ଚେନ୍ନଇ : ଆଇପିଏଲ୍ ଖେଳିବା ପାଇଁ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ)ରେ ପହଞ୍ଚିଛି ୩ ଥର ଏହି ଟାଇଟଲ ଜିତିଥିବା ଚେନ୍ନଇ ସୁପର କିଙ୍ଗ୍ସ। ଗତ ସ୍ୱାଧୀନତା ଦିବସରେ ଆନ୍ତର୍ଜାତିକ କ୍ରିକେଟ୍ରୁ ଅବସର ଘୋଷଣା କରିଥିବା ଅଧିନାୟକ ମହେନ୍ଦ୍ର ସିଂହ ଧୋନି ଏବଂ ସିଏସ୍କେର ସଫଳ ବ୍ୟାଟ୍ସମ୍ୟାନ୍ ସୁରେଶ ରୈନା ମଧ୍ୟ ୟୁଏଇ ଯାଇଛନ୍ତି। ଚେନ୍ନଇରୁ ଏକ ଚାର୍ଟର୍ଡ ବିମାନରେ ସିଏସ୍କେର ସମସ୍ତ ଖେଳାଳି, ସପୋର୍ଟ ଷ୍ଟାଫ୍ ଓ ଅଧିକାରୀମାନେ ୟୁଏଇ ଯାଇଛନ୍ତି।
ସିଏସ୍କେ ତା’ର ଟ୍ୱିଟର ପୃଷ୍ଠାରେ ଦଳର ପ୍ରମୁଖ ଖେଳାଳି ମହେନ୍ଦ୍ର ସିଂହ ଧୋନି, ରବୀନ୍ଦ୍ର ଜାଡ଼େଜା, ସୁରେଶ ରୈନା ଏବଂ ବୋଲିଂ ପରାମର୍ଶଦାତା ଲକ୍ଷ୍ମୀପତି ବାଲାଜୀ ବିମାନ ବନ୍ଦର ଅଭିମୁଖେ ଯିବା ପାଇଁ ବସ୍ରେ ଚଢ଼ିବା ପୂର୍ବରୁ ସେମାନଙ୍କ ଫଟୋ ଛାଡ଼ିଛି। ଅଗଷ୍ଟ ୧୫ରୁ ୨୦ ଦିନ ପର୍ଯ୍ୟନ୍ତ ଚିଦମ୍ବରମ୍ ଷ୍ଟାଡିୟମ୍ରେ ଚେନ୍ନଇ ସୁପର କିଙ୍ଗ୍ସର ଅଭ୍ୟାସ ଶିବିର ଚାଲିଥିଲା। ବ୍ୟକ୍ତିଗତ କାରଣରୁ ଏହି ଶିବିରରେ ଦୁଇ ସ୍ପିନର ରବୀନ୍ଦ୍ର ଜାଡ଼େଜା ଓ ହରଭଜନ ସିଂହ ଏବଂ ପେସ୍ ବୋଲର ସାର୍ଦ୍ଦୁଳ ଠାକୁର ଯୋଗ ଦେଇ ପାରିନଥିଲେ। ପିତାଙ୍କ ଅସୁସ୍ଥତା ଯୋଗୁଁ ଘରେ ରହି ଯାଇଥିବା ହରଭଜନ ୮/୧୦ ଦିନ ପରେ ୟୁଏଇରେ ପହଞ୍ଚିବେ ବୋଲି ଦଳ ସୂତ୍ରରୁ ପ୍ରକାଶ। ଚେନ୍ନଇ ଦଳରେ ଥିବା ଦକ୍ଷିଣ ଆଫ୍ରିକାର ଦୁଇ ଖେଳାଳି ଫାଫ୍ ଡୁ ପ୍ଲେସି ଓ ଲୁଙ୍ଗି ଏନ୍ଗିଡ଼ି ସେପ୍ଟେମ୍ବର ପ୍ରଥମ ସପ୍ତାହରେ ୟୁଏଇରେ ପହଞ୍ଚିବେ। ଏଣେ କ୍ୟାରିବିୟାନ୍ ପ୍ରିମିୟର ଲିଗ୍ (ସିପିଏଲ୍) ଖେଳୁଥିବା ଇମ୍ରାନ୍ ତାହିର, ଡ୍ୱେନ୍ ବ୍ରାଭୋ ଓ ମିଚେଲ ସାଣ୍ଟ୍ନର ଉକ୍ତ ଟୁର୍ଣ୍ଣାମେଣ୍ଟ ସରିବା ପରେ ୟୁଏଇ ଆସି ଚେନ୍ନଇ ଦଳ ସହ ଯୋଗଦେବେ। ସେପ୍ଟେମ୍ବର ୧୯ରୁ ୟୁଏଇର ୩ଟି ସହରରେ ଆଇପିଏଲ୍ ଖେଳାଯିବ।