କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ବିଜୟନଗର ପଞ୍ଚାୟତ ଅନ୍ତର୍ଗତ ଶଙ୍ଖପଦା ଗ୍ରାମର ରଞ୍ଜନ ଦାସଙ୍କ ପୁଅ ଦିବ୍ୟାଙ୍ଗ ମେଧାବୀ ଛାତ୍ର ବରଜ କୁମାର ଦାସ ଚଳିତ ବର୍ଷ ଯୁକ୍ତ ଦୁଇ ବିଜ୍ଞାନ ପରୀକ୍ଷାରେ ୬୦୦ ରୁ ୫୦୫ ( ୮୪%) ମାର୍କ ରଖି କୃତକାର୍ଯ୍ୟ ହୋଇଛନ୍ତି। ବରଜ କୁମାର ଦାସଙ୍କୁ ତାଙ୍କର ଏହି ସଫଳତା ପାଇଁ ମହାକାଳପଡା ୟୁଥ୍ ଗ୍ରୁପ୍ ତରଫରୁ ସମ୍ବର୍ଦ୍ଧନା ଦିଆଯାଇଛି। ଦୃଢ ଇଛା ଶକ୍ତି ଓ କଠିନ ପରିଶ୍ରମ ଆଗରେ ହାର୍ ମାନିଛି ଶାରୀରିକ ଅକ୍ଷମତା। କଠୋର ଅଧ୍ୟାବସାୟ ବଳରେ ସେ ସୃଷ୍ଟି କରିଛନ୍ତି ଏକ ନୂତନ ପରିଚୟ। ଦିନରାତି ଏକ୍ କରି ଲକ୍ଷ୍ୟସ୍ଥଳରେ ପହଞ୍ଚିବା ପାଇଁ ତାଙ୍କ ଉଦ୍ୟମ ଅନ୍ୟମାନଙ୍କ ଲାଗି ଉଦାହରଣ ସୃଷ୍ଟି କରିଛି।
ଜଣେ ଡାକ୍ତର ହେବାକୁ ଲକ୍ଷ ରଖିଥିବା ବରଜ ଡାକ୍ତରୀ ପାଠ ପଢି ସ୍ଥାନୀୟ ଲୋକଙ୍କୁ ସେବା ଯୋଗାଇ ଦେବେ ବୋଲି କହିଛନ୍ତି। ସେପଟେ ମେଡିକାଲ ପାଠ ପଢା ପାଇଁ ତାଙ୍କ ପାଖରେ ଆର୍ଥିକ ସ୍ଥିତି ଦୃଢ ନାହିଁ। ଯଦି ସରକାରଙ୍କ ତରଫରୁ ସହଯୋଗ ଯୋଗାଇ ଦିଆଯାଏ, ନିଶ୍ଚୟ ମୋ ପୁଅ ଆମ ଜିଲ୍ଲା ପାଇଁ ନାଆଁ କରିବ ବୋଲି ବରଜଙ୍କ ମା’ କହିଛନ୍ତି। ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ୟୁଥ ଗ୍ରୁପର ସଭାପତି ସୁନୀଲ ଗନ୍ତାୟତ, ସମ୍ପାଦକ ପ୍ରତାପ ତ୍ରିପାଠୀ, ଅକ୍ଷୟ ପାତ୍ର, ବିଚିତ୍ର ବେହେରା, ବିଶ୍ଵଜିତ ଦାସ, ମହେଶ୍ୱର ପାଇଟଲ, ଜିତେନ୍ଦ୍ର ନାୟକ ଓ ଅନ୍ୟମାନେ ଉପସ୍ଥିତ ଥିଲେ।
Comments are closed.