ପୂର୍ବତନ ବିଧାୟକ ବୀର ସିପକାଙ୍କ ପରଲୋକ

ଧର୍ମଗଡ : ଧର୍ମଗଡର ପୂର୍ବତନ ବିଧାୟକ ବୀର ସିପକାଙ୍କ ମଙ୍ଗଳବାର ସନ୍ଧ୍ୟାରେ ତାଙ୍କ ପୈତୃକ ଗ୍ରାମ ଗୋଲାମୁଣ୍ଡାସ୍ଥିତ ନିଜ ବାସଭବନରେ ଦେହାନ୍ତ ହୋଇଯାଇଛି। ସେ ଦୀର୍ଘ ଦିନରୁ ଅସୁସ୍ଥ ଥିଲେ।  ଶ୍ରୀ ସିପକା ସରକାରୀ ଚାକିରିରୁ ହଠାତ ରାଜନିତୀକୁ ଆସି ୧୯୯୫ ମସିହାରେ ଧର୍ମଗଡ ସଂରକ୍ଷିତ ଆସନରେ ଜନତା ଦଳର ପ୍ରାର୍ଥୀ ହୋଇ ଭକ୍ତଚରଣ ଦାସଙ୍କୁ ହରାଇଥିଲେ। ପରେ ସେ ଲଗାତାର ୩ଥର ଜିତିଥିଲେ। ପରବର୍ତ୍ତି ସମୟରେ ୨୦୦୦ରେ ବିଜୁ ଜନତା ଦଳ ଓ ୨୦୦୪ରେ ପୁଣି ଥରେ ବିଜୁ ଜନତା ଦଳର ପ୍ରାର୍ଥି ହୋଇ ୨୦୦୯ପର୍ଯ୍ୟନ୍ତ ବିଧାୟକ ଥିଲେ। ୨୦୦୯ରେ ସୀମା ନିର୍ଦ୍ଧାରଣ ପରେ ଜୁନାଗଡରେ ବିଜୁ ଜନତା ଦଳର ପ୍ରାର୍ଥି ହୋଇ ପରାଜିତ ହେବା ପରେ ତାଙ୍କ ରାଜନୈତିକ ଜୀବନରେ ଏକପ୍ରକାର ପୂର୍ଣ୍ଣଚ୍ଛେଦ ପଡିଥିଲା। ସେବେଠାରୁ ଆଉ ତାଙ୍କୁ କୌଣସି ସଭାସମିତିରେ ଦେଖିବାକୁ ମିଳୁନଥିଲା। ଶ୍ରୀ ସିପକା ଶିକ୍ଷାର ଉନ୍ନତି ପ୍ରତି ବିଶେଷ ଧ୍ୟାନ ଦେଇଥିଲେ। ତାଙ୍କ ପ୍ରଚେଷ୍ଟାରେ ଗୋଲାମୁଣ୍ଡାରେ +୨ ଓ +୩ କଲେଜ ସ୍ଥାପନ ହୋଇଥିଲା। ହଳଦି ଛକରେ ବିଜୁ ପଟ୍ଟନାୟକ ଇଂଜିନିୟରିଂ କଲେଜ, ଆମ୍ବେଦକର ଲ’କଲେଜ, ବିଜୟାନନ୍ଦ ପବ୍ଳିକ ସ୍କୁଲ, ସମେତ ଅନେକ ଶିକ୍ଷାନଷ୍ଠାନ ତାଙ୍କ ପ୍ରଚେଷ୍ଟାରେ ଗଢ଼ି ଉଠିଥିଲା। ଧର୍ମଗଡ ଡାକ୍ତରଖାନାରେ ରକ୍ତ ଭଣ୍ଡାର, ଅଧିଷ୍ଠାତ୍ରୀ ଦେବୀ ମାଁ ଭଣ୍ଡାରଘରଣୀଙ୍କ ପୀଠ ନବୀକରଣ, ଶିଶୁ ପ୍ରମୋଦ ଉଦ୍ୟାନ, ଧର୍ମଗଡ ଟାଉନ ହଲ ନିର୍ମାଣରେ ତାଙ୍କର ପ୍ରମୂଖ ଭୂମିକା ଥିଲା। ତାଙ୍କ ବିୟୋଗରେ ଅଞ୍ଚଳରେ ଶୋକର ଛାୟା ଖେଳି ଯାଇଥିବା ବେଳେ ତାଙ୍କ ମୃତ୍ୟୁରେ ମନ୍ତ୍ରୀ ଦିବ୍ୟ ଶଙ୍କର ମିଶ୍ର, ପୂର୍ବତନ କେନ୍ଦ୍ର ମନ୍ତ୍ରୀ ଭକ୍ତ ଚରଣ ଦାସ, ଦିନେଶ ରାଉତ, ତୁଳେଶ୍ୱର ନାଏକ, ଦଇତାରି ରାଉତ, ଦୟାସଗର ଚଲାନ, ଉପଖଣ୍ଡ ବ୍ୟବସାୟୀ ସଂଘ ସଭାପତି ବିଦ୍ୟାଧର ସାହୁ, ସମାଜସେବୀ ହୃଷିକେଶ ମିଶ୍ର, ଆଇନଜିବୀ ଦିଗାମ୍ବର ଦୂରିଆ, ଆଶୁତୋଷ ରାଉତ ପ୍ରମୂଖ ଶୋକ ବ୍ୟକ୍ତ କରିଛନ୍ତି।

Comments are closed.