MEllora 950×100

ଉପେକ୍ଷାର ଫଳ

ଗୁଜରାଟରେ କଂଗ୍ରେସର ଶୋଚନୀୟ ପରାଜୟ ଏକ ବଡ଼ ପ୍ରଶ୍ନକୁ ଜନ୍ମ ଦେଇଛି ଯେ କୌଣସି ଦଳ ନିର୍ବାଚନୀ ସଫଳତା-ବିଫଳତାକୁ ଉପେକ୍ଷା କରି କେତେ ଦିନ ତିଷ୍ଠି ରହିପାରିବ

ହିମାଚଳ ପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସ ଦଳର ବିଜୟ ଯେତିକି ଉଳ ଦିଶିବା କଥା, ସେତିକି ଦିଶିନାହିଁ; କାରଣ ଗୁଜରାଟ ଭଳି ଏକ ଗୁରୁତ୍ବପୂର୍ଣ୍ଣ ରାଜ୍ୟର ନିର୍ବାଚନ ଫଳ ଏହାକୁ ନିଷ୍ପ୍ରଭ କରିଦେଇଛି। ୨୦୧୭ରେ ୭୭ଟି ଆସନ ଜିଣିଥିବା ଦଳ ଯଦି ୧୭ (ଭୋଟ ଭାଗ ୧୭%)କୁ ଖସିଆସିବ, ତେବେ ଦଳ, ନିର୍ବାଚନ ରଣନୀତି ଓ ମତଦାତାଙ୍କ ମଧ୍ୟରେ ଯେ ଏକ ବିରାଟ ଫାଙ୍କ ରହିଛି, ଏହା ନିର୍ଦ୍ବନ୍ଦ୍ବରେ କହିହେବ। ୨୭ ବର୍ଷ କ୍ଷମତାରେ ରହିବା ପରେ ମଧ୍ୟ ଶାସକ ଦଳ ଯଦି ୧୮୨ରୁ ୧୫୬ଟି ଆସନରେ ବିଜୟଲାଭ କରୁଛି, ତେବେ ଉକ୍ତ ନିର୍ବାଚନକୁ ପ୍ରତିଦ୍ବନ୍ଦ୍ବୀବିହୀନ ବୋଲି କହିଲେ ଅସଙ୍ଗତ ହେବନାହିଁ। ତେଣୁ କଂଗ୍ରେସ ବିଜେପିକୁ ‘ୱାକ୍‌ଓଭର୍‌’ ଦେଇଥିଲା ବୋଲି ଯାହା କୁହାଯାଉଛି, ତାହା ଅଯଥାର୍ଥ ନୁହେଁ। ଏହି ନିର୍ବାଚନ ଫଳ ଅପ୍ରତ୍ୟାଶିତ ବା ଆଶ୍ଚର୍ଯ୍ୟଜନକ ମଧ୍ୟ ନୁହେଁ; ବରଂ ଏହାକୁ ୨୦୧୮ ଡିସେମ୍ବରରୁ ଜାରି ରହିଥିବା କଂଗ୍ରେସ ପରାଜୟର ଆଉ ଏକ ପାହାଚ କୁହାଯାଇପାରେ।

କଂଗ୍ରେସ ପାଇଁ ଗୁଜରାଟ ପରାଜୟ କେବଳ ପ୍ରସଙ୍ଗଭିତ୍ତିକ ନଥିଲା। ଭାରତ ଯୋଡ଼ ଯାତ୍ରାରେ ମେଧା ପାଟକରଙ୍କ ଯୋଗଦାନ ହେଉ ବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ କଂଗ୍ରେସ ନେତାଙ୍କ ‘ରାବଣ’ ବିବୃତି ହେଉ, ଏସବୁକୁ ନେଇ ବିଜେପିର ପ୍ରତିଆକ୍ରମଣ ଦଳର ଯେତିକି କ୍ଷତି କରିନାହିଁ, ‘କଂଗ୍ରେସ ବିଧାୟକମାନେ ସହଜ ଦଳବଦଳକାରୀ’ ବୋଲି ରହିଥିବା ଧାରଣାଟି ସର୍ବାଧିକ କ୍ଷତିକାରକ ସାବ୍ୟସ୍ତ ହୋଇଛି। ସୂଚନାଯୋଗ୍ୟ ଯେ ୨୦୧୭ ବିଧାନସଭା ନିର୍ବାଚନ ପୂର୍ବରୁ ୧୨ରୁ ଅଧିକ କଂଗ୍ରେସ ବିଧାୟକ ବିଜେପିରେ ଯୋଗ ଦେଇଥିଲାବେଳେ ୨୦୨୨ରେ ଅନ୍ତତଃ ୧୯ ଜଣ କଂଗ୍ରେସ ନେତାଙ୍କୁ ବିଜେପି ଟିକଟ ଦେଇଥିଲା, ଯାହାଙ୍କ ମଧ୍ୟରୁ ଅଧିକାଂଶ ଏଥର ବିଜୟ ହାସଲ କରିଛନ୍ତି। ଏହାର ପରିଣାମ ହୋଇଛି ଆଦିବାସୀ ଓ ମୁସଲମାନ ଅଞ୍ଚଳରେ ଥିବା ନିଜର ନିଶ୍ଚିତ ଭୋଟକୁ ମଧ୍ୟ କଂଗ୍ରେସ ହରାଇଛି। ଦଳୀୟ ଅନ୍ତଃକଳହ, ଟାଣଟୁଣ ବଜେଟ୍‌ ତଥା କଳ୍ପନା ଓ ଆକର୍ଷଣଶୂନ୍ୟ ବିଳମ୍ବ ନିର୍ବାଚନ ପ୍ରଚାର ବ୍ୟତୀତ ନୂଆ ଦଳ ଆମ୍‌ ଆଦ୍‌ମୀ ପାର୍ଟି(ଆପ୍‌)ର ଶକ୍ତିକୁ ହେୟଜ୍ଞାନ କଂଗ୍ରେସ ପତନକୁ ସହଜ କରିଥିଲା। ଆପ୍‌ ସେଠାରେ ନବାଗତ ହୋଇଥିଲେ ସୁଦ୍ଧା ୧୩ ଶତାଂଶ ଭୋଟ ସହ ୫ଟି ଆସନରେ ବିଜୟଲାଭ କରିବା ତା’ର କମ୍‌ ଉପଲବ୍ଧି ନୁହେଁ। ଅପରପକ୍ଷେ, ଗୁଜରାଟ ନିର୍ବାଚନ ଫଳ କଂଗ୍ରେସର ନୂଆ ସଭାପତି ଓ ଅନ୍ୟ ବରିଷ୍ଠମାନଙ୍କ ପାଇଁ ଗଭୀର ଚିନ୍ତାର ବିଷୟ ହେବା ସ୍ବାଭାବିକ। ଏହା ଗୁରୁତ୍ବପୂର୍ଣ୍ଣ ହୋଇପଡ଼ିଛି ଏଇଥିପାଇଁ ଯେ ଆସନ୍ତା କିଛି ମାସ ଭିତରେ କର୍ଣ୍ଣାଟକ, ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ ଭଳି ଅନେକ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବାର ଅଛି।

୨୦୧୮ ଡିସେମ୍ବର ପରେ ହିମାଚଳ ପ୍ରଦେଶରେ ପ୍ରଥମ ବିଜୟର ସ୍ବାଦ ଚାଖିଥିବାରୁ କଂଗ୍ରେସ ପାଇଁ ଏହା ଅବଶ୍ୟ ବଡ଼ ସାନ୍ତ୍ବନା; କିନ୍ତୁ ଭୋଟ ଭାଗକୁ ଦେଖିଲେ ସେଠାରେ ମଧ୍ୟ ଦଳର ସ୍ଥିତି ବହୁତ ଉନ୍ନତ, ତାହା ନୁହେଁ। ଦଳ ୬୮ରୁ ୪୦ଟି ଆସନ ଜିତି ବହୁମତ ହାସଲ କରି ବିଜେପି ହାତରୁ କ୍ଷମତା ଛଡ଼ାଇ ଆଣିବାକୁ ସଫଳ ହୋଇଥିଲେ ହେଁ ଏହାର ଭୋଟଭାଗ ୪୩.୯ ଶତାଂଶ ଥିବାବେଳେ ପ୍ରତିଦ୍ବନ୍ଦ୍ବୀ ବିଜେପିର ଭୋଟଭାଗ ୪୩ ଶତାଂଶ; ଅର୍ଥାତ୍‌ ଉଭୟ ଦଳ ମଧ୍ୟରେ ଭୋଟଭାଗର ତାରତମ୍ୟ ମାତ୍ର ୦.୯ ଶତାଂଶ। ୧୯୫୧ ପରେ ଏହି ଅନ୍ତର ସବୁଠୁ କମ୍। କଂଗ୍ରେସ ହିମାଚଳ ପ୍ରଦେଶ ନିର୍ବାଚନ ଜିଣିବା ପଛରେ ତା’ର ରଣନୀତି ଅପେକ୍ଷା ମତଦାତାଙ୍କ ଶାସନ-ବିରୋଧୀ ମନୋଭାବ ହିଁ ଅଧିକ ଦାୟୀ ବୋଲି କହିଲେ ଅତ୍ୟୁକ୍ତି ହେବନାହିଁ। ୧୯୯୮ ମସିହାରୁ ଏ ପର୍ଯ୍ୟନ୍ତ ଦେଖାଯାଇଛି ଯେ ଶାସକ ଦଳକୁ ସେମାନେ ପରବର୍ତ୍ତୀ ନିର୍ବାଚନରେ ବିରୋଧୀ ଆସନକୁ ଠେଲି ଦେଇ ବିରୋଧୀଙ୍କୁ କ୍ଷମତାସୀନ କରିଆସିଛନ୍ତି ଏବଂ ଏ ଚକ୍ର ଏ ପର୍ଯ୍ୟନ୍ତ ଅବ୍ୟାହତ ରହିଛି। ତେବେ ହିମାଚଳ ପ୍ରଦେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ପ୍ରମୁଖ ନେତୃବର୍ଗଙ୍କ ପ୍ରଚାର ସତ୍ତ୍ବେ ବିଜେପିକୁ ପଛକୁ ଠେଲିଦେବା କଂଗ୍ରେସକୁ ଅବଶ୍ୟ କିଛିଟା ସାହସ ଦେବ। ଆଗାମୀ ନିର୍ବାଚନଗୁଡ଼ିକରେ ମହାବଳୀୟାନ ହୋଇସାରିଥିବା ବିଜେପିକୁ ଯେ ପରାଜିତ କରିହେବ, ସେଇ ଆଶା ଉଜ୍ଜୀବିତ ରହିବ। ତା’ପାଇଁ ଆଉ ଗୋଟିଏ ଆଶ୍ବାସନାର କଥା ଯେ ହିମାଚଳ ମତଦାତା ଆପ୍‌କୁ ସମ୍ପୂର୍ଣ୍ଣ ରୂପେ ଖାରଜ କରିଦେଇଛନ୍ତି, ଯିଏ ଅନ୍ୟ ରାଜ୍ୟରେ ମଧ୍ୟ ତା’ ଭୋଟକୁ ହାତେଇ ନିଜକୁ ଅଗ୍ରଣୀ କରିବା ପାଇଁ ଚେଷ୍ଟା କରିଆସୁଛି।

ରାହୁଳ ଗାନ୍ଧୀ ଭାରତ ଯୋଡ଼ ଯାତ୍ରାରେ ବ୍ୟସ୍ତ ରହିଥିବାବେଳେ ଗୁଜରାଟ ଓ ହିମାଚଳ ପ୍ରଦେଶ ଉପରେ ଯେତିକି ଦୃଷ୍ଟି ଦେବା କଥା, ଦେଇପାରି ନଥିଲେ। ଏହି ଯାତ୍ରା ରାହୁଳଙ୍କ ଭାବମୂର୍ତ୍ତିକୁ ଉଳ କରିବା ସହ ଦଳକୁ ଜନତାଙ୍କ ସଂଗେ ଯୋଡ଼ିବାରେ ହୁଏତ ସାହାଯ୍ୟ କରିବ; କିନ୍ତୁ ଗୁଜରାଟରେ ଶୋଚନୀୟ ପରାଜୟ ଏକ ବଡ଼ ପ୍ରଶ୍ନକୁ ଜନ୍ମ ଦେଇଛି ଯେ କୌଣସି ରାଜନୈତିକ ଦଳ ନିର୍ବାଚନୀ ସଫଳତା-ବିଫଳତାକୁ ଉପେକ୍ଷା କରି କେତେଦିନ ତିଷ୍ଠି ରହିପାରିବ ବା ସେପରି ତିଷ୍ଠି ରହିବାର ମାନେ କ’ଣ? କଂଗ୍ରେସ ଦଳ ପାଖରେ ବୋଧହୁଏ ଏହାର କୌଣସି ଉତ୍ତର ନାହିଁ; ଅନ୍ତତଃ ବର୍ତ୍ତମାନ ପାଇଁ।

Comments are closed.