ନୂଆଦିଲ୍ଲୀ : ଅଯୋଧ୍ୟାରେ ରାମ ମନ୍ଦିର ନିର୍ମାଣକୁ ପ୍ରସଙ୍ଗ କରି ବିଜେପି ନିର୍ବାଚନୀ ଗଙ୍ଗା ପାର ହେବାକୁ ଉଦ୍ୟମ ଆରମ୍ଭ କରିଛି। ଏହି କ୍ରମରେ ବିଜେପି ପକ୍ଷରୁ ଦିଲ୍ଲୀରୁ ଶନିବାର ‘ରାମ ମନ୍ଦିର ନାମରେ ଗୋଟିଏ ଦୀପ’ ଅଭିଯାନ ଆରମ୍ଭ କରାଯାଇଛି। କେନ୍ଦ୍ର ମନ୍ତ୍ରୀ ବିଜୟ ଗୋଏଲ, କିରଣ ରିଜିଜୁ, ଶିବ ପ୍ରସାଦ ଶୁକ୍ଲା, ପିପି ଚୌଧୁରୀ ପ୍ରମୁଖ ଶତାଧିକ ଲୋକଙ୍କ ସହ ମିଶି ଶନିବାର ରାତିରେ ଦୀପ ଜାଳିଥିଲେ। ଏହାପରେ ବିଜୟ ଗୋଏଲ ଏକ ଟ୍ୱିଟ୍ କରି ଏହି ଦିପାବଳୀରେ ରାମ ମନ୍ଦିର ନାମରେ ଗୋଟିଏ ଦୀପ ଜାଳିବାକୁ ନିବେଦନ କରିଥିଲେ।
ଅଭିଯାନ ଆରମ୍ଭ ହୋଇଯାଇଛି ଓ ଏହି ଅଭିଯାନରେ ସାମିଲ ସମସ୍ତ ଲୋକଙ୍କୁ ଧନ୍ୟବାଦ ଜ୍ଞାପନ କରୁଛି ବୋଲି ସେ ଆଉ ଏକ ଟ୍ୱିଟ୍ କରିଥିଲେ। ସେଥିରେ ସେ ଦୀପ ଜାଳୁଥିବାର ଏକ ଫୋଟୋ ପୋଷ୍ଟ କରିଥିଲେ। କେନ୍ଦ୍ର ମନ୍ତ୍ରୀଙ୍କ ଦ୍ୱାରା ଆରମ୍ଭ ହୋଇଥିବା ଏହି ଅଭିଯାନ ନଭେମ୍ବର ୭ ପର୍ଯ୍ୟନ୍ତ ଚାଲିବ।
ପ୍ରକାଶଯୋଗ୍ୟ ଯେ ଶନିବାର ରାଜସ୍ଥାନର ବିକାନେରଠାରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ‘ଏଥର ଦୀପ ଭଗବାନଙ୍କ ନାମରେ’ ଜଳାଇବାକୁ ଅନୁରୋଧ କରିଥିଲେ। ଏହାପରେ କେନ୍ଦ୍ର ମନ୍ତ୍ରୀଙ୍କ ଦ୍ୱାରା ଏହି ଅଭିଯାନର ଶୁଭାରମ୍ଭ କରାଯାଇଛି।
