କରୋନା ରୋଗୀଙ୍କୁ ଖୁସି କରିବାକୁ ଗୀତ ଗାଇଲେ ଡାକ୍ତର

ବାଗଦାଦ: କରୋନା ଭୂତାଣୁ ମହାମାରୀ ରୂପ ଧାରଣ କରିଛି। ପ୍ରତିଦିନ ଲକ୍ଷାଧିକ ଲୋକ ଏଥିରେ ଆକ୍ରାନ୍ତ ହେଉଛନ୍ତି। ହଜାର ହଜାର ରୋଗୀ ପ୍ରାଣ ହରାଉଛନ୍ତି। ସାରା ବିଶ୍ଵ ଏହି ମାହାମାରୀ ବିରୋଧରେ ଲଢ଼େଇ କରୁଛନ୍ତି। ଏହି ଲଢ଼େଇର ପ୍ରମୁଖ ଯୋଦ୍ଧା ହେଉଛନ୍ତି ଡାକ୍ତର ଏବଂ ସ୍ବାସ୍ଥ୍ୟ କର୍ମୀ। ନିଜ ଜୀବନକୁ ବିପଦରେ ପକାଇ ରୋଗୀଙ୍କ ସେବା କରୁଛନ୍ତି। ସେମାନଙ୍କ ଆରୋଗ୍ୟ ପାଇଁ ଦିନ ରାତି ଖଟୁଛନ୍ତି। ଏହା ସତ୍ବେ ସେମାନଙ୍କ ମନରେ ସାମାନ୍ୟ ଦୁଃଖ ନାହିଁ। ବରଂ ରୋଗୀଙ୍କୁ ଖୁସି କରିବାକୁ କେଉଁଠି ଡାକ୍ତର ନାଚୁଛନ୍ତି ତ ଆଉ କେଉଁଠି ଗୀତ ଗାଉଛନ୍ତି। ଏଭଳି ଦୃଶ୍ୟ ପୁଣି ଥରେ ଦେଖିବାକୁ ମିଳିଛି ଇରାକ୍‌ର ବାଗଦାଦରେ। ଜଣେ ଡାକ୍ତର ରୋଗୀଙ୍କ ଖୁସି ପାଇଁ ଗୀତ ଗାଉଥିବାର ଦେଖିବାକୁ ମିଳିଛି। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଡାକ୍ତର ଜଣଙ୍କୁ ବାଃ ବାଃ କରାଯାଉଛି।

ଡାକ୍ତର ଜଣକ ପିପିଇ କିଟ୍‌ ପିନ୍ଧିଥିବାବେଳେ ଆରବିକ ଭାଷାରେ ଅତି ସୁନ୍ଦର ସ୍ବରରେ ଗୀତ ଗାଉଛନ୍ତି, ଯାହାକୁ ଶୁଣି ରୋଗୀ ବେଶ୍‌ ଆନନ୍ଦ ଅନୁଭବ କରୁଥିବା ଦେଖାଯାଉଛି। ଏପରି କି ରୋଗୀ ଜଣକ ଖୁସିରେ କାନ୍ଦି ପକାଇଥିବା ଦେଖିବାକୁ ମିଳିଛି। ଶେଷରେ ଡାକ୍ତର ଜଣକ ତାଙ୍କ ମଥାକୁ ଏକ ଚୁମ୍ବନ ଦେଇ ସେଠାରୁ ଚାଲିଯାଉଛନ୍ତି।