ଭୁବନେଶ୍ଵର: ବଲାଙ୍ଗୀର ଜିଲା କଣ୍ଟାବାଞ୍ଜିଠାରେ ଗୁରୁବାର ଓବିସି ମହାସମ୍ମିଳନୀ ଅନୁଷ୍ଠିତ ହୋଇଯାଇଛି। ଏଥିରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କଡ଼ା ସମାଲୋଚନା କରିଛନ୍ତି। ସଭାରେ ଉଦବୋଧନ ଦେଇ ଧର୍ମେନ୍ଦ୍ର କହିଛନ୍ତି, ରାଜ୍ୟ ସରକାର ରାଜ୍ୟବାସୀଙ୍କ ବିକାଶ କଥା ଆଦୌ ଚିନ୍ତା କରୁନାହାନ୍ତି। ଯୁଆଡ଼େ ଯାଉଛନ୍ତି କେବଳ ଭାଷଣ ଦେଉଛନ୍ତି, ତାହା ପୁଣି ଦେଢ଼ ମିନିଟରେ ସୀମିତ ରହୁଛି। ମୁଖ୍ୟମନ୍ତ୍ରୀ କୁଆଡ଼େ ନିଜେ ଭାଷଣ ନ ଦେଇ ଭିଡିଓ ରେକର୍ଡିଂ ଶୁଣାଉଛନ୍ତି। ସମସ୍ତ ସଭାରେ ପଚାରୁଛନ୍ତି ‘ଆପଣମାନେ ଖୁସି ତ, ମୁଁ ବହୁତ ଖୁସି’। ୧୯ ବର୍ଷର ଶାସନ ପରେ ବି ଚାଷକୁ ପାଣିମୁନ୍ଦେ କିମ୍ବା ଘରକୁ ପାଣିବୁନ୍ଦେ ଦେଇପାରୁ ନାହାନ୍ତି। ଏଥଆରେ ପୁଣି ପଚାରୁଛନ୍ତି ଆପଣମାନେ ଖୁସି ତ? ରାଜ୍ୟରେ ବେକାରୀ ସମସ୍ୟା ବଢ଼ି ଚାଲିଛି। ରାଜ୍ୟବାସୀ ଏହାର ଉଚିତ ଜବାବ ଦେବେ। ଓଡ଼ିଶା ସରକାର କେନ୍ଦ୍ରର ଯୋଜନା ହଡ଼ପ କରିବା ସହ ଏମଜିଏନଆରଇଜିଏସରେ ଆସୁଥିବା ଟଙ୍କା ହରିଲୁଟ କରୁଛନ୍ତି ବୋଲି ଧର୍ମେନ୍ଦ୍ର କହିଛନ୍ତି।
ଏହି ଅବସରରେ ବିଜେପି ପକ୍ଷରୁ ଏକ ରୋଡ ଶୋ’ ଆୟୋଜନ କରାଯାଇଥିଲା। ଏଥିରେ କେନ୍ଦ୍ରମନ୍ତ୍ରୀ ରାମ କ୍ରିପାଲ ଯାଦବ, ବରିଷ୍ଠ ବିଜେପି ନେତା ତଥା ବିଧାୟକ କନକ ବର୍ଦ୍ଧନ ସିଂହ ଦେଓ ଏବଂ ଦଳର ବହୁ ବରିଷ୍ଠ ନେତା ଯୋଗ ଦେଇଥିଲେ।