ମଧ୍ୟପ୍ରଦେଶ ଓ ମିଜୋରାମ୍‍ ବିଧାନସଭା ନିର୍ବାଚନ ପାଇଁ ଆସନ୍ତାକାଲି ଶେଷ ହେବ ପ୍ରଚାର କାର୍ଯ୍ୟ

0

ଭୋପାଳ : ମଧ୍ୟପ୍ରଦେଶ ଓ ମିଜୋରାମ୍‍ ବିଧାନସଭା ନିର୍ବାଚନ ପାଇଁ ଆସନ୍ତାକାଲି ପ୍ରଚାର କାର୍ଯ୍ୟ ଶେଷ ହେବ। ତେଣୁ ଶେଷ ମୁହୂର୍ତ୍ତରେ ମତଦାତାଙ୍କୁ ଆକୃଷ୍ଟ କରିବା ପାଇଁ ଜୋରଦାର ପ୍ରଚାର ଚାଲିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ମଧ୍ୟପ୍ରଦେଶର ବିଦିଶା ଓ ଜବଲପୁରଠାରେ ଦୁଇଟି ଜନସମାବେଶରେ ଉଦବୋଧନ ଦେଇଛନ୍ତି। ସେହିଭଳି ଅନ୍ୟ ରାଜନୈତିକ ଦଳର ତୁଙ୍ଗ ନେତୃବୃନ୍ଦ ରାଜ୍ୟର ବିଭିନ୍ନ ନିର୍ବାଚନ ମଣ୍ଡଳି ଗସ୍ତ କରି ନିଜ ଦଳୀୟ ପ୍ରାର୍ଥୀଙ୍କ ସପକ୍ଷରେ ଭୋଟ୍‍ ଦେବାକୁ ମତଦାତାଙ୍କୁ ନିବେଦନ କରୁଛନ୍ତି।
ସେହିଭଳି ମିଜୋରାମରେ ମଧ୍ୟ ମତଦାତାଙ୍କୁ ନିଜ ସପକ୍ଷରେ ଆଣିବାଲାଗି ରାଜନୈତିକ ଦଳମାନେ ସବୁପ୍ରକାର ଉଦ୍ୟମ ଜାରି ରଖିଛନ୍ତି। ଶାସକ କଂଗ୍ରେସ ଓ ବିରୋଧି ଦଳ ଏମଏନଏଫ ଓ ଜେଡପିଏମ୍‍ ଜୋରସୋରରେ ପ୍ରଚାର ଚଳାଇଛନ୍ତି।
୪୦ ଆସନ ବିଶିଷ୍ଟ ମିଜୋରାମରେ  ବିଧାନସଭା ନିର୍ବାଚନ ପାଇଁ ମୋଟ ୨୦୯ ଜଣ ପ୍ରାର୍ଥୀ ପ୍ରତିଦ୍ୱନ୍ଦିତା କରୁଛନ୍ତି। ସେହିପରି ୨୩୦ ଆସନ ବିଶିଷ୍ଟ ମଧ୍ୟପ୍ରଦେଶ ବିଧାନସଭା ନିର୍ବାଚନ ପାଇଁ ମୋଟ ୨୯୦୭ ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି।
ଉଭୟ ରାଜ୍ୟରେ ଆସନ୍ତା ବୁଧବାର ୨୮ ତାରିଖ ଦିନ ବିଧାନସଭା ନିର୍ବାଚନ ଅନୁଷ୍ଠିତ ହେବ ଏବଂ ଡିସେମ୍ବର ୧୧ ତାରିଖରେ ଫଳାଫଳ ଘୋଷଣା କରାଯିବ।

Leave A Reply