ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ପଦବୀ ପୁରଣ ନ ହେଲେ ପାଟଣା ବନ୍ଦ ପାଇଁ ନିଷ୍ପତ୍ତି

ପାଟଣା : ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକ ସଂଖ୍ୟକ ଡାକ୍ତର ନଥିବା ବେଳେ ଜନପ୍ରିୟ ଡାକ୍ତର ଚିତ୍ତରଞ୍ଜନ ନାୟକଙ୍କୁ ଏଠାରୁ ଠାକୁରମୁଣ୍ଡା ରିଲିଭ କରାଇ ଦିଆଯିବା ଘଟଣାକୁ ନେଇ ପାଟଣାରେ ଜନ ଅସନ୍ତୋଷ ତୀବ୍ର ହୋଇଛି । ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭାରପ୍ରାପ୍ତ ଚିକିତ୍ସାଧିକାରୀଙ୍କ ସମେତ ସ୍ତ୍ରୀରୋଗ ବିଶେଷଜ୍ଞ, ଶିଶୁରୋଗ ବିଶେଷଜ୍ଞ ଓ ସର୍ଜରୀ ବିଶେଷଜ୍ଞ ନିଯୁକ୍ତି ଦିଆ ନ ଗଲେ ପାଟଣାରେ ସରକାରୀ ବେସରକାରୀ କାର୍ୟ୍ୟାଳୟ ସହ ସ୍କୁଲ କଲେଜଗୁଡିକ ଦାବି ପୁରଣ ନହେଲା ପର୍ୟ୍ୟନ୍ତ ବନ୍ଦ ରଖିବେ ବୋଲି ଆଜି ଜନମତ ସଂଗ୍ରହ କରାଯାଇଛି ।

ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଜଣେ ଭାରପ୍ରାପ୍ତ ଚିକିତ୍ସାଧିକାରୀଙ୍କୁ ମିଶାଇ ମୋଟ ୭ଟି ଅନୁମୋଦିତ ଡାକ୍ତର ପଦବୀ ଥିବାବେଳେ ଏମାନଙ୍କ ମଧ୍ୟରୁ ଜଣେ ମେଡିସିନ ସ୍ପେସାଲିଷ୍ଟ, ଜଣେ ସ୍ତ୍ରୀ ରୋଗ ବିଶେଷଜ୍ଞ, ଜଣେ ଶିଶୁ ରୋଗ ବିଶେଷଜ୍ଞ ଓ ଜଣେ ସର୍ଜରୀ ବିଶେଷଜ୍ଞଙ୍କ ସହ ଦୁଇଟି ଆସିଷ୍ଟାଣ୍ଟ ସର୍ଜନ ପଦବୀ ରହିଛି । ଏବେ ଏଠାରେ ଭାରପ୍ରାପ୍ତ ଚିକିସାଧିକାରୀ ନଥିବା ବେଳେ ୨ଜଣ ଆସିଷ୍ଟାଣ୍ଟ ସର୍ଜନ ଓ ଜଣେ ଠିକା ମେଡିସିନ ସ୍ପୋଶାଲିଷ୍ଟ କାର୍ୟ୍ୟରତ ଅଛନ୍ତି। ଯାହା ଫଳରେ ଅଞ୍ଚଳବାସୀଙ୍କୁ ଉପଯୁକ୍ତ ଚିକିତ୍ସା ସୁବିଧା ପାଇବା ସମ୍ଭବ ହେଉନାହିଁ । ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ଘଟଗାଁ, ପାଟଣା ଓ ସାହାରପଡା ବ୍ଲକ ଅଞ୍ଚଳର ଲକ୍ଷାଧିକ ଲୋକ ନିର୍ଭରଶୀଳ ଥିବା ବେଳେ ପାଟଣା ଦେଇ ୨୨୦ ନଂ ଜାତୀୟ ରାଜପଥ, ଜିଲ୍ଲା ମୁଖ୍ୟାଳୟ ରାସ୍ତା ଓ ଗ୍ରାମ ସଡକରେ ଦୁର୍ଘଟଣାଗ୍ରସ୍ତଙ୍କ ଚିକିତ୍ସା ଘଟଗାଁ, ପାଟଣା ଓ ସାହାରପଡା ବ୍ଲକ ଅଞ୍ଚଳର ଅପମୃତ୍ୟୁର ଶିକାରଙ୍କ ବ୍ୟବଛେଦ ବ୍ୟବସ୍ଥା ଥିବାରୁ ଗୁରୁତ୍ୱପୂର୍ଣ୍ଣ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଅଚଳାବସ୍ଥା ଦୂର କରିବାକୁ ବୁଦ୍ଧିଜୀବିମାନେ ମତ ରଖିଛନ୍ତି।

Comments
Loading...