ସେଲଫି ହେଲା କାଳ : ଝରଣାର ଜଳକୁଣ୍ଡରେ ବୁଡି ପ୍ରାଣ ହରାଇଲେ ଡାକ୍ତରୀ ଛାତ୍ର !

ଦେବଗଡ : ସେଲଫି ନେବା ବେଳେ ଝରଣାର ଜଳକୁଣ୍ଡରେ ବୁଡି ପ୍ରାଣ ହରାଇଲେ ଡାକ୍ତରୀ ଛାତ୍ର। ଏଭଳି ଏକ ଅଭାବନୀୟ ଘଟଣା ଘଟିଛି ଦେବଗଡ ଜିଲା ସଦର ମହକୁମା ସ୍ଥିତ ପ୍ରଧାନପାଟ ଜଳ ପ୍ରପାତର ଏକ ନମ୍ବର ଜଳକୁଣ୍ଡରେ।

ମିଳିଥିବା ସୂଚନା ଅନୁଯାୟୀ, ଏଲ୍ଲାହାବାଦରେ ଡାକ୍ତରୀ ପାଠ ପଢୁଥିବା ଦେବଗଡର ଜଣାଶୁଣା ବ୍ୟବସାୟୀ ସ୍ୱର୍ଗତଃ କ୍ରିଷ୍ନା ପ୍ରସାଦଙ୍କ ପୁଅ ଶୁଭମ ପ୍ରସାଦ(୨)ଗତକାଲି ସକାଳେ ପ୍ରାତଃ ଭ୍ରମଣ ନିମନ୍ତେ ପ୍ରଧାନପାଟ ଜଳପ୍ରପାତର ଉପର ମୁଣ୍ଡରେ ପାହାଡ ଉପରେ ଥିବା ଜଳକୁଣ୍ଡ(୧ ନମ୍ବର)କୁ ଯାଇଥିଲେ। ସେଠାରେ ଉକ୍ତ ଜଳକୁଣ୍ଡ କଡରେ ଠିଆହୋଇ ସେଲଫି ନେବାସହ ତାଙ୍କର ଜଣେ ବନ୍ଧୁଙ୍କ ସହ ଭିଡିଓ କଲିଂ କରି ଏହି ଦୃଶ୍ୟ ଦେଖାଉଥିବା ସମୟରେ ତାଙ୍କର ଗୋଡ ଖସିଯିବାରୁ ସେ ଜଳ କୁଣ୍ଡରେ ପଡିଯିବା ସହ ପାଣିରେ ବୁଡି ମୃତ୍ୟୁ ବରଣ କରିଥିଲେ। ତାଙ୍କ ପରିବାର ଲୋକେ ଗତକାଲି ସକାଳୁ ଶୁଭମଙ୍କୁ ବହୁ ଖୋଜାଖୋଜି କରି ନପାଇବାରୁ ବିବ୍ରତ ହୋଇପଡିଥିଲେ। ତେବେ ଶୁଭମ ଗତକାଲି ତାଙ୍କର ଜଣେ ବନ୍ଧୁଙ୍କୁ ଭିଡିଓ କଲିଂ କରିଥିବା ଏବଂ ମୋବାଇଲଟି ହଠାତ ସୁଇଚ ଅଫ୍‍ ହୋଇଯାଇଥିବା ଉକ୍ତ ଦୃଶ୍ୟ ପ୍ରଧାନପାଟ ଜଳ ପ୍ରପାତର ଉପର ମୁଣ୍ଡରେ ଥିବା ପ୍ରଥମ ଜଳକୁଣ୍ଡର ହୋଇଥିବା ଜାଣିବାପରେ ପରିବାର ଲୋକେ ଆଜି ସେଠାକୁ ଯାଇ ଖୋଜିବା ସମୟରେ ଶୁଭମଙ୍କର ମୃତଦେହ ଜଳକୁଣ୍ଡର ପାଣିରେ ଭାସୁଥିବା ଦେଖିବାକୁ ପାଇଥିଲେ। ଏ ସମ୍ପର୍କରେ ସେମାନେ ଦେବଗଡ ଥାନା ପୁଲିସକୁ ସୂଚନା ଦେବାସହ ଦମକଳ ବାହିନୀ ସହାୟତାରେ ଜଳକୁଣ୍ଡରୁ ଶୁଭମଙ୍କ ମୃତଦେହ ଉଦ୍ଧାର କରିଥିବା ଜଣାପଡିଛି। ପ୍ରାରମ୍ଭିକ ପର୍ଯ୍ୟାୟରେ ମୃତ୍ୟୁର କାରଣ ସ୍ପଷ୍ଟ ହୋଇନଥିଲେ ହେଁ ଶୁଭମଙ୍କର ବନ୍ଧୁଙ୍କ କଥାରୁ ସେ ସେଲଫି ନେଉଥିବା ବେଳେ ପାଣିରେ ବୁଡି ଜୀବନ ହରାଇଥିବା ଅନୁମାନ କରାଯାଉଛି।

Comments
Loading...