ପାଟନା : ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ନେତୃତ୍ବ ସଂଯୁକ୍ତ ଜନତା ଦଳ (ଜେଡିୟୁ) ସହିତ ପୂର୍ବତନ କେନ୍ଦ୍ରମନ୍ତ୍ରୀ ଉପେନ୍ଦ୍ର କୁଶୱାହଙ୍କ ନେତୃତ୍ବ ରାଷ୍ଟ୍ରୀୟ ଲୋକ ସମତା ପାର୍ଟି (ଆରଏଲ୍ଏସ୍ପି)ର ମିଶ୍ରଣ ନେଇ ଚର୍ଚ୍ଚା ଆରମ୍ଭ ହୋଇଛି। ଉପେନ୍ଦ୍ର କୁଶୱାହ ନିକଟରେ ନୀତୀଶ କୁମାରଙ୍କୁ ଭେଟିଥିଲେ। ଏହି ସାକ୍ଷାତ ପରେ ଅନୁମାନ କରାଯାଉଛି ଯେ ଆଗାମୀ ଦିନରେ ଜେଡିୟୁ ସହିତ ଆରଏଲଏସ୍ପି ମିଶ୍ରଣ ହୋଇପାରେ। ତେବେ ରବିବାର କୁଶୱାହ କହିଛନ୍ତି ଯେ ଦୁଇ ଦଳର ମିଶ୍ରଣକୁ ନେଇ ଯେଉଁ ଚର୍ଚ୍ଚା ଚାଲିଛି ତାହା ଭୁଲ୍। ବର୍ତ୍ତମାନ ସମୟରେ ଏପରି ମିଶ୍ରଣ ନେଇ କୌଣସି ଆଲୋଚନା କରାଯାଇ ନାହିଁ। ନୀତୀଶଙ୍କ ସହିତ ତାଙ୍କର ସାକ୍ଷାତ ସମ୍ପୂର୍ଣ୍ଣ ରୂପେ ସୌଜନ୍ୟମୂଳକ ଥିଲା ବୋଲି କୁଶୱାହ କହିଛନ୍ତି।
ସୂଚନାଥାଉ କି ୨୦୧୯ ଲୋକସଭା ନିର୍ବାଚନ ପୂର୍ବରୁ ଉପେନ୍ଦ୍ର କୁଶୱାହ ଏନଡିଏରୁ ଅଲଗା ହୋଇ ମହାଗଠ ବନ୍ଧନରେ ଯୋଗ ଦେଇଥିଲେ। ୨୦୧୯ ଲୋକସଭା ନିର୍ବାଚନରେ କୁଶୱାହାଙ୍କ ଦଳ ଖରାପ ଫଳାଫଳ ପ୍ରଦର୍ଶନ କରିଥିଲା। ଏହା ପରେ କୁଶୱାହ ୨୦୨୦ ବିହାର ବିଧାନସଭା ନିର୍ବାଚନ ପୂର୍ବରୁ ମହାଗଠବନ୍ଧନରୁ ବିଦାୟ ନେଇ ଅସାଦୁଦ୍ଦିନ ଓୱେସିଙ୍କ ଦଳ ସହ ମିଶି ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇଥିଲେ। ତଥାପି ବିଧାନସଭା ନିର୍ବାଚନରେ କୁଶୱାହ ପରାସ୍ତ ହୋଇଥିଲେ। ଏପରି ପରିସ୍ଥିତିରେ, ଡିସେମ୍ବର ୨ରେ ନୀତୀଶ କୁମାରଙ୍କ ସହ ତାଙ୍କର ସାକ୍ଷାତକାର ପରେ କୁଶୱାହ ଜେଡିୟୁ ସହିତ ନିଜ ଦଳକୁ ମିଶାଇପାରନ୍ତି ବୋଲି କଳ୍ପନାଜଳ୍ପନା ପ୍ରକାଶ ପାଇଛି। ବିହାର ବିଧାନସଭା ଅଧିବେଶନରେ ଆରଜେଡି ନେତା ତେଜସ୍ୱୀ ଯାଦବ ବ୍ୟକ୍ତିଗତ ଭାବେ ନୀତୀଶଙ୍କୁ ଯେଭଳି ଆକ୍ରମଣ କରିଥିଲେ, ସେଥିପାଇଁ ମଧ୍ୟ କୁଶୱାହ ଅସନ୍ତୋଷ ବ୍ୟକ୍ତ କରିଥିଲେ।
Comments are closed.