ଦିଲ୍ଲୀ ହିଂସା : ପରିସ୍ଥିତିକୁ ସୁଧାରିବା ପାଇଁ ସେନା ମୁତୟନ କରିବାକୁ ସ୍ବରାଷ୍ଟ୍ର ମନ୍ତ୍ରୀଙ୍କୁ କେଜରିୱାଲଙ୍କ ଅନୁରୋଧ

ନୂଆଦିଲ୍ଲୀ : ଦେଶର ରାଜଧାନୀ ଦିଲ୍ଲୀରେ ଭୟଙ୍କର ରୂପ ନେଇଥିବା ନାଗରିକତା ସଂଶୋଧନ ଆଇନ(ସିଏଏ)କୁ ନେଇ ଚାଲିଥିବା ହିଂସାରେ ପରିସ୍ଥିତିରେ ସାମାନ୍ୟ ପରିବର୍ତ୍ତନ ଆସିଛି କିନ୍ତୁ କେତେକ ସ୍ଥାନରେ ସିଏଏ ସପକ୍ଷ ଓ ବିପକ୍ଷବାଦୀଙ୍କ ମଧ୍ୟରେ ସଂଘର୍ଷର ଘଟଣା ମଧ୍ୟ ସାମ୍ନାକୁ ଆସୁଛି। ଏହି ହିଂସାରେ ମୃତ୍ୟୁ ସଂଖ୍ୟା ୨୦ ରେ ପହଞ୍ଚିଛିଥିବା ବେଳେ ୧୮୯ ରୁ ଅଧିକ ଲୋକ ଆହତ ହୋଇଥିବା ଜଣାଯାଇଛି ।

ଦେଶର ରାଜଧାନୀରେ ଏପରି ପରିସ୍ଥିତିକୁ ଚିନ୍ତାଜନକ ହୋଇଥିବା ଦର୍ଶାଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ସେନା ମୁତୟନ ପାଇଁ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଚିଠି ମାଧ୍ୟମରେ ଅନୁରୋଧ କରିଛନ୍ତି। ସ୍ଥିତି ନିୟନ୍ତ୍ରଣ ପାଇଁ ଦିଲ୍ଲୀ ପୁଲିସ୍ ଓ ଅର୍ଦ୍ଧସାମରିକ ବାହିନୀ ମୁତୟନ ହୋଇଛନ୍ତି। ତଥାପି ଦିଲ୍ଲୀରେ ହିଂସା କମୁନାହିଁ। ଏଭଳି ସାଂଘାତିକ ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ସେନା ଯବାନଙ୍କୁ ଦିଲ୍ଲୀକୁ ଅଣାଯିବା ଦରକାର ବୋଲି କେଜ୍ରିୱାଲ କହିଛନ୍ତି।

ଦିଲ୍ଲୀରେ ସୃଷ୍ଟି ହୋଇଥିବା ଦଙ୍ଗା ପରିସ୍ଥିତି ଏବେ ଅସମ୍ଭାଳ ସ୍ଥିତିରେ ପହଞ୍ଚି ଯାଇଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କହିଛନ୍ତି। ଉଚ୍ଚ ପଦସ୍ଥ ଅଧିକାରୀଙ୍କ ସହ ଘନଘନ ବୈଠକ କରୁଥିବା କେଜରିୱାଲ ପୂରା ସ୍ଥିତି ଉପରେ ନଜର ରଖିଛନ୍ତି। କେଜରିୱାଲ ଟ୍ୱିଟ କରି କହିଛନ୍ତି ଯେ “ରାତି ତମାମ ମୁଁ ଅନେକ ଲୋକ ଓ ଅଧିକାରୀଙ୍କ ଯୋଗାଯୋଗରେ ରହିଛି। ପରିସ୍ଥିତି ସାଂଘାତିକ ରହିଛି। ପୁଲିସ୍ ସ୍ଥିତିକୁ ନିୟନ୍ତ୍ରଣ ପାଇଁ ଯଥା ସମ୍ଭବ ଚେଷ୍ଟା କରୁଥିଲେ ହେଁ ଏଥିରେ ସଫଳତା ପାଇ ପାରିନାହିଁ। ତେଣୁ ତୁରନ୍ତ ଦିଲ୍ଲୀରେ ସେନା ମୁତୟନ କରାଯିବା ଦରକାର। ସେହିପରି ପ୍ରଭାବିତ ଅଞ୍ଚଳରେ କର୍ଫ୍ୟୁ ଲାଗୁ କରାଯାଉ।

ଗତକାଲି ସ୍ଥିତିକୁ ଦେଖି ସେନା ମୁତୟନ କରାଯିବ ବୋଲି ଖବର ପ୍ରକାଶ ପାଇଥିଲା। ତେବେ ସ୍ୱରାଷ୍ଟ୍ର ମନ୍ତ୍ରଣାଳୟ ଏହାକୁ ଖଣ୍ଡନ କରିଥିଲା। ସ୍ଥିତି ନିୟନ୍ତ୍ରଣ ପାଇଁ ବ୍ୟାପକ ସଂଖ୍ୟକ ପୁଲିସ୍ ଓ ଅର୍ଦ୍ଧସାମରିକ ବାହିନୀ ଦିଲ୍ଲୀରେ ଅଛନ୍ତି ବୋଲି ମନ୍ତ୍ରଣାଳୟ କହିଥିଲା। ହେଲେ ଏବେ କେଜରିୱାଲ ସେନା ମୁତୟନ ପାଇଁ ଦାବି କରିଛନ୍ତି।

Comments
Loading...