MEllora 950×100

ଚିନ୍ତା ବଢାଉଛି ହାତୀପଲ, ନଷ୍ଟ କଲେ ପାଚିଲା ଧାନ କିଆରି

ଦ୍ୱାରଶୁଣି: ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଅଞ୍ଚଳରେ ହାତୀ ଉପଦ୍ରବ ଥମିବାର ନାଁ ନେଉନାହିଁ । ବାରମ୍ବାର ଚାଷ ଜମିରେ ପଶି ନଷ୍ଟ କରୁଛନ୍ତି ଧାନ ଗଛ । ଫଳରେ ମୁଣ୍ଡରେ ହାତ ଦେଇଛନ୍ତି ଗରୀବ ଚାଷୀ । ବାଙ୍ଗିରିପୋଷି ଅଞ୍ଚଳଟି ଶିମିଳିପାଳ ପାହାଡ ପରିବେଷ୍ଟିତ ହୋଇଥିବାରୁ ବଣୁଆ ହାତୀପଲଙ୍କ ଗ୍ରାମାଭିମୁଖୀ ହେବା ସହିତ ଫସଲ ନଷ୍ଟ କରିବା ଆଶାତୀତ ଭାବେ ବୃଦ୍ଧି ଘଟୁଥିବାର ଦେଖିବାକୁ ମିଳୁଛି । ତେବେ ବର୍ତମାନ ବ୍ଲକର ୪-୫ଟି ପଞ୍ଚାୟତରେ ବଣୁଆହାତୀ ସେଠାକାର ସାଧାରଣ ଜନତାଙ୍କ ପାଇଁ ଏକ ବଡ ସମସ୍ୟା ଭାବେ ଉଭା ହୋଇଛି । ଏକର ଏକର ଚାଷ ଜମି ନଷ୍ଟ କରି ଚାଲିଛନ୍ତି ପ୍ରତ୍ୟେକ ଦିନ । ବାଙ୍ଗିରିପୋଷି ପଞ୍ଚାୟତର କାଳିଆମି, ଧୋବଣିଶୋଳ, ନାଫ୍ରି, ବଣକାଟୀ, ଶ୍ୟାମସୁନ୍ଦରପୁର ପଞ୍ଚାୟତ ସହ ନିଶ୍ଚିନ୍ତା ପଞ୍ଚାୟତର ଚୁଆପାଣି, ସାରିପଦା ଗ୍ରାମରେ ଗତ କିଛି ଦିନ ଧରି ୧୨ରୁ ଊର୍ଦ୍ଧ୍ବ ବଣୁଆ ହାତୀ ଚାଷ ଜମିରେ ପଶି ଧାନ ଗଛ ଖାଇବା ସହ ଦଳି ଚକଟି ନଷ୍ଟ କରିଥିବାର ଖବର ମିଳିଛି । ନିଜ ପରିବାର ପେଟ ପୋଷିବା ପାଇଁ ବର୍ଷସାରା ଖରା ବର୍ଷାରେ ତିନ୍ତି ତିନ୍ତି ଜମିରେ ଚାଷ କରୁଛନ୍ତି କିନ୍ତୁ ହାତୀ ଦ୍ୱାରା ଫସଲ ନଷ୍ଟ ଯୋଗୁଁ ସବୁ ପରିଶ୍ରମ ବୃଥା ଯାଉଛି ବୋଲି ଦୁଃଖରେ କହିଛନ୍ତି ଚାଷୀ । ଅନ୍ୟପକ୍ଷେ ବନ ବିଭାଗ ସାହାଯ୍ୟ କରିବ ବୋଲି କହୁଛି କିନ୍ତୁ ବୁଝୁନାହିଁ ଚାଷୀର ଦୁଃଖ । ଗ୍ରାମର ଅମିତ କୁମାର ମହାନ୍ତ, କାଳୁ ମୁର୍ମୁ, ବୁଧୁରାମ ସିଂ, ସୁବାସ ସିଂ, ଗଣେଶ ମହାନ୍ତ, ସାଗର ସିଂ ପ୍ରମୁଖ ଚାଷୀଙ୍କ ୪ ଏକରରୁ ଊର୍ଦ୍ଧ୍ବ ଧାନ ଜମିରେ ପଶି ଧାନ ଗଛଗୁଡିକ ଦଳି, ଚକଟି ନଷ୍ଟ କରି ଦେଇଛନ୍ତି ବଣୁଆ ହାତୀ ପଲ । ଅନ୍ୟପକ୍ଷେ ବନ ବିଭାଗ ପାଖରେ ସୂଚନା ମଧ୍ୟ ନାହିଁ ହାତୀ କଉଠି ଅଛନ୍ତି । ଗ୍ରାମବାସୀ ରାତି ସାରା ଅନିଦ୍ରା ରହି ହାତୀ ଦାଉରୁ ଚାଷ ଜମିକୁ ରକ୍ଷା କରିବା ପାଇଁ ଘୋଉଡାଉଥିବା ବେଳେ ବନ ବିଭାଗ ଚିରନିଦ୍ରାରେ ଶୋଇଛି । ମଙ୍ଗଳବାର ସକାଳେ ଗ୍ରାମବାସୀମାନେ ବନ ବିଭାଗର ଗାଡିକୁ ଅଟକାଇ କର୍ମଚାରୀଙ୍କୁ ପଚାରିଲା ବେଳକୁ ସେମାନେ କୁହନ୍ତି ଆମେ ଜାଣି ପାରିଲୁ ନାହିଁ ହାତୀ କଉଠି ଅଛନ୍ତି । ତେଣୁ ଦେଖିବାକୁ ଆସିଛୁ ଯଦି କାହାର କ୍ଷୟକ୍ଷତି ହୋଇଛି ଅଭିଯୋଗ କଲେ ବନ ବିଭାଗ ତରଫରୁ କ୍ଷତିପୂରଣ ଦିଆଯିବ ବୋଲି ବନାଞ୍ଚଳ କର୍ମଚାରୀମାନେ କହିଛନ୍ତି ।

Comments are closed.