ଆଜିବି ସିରାଜଙ୍କ ଉପରେ ଜାତିଆଣ ମନ୍ତବ୍ୟ: କ୍ଷମା ମାଗିଲା ଅଷ୍ଟ୍ରେଲୀୟ ବୋର୍ଡ, ୬ ଦର୍ଶକ ବରଖାସ୍ତ

ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ସିଡନୀରେ ଚାଲିଥିବା ତୃତୀୟ ଟେଷ୍ଟରେ ଦର୍ଶକଙ୍କ ଅସହଯୋଗ ଦେଖାଦେଇଛି। ଶନିବାର ଦିନ ଏଭଳି ଘଟଣା ନେଇ ଜସପ୍ରୀତ ବୁମରା ଏବଂ ମହମ୍ମଦ ସିରାଜ ଜାତିଗତ ନିର୍ଯାତନା ଅଭିଯୋଗ ଆଣିଥିବା ବେଳେ ଆଜି ମଧ୍ୟ ସିଡନୀରେ ଉପସ୍ଥିତ ଦର୍ଶକମାନେ ସିରାଜଙ୍କୁ ଦୁର୍ବ୍ୟବହାର କରିଛନ୍ତି।

ମ୍ୟାଚର ଚତୁର୍ଥ ଦିନରେ ୮୬ତମ ଓଭର ଶେଷ ହେବା ପରେ ଫିଲଡିଂ କରିବାକୁ ଯାଇଥିବା ସିରାଜ ପୁଣିଥରେ ଜାତିପ୍ରଥା ମନ୍ତବ୍ୟର ସମ୍ମୁଖୀନ ହୋଇଥିଲେ। ସିରାଜ ତୁରନ୍ତ ଫିଲ୍ଡ ଅମ୍ପାୟାରଙ୍କୁ ଏ ବିଷୟରେ ଜଣାଇଥିଲେ। ଏଥିପାଇଁ ଖେଳ ମଧ୍ୟ ୧୦ ମିନିଟ୍ ପାଇଁ ବନ୍ଦ ରହିଥିଲା ତେବେ ସୁରକ୍ଷା କର୍ମୀ ଦର୍ଶକ ଗ୍ୟାଲେରୀକୁ ଯାଇ ଦୁର୍ବ୍ୟବହାର କରିଥିବା ବ୍ୟକ୍ତିଙ୍କୁ ଖୋଜିବା ଆରମ୍ଭ କଲେ ଏବଂ ପରେ ୬ ଜଣ ଦର୍ଶକଙ୍କୁ ଷ୍ଟାଡିଅମରୁ ବାହାର କରିଦିଆଯାଇଥିଲା। ଏହି ସମୟ ମଧ୍ୟରେ ଅମ୍ପାୟାରମାନେ ଖେଳାଳିଙ୍କ ସହ କଥାବାର୍ତ୍ତା ହେଉଥିବା ମଧ୍ୟ ଦେଖିବାକୁ ମିଳିଥିଲା।

ସୂଚନାଯୋଗ୍ୟ, ଶନିବାର ତୃତୀୟ ଦିନର ଖେଳ ଶେଷ ହେବା ପରେ ଭାରତୀୟ ଦଳ ପରିଚାଳନା କମିଟି ସିରାଜ ଏବଂ ବୁମରାଙ୍କ ପକ୍ଷରୁ ମ୍ୟାଚ୍ ରେଫରିଙ୍କ ନିକଟରେ ଅଭିଯୋଗ କରିଥିଲେ। ଅଧିନାୟକ ଅଜିଙ୍କ୍ୟ ରାହାଣେଙ୍କ ନେତୃତ୍ୱରେ ଟିମ୍ ଇଣ୍ଡିଆ ରିପୋର୍ଟ କରିଛି ଯେ କିଛି ଦର୍ଶକ ଦୁଇ ଖେଳାଳିଙ୍କୁ ଦୁର୍ବ୍ୟବହାର କରିଛନ୍ତି। ଭାରତୀୟ ଦଳର ଅଭିଯୋଗ ପରେ ମାମଲା ଆଇସିସିକୁ ତଦନ୍ତ ପାଇଁ ପଠାଯାଇଛି।

ଅନ୍ୟପକ୍ଷରେ କ୍ରିକେଟ୍ ଅଷ୍ଟ୍ରେଲିଆର ସୁରକ୍ଷା ମୁଖ୍ୟ କହିଛନ୍ତି ଯେ ଏଭଳି କୌଣସି ଅସଦାଚରଣ ପାଇଁ ଅଷ୍ଟ୍ରେଲିଆ କ୍ରିକେଟରେ ସ୍ଥାନ ନାହିଁ। ସେ କହିଛନ୍ତି, ‘ଆଇସିସି ଯାଞ୍ଚ ରିପୋର୍ଟକୁ କ୍ରିକେଟ ଅଷ୍ଟ୍ରେଲିଆ ଅପେକ୍ଷା କରିଛି ଏବଂ ତାହା ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଇତି ମଧ୍ୟରେ କ୍ରିକେଟ୍ ଅଷ୍ଟ୍ରେଲିଆ ଆୟୋଜକ ଭାବରେ ଭାରତୀୟ କ୍ରିକେଟ୍ ଦଳ ଏବଂ ପ୍ରଶଂସକଙ୍କୁ କ୍ଷମା ମାଗିଛି ଏବଂ ଏହି ଘଟଣାରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିଶ୍ଚିତ କରିଛି।

Comments
Loading...