ବୌଦ୍ଧ : କୋଭିଡ-୧୯ ସଂକ୍ରମଣ ସମୟରେ ରୋଗୀମାନଙ୍କ ସେବା କରି ଶେଷରେ କୋଭିଡ ଦ୍ୱାରା ସଂକ୍ରମିତ ହୋଇ ପ୍ରାଣ ହରାଇଥିବା କୋଭିଡ ଯୋଦ୍ଧା ଡା. ବିଶ୍ୱନାଥ ରାଉତଙ୍କ ସ୍ମୃତି ଉଦ୍ଦେଶ୍ୟରେ ଜାତୀୟ ସ୍ୱାସ୍ଥ୍ୟ ମିଶନର ଜିଲ୍ଲା ତାଲିମ କେନ୍ଦ୍ରକୁ ସ୍ୱର୍ଗତ ଡା. ରାଉତଙ୍କ ନାମରେ ନାମିତ କରାଯିବାକୁ ନିଷ୍ପତି ଗ୍ରହଣ କରାଯାଇଛି। ବୌଦ୍ଧ ଜିଲ୍ଳାପାଳ ଲଲାଟେନ୍ଦୁ ମିଶ୍ର ଏନେଇ ଟ୍ୱିଟର ଯୋଗେ ସୂଚନା ଦେଇଛନ୍ତି।
ସ୍ୱର୍ଗତ ଡା. ରାଉତ କୋଭିଡ ସମୟରେ ବୌଦ୍ଧ କୋଭିଡ କେନ୍ଦ୍ରରେ ନିଯୁକ୍ତ ହୋଇ ସଂକ୍ରମିତ ରୋଗୀମାନଙ୍କ ଚିକିତ୍ସା କରିବାପରେ ନିଜେ ସଂକ୍ରମଣର ଶୀକାର ହୋଇଥିଲେ। ବୌଦ୍ଧଠାରେ ତାଙ୍କର ଅବସ୍ଥା ଗୁରୁତର ହେବାପରେ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା। କିନ୍ତୁ ସେଠାରେ ସ୍ୱାସ୍ଥ୍ୟାବସ୍ଥାରେ କୌଣସି ଉନ୍ନତି ନ ଆସିବାରୁ ତାଙ୍କୁ ଏୟାର ଆମ୍ବୁଲାନସରେ ଚିକିତ୍ସା ପାଇଁ ହାଇଦ୍ରାବାଦ ନିଆଯାଇଥିଲା। ଡାକ୍ତରମାନଙ୍କ ଅନେକ ଉଦ୍ୟମ ପରେ ମଧ୍ୟ ଦୀର୍ଘଦିନ କୋମା ରେ ରହିବାପରେ ଗତ ଅକ୍ଟୋବର ୩୦ ତାରିଖରେ ମାତ୍ର ୪୦ବର୍ଷ ବୟସରେ ତାଙ୍କର ପରଲୋକ ହୋଇଯାଇଥିଲା। ସ୍ୱର୍ଗତ ଡା. ରାଉତ ଅତ୍ୟନ୍ତ ମେଳାପି ସ୍ୱଭାବ ସହିତ ନିଷ୍ଠାର ସହିତ ଚିକିତ୍ସା ସେବା ଯୋଗାଇ ଦେଉଥିଲେ। ସରକାରଙ୍କ ପକ୍ଷରୁ କୋଭିଡ ଯୋଦ୍ଧା ଭାବରେ ଡାକ୍ତର ରାଉତଙ୍କ ପରିବାରକୁ ୫୦ ଲକ୍ଷ ଟଙ୍କାର ସହାୟତା ରାଶି ବୌଦ୍ଧ ଜିଲ୍ଲାପାଳଙ୍କ ଜରିଆରେ ପ୍ରଦାନ କରାଯାଇଥିବାବେଳେ ତାଙ୍କର ସ୍ମୃତି ଉଦ୍ଦେଶ୍ୟରେ ସ୍ୱାସ୍ଥ୍ୟ ମିଶନର ତାଲିମ କେନ୍ଦ୍ରକୁ ତାଙ୍କରି ନାମରେ ନାମକରଣ କରାଯିବାକୁ ନିଷ୍ପତି ଗ୍ରହଣ କରାଯାଇଥିବା ଜଣାଯାଇଛି।
Comments are closed.