଡିଏ ପକ୍ଷରୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ନିକଟକୁ ପତ୍ର ଲେଖାଯାଇ କୁହାଯାଇଛି ଯେ କେତେକ ସରକାରୀ ନୀତି ଭାରତୀୟ ଯାନବାହନ ଶିଳ୍ପ ଏବଂ ଅଟୋ ଡିଲରସିପ୍ର ଅଭିବୃଦ୍ଧି କ୍ଷେତ୍ରରେ ବାଧକ ହୋଇଛି। କୋଭିଡ ମହାମାରୀ କାରଣରୁ ଦେଶରେ ଯାନବାହନ ଶିଳ୍ପ ଗୁରୁତର ପ୍ରଭାବିତ ହୋଇଛି ଏବଂ ଏ କ୍ଷେତ୍ରରେ ଗ୍ରାହକଙ୍କ ଚାହିଦା ବୃଦ୍ଧିପାଇଁ ଫେଡେରେସନ କେତେକ ପ୍ରସ୍ତାବ ଦେଇଛି। ସେଥିମଧ୍ୟରେ ଆୟକର ପୈଠ କରୁଥିବା ବ୍ୟକ୍ତିବିଶେଷଙ୍କ ପାଇଁ ଯାନବାହନ ଉପରେ କ୍ରମଶଃ ମୂଲ୍ୟହ୍ରାସ ଦାବି କରିବା ସୁବିଧା ପ୍ରଚଳନ କରାଯିବା ଆବଶ୍ୟକ। ଏହାଦ୍ୱାରା ଆୟକରଦାତାଙ୍କ ସଂଖ୍ୟା ବୃଦ୍ଧି ସହିତ ବିଶେଷକରି ଦୁଇଚକିଆ ଯାନର ଚାହିଦା ବୃଦ୍ଧି ଏବଂ ସରକାରଙ୍କର ଜିଏସଟି ସଂଗ୍ରହ ପରିମାଣ ବୃଦ୍ଧିପାଇବ। ଏଥିସହିତ ୨୦୨୦ ମାର୍ଚ୍ଚ ୩୧ ପର୍ଯ୍ୟନ୍ତ ପ୍ରଚଳିତ ଥିବା ଯାନବାହନର କ୍ରମଶଃ ମୂଲ୍ୟହ୍ରାସ ଯୋଜନା ୨୦୨୨-୨୩ ଆର୍ଥିକ ବର୍ଷ ପାଇଁ ପ୍ରଚଳନ କରିବାକୁ ଏହା ପ୍ରସ୍ତାବ ଦେଇଛି। ପୁନଶ୍ଚ ଦୁଇଚକିଆ ଯାନବାହନ ଉପରେ ଜିଏସଟି ହାର ୧୮%କୁ ହ୍ରାସ କରିବାକୁ ମଧ୍ୟ ଏହା କହିଛି। ଏହାଦ୍ୱାରା ଯାନବାହନ ନିର୍ମାତାଙ୍କ ଦ୍ୱାରା ହେଉଥିବା ମୂଲ୍ୟବୃଦ୍ଧିକୁ ମୁକାବିଲା କରାଯାଇପାରିବ ଏବଂ ଗ୍ରାହକଙ୍କ ନିକଟରୁ ଚାହିଦା ବୃଦ୍ଧିପାଇବ।
Comments are closed.