ଚାଲାଣ କାଟିଲେ ଆତ୍ମହତ୍ୟା କରିବି; ଯୁବତୀଙ୍କ ଧମକ ପରେ ଛାଡି ଦେଲା ପୁଲିସ

0

ନୂଆଦିଲ୍ଲୀ : ସଂଶୋଧିତ ମୋଟର ଯାନ ନିୟମ ଲାଗୁ ହେବା ପରେ ଲୋକଙ୍କ ମଧ୍ୟରେ ଏକ ପ୍ରକାର ଆତଙ୍କ ସୃଷ୍ଟି ହୋଇଛି । ଟ୍ରାଫିକ୍ ନିୟମ ଉଲ୍ଲଂଘନକାରୀ ପୁଲିସ କବଳରୁ ଖସିବା ପାଇଁ ନୂଆ ନୂଆ ପନ୍ଥା ଅପଣାଉଛନ୍ତି । କିଛି ଦିନ ପୂର୍ବରୁ ଟ୍ରାଫିକ୍ ନିୟମ ଉଲ୍ଲଂଘନ ଅଭିଯୋଗରେ ପୁଲିସ ଚାଲାଣ କାଟିବାରୁ ଜଣେ ଯୁବକ ନିଜ ବାଇକରେ ନିଆଁ ଲଗାଇ ଦେଇଥିଲେ । ଏବେ ଜଣେ ଯୁବତୀ ଜୋରିମାନାରୁ ବଞ୍ଚିବା ପାଇଁ ଏକ ଅଭିନବ ଉପାୟ ଆପଣାଇଛନ୍ତି । ଟ୍ରାଫିକରେ ଧରା ପଡିବା ପରେ ଆତ୍ମହତ୍ୟା ଧମକ ଦେବାରୁ ପୁଲିସ ତାଙ୍କୁ ଛାଡି ଦେଇଛି ।

ଦିଲ୍ଲୀ ଟ୍ରାଫିକ୍ ପୁଲିସର ଅନୁଯାୟୀ, କଶ୍ମୀରୀ ଗେଟ୍‌ ଆଇଏସବିଟି ବସ୍‌ ଷ୍ଟାଣ୍ଟ୍ ନିକଟରେ ଧଳା ରଙ୍ଗର ସ୍କୁଟି ଚଳାଉଥିବା ଜଣେ ଯୁବତୀଙ୍କୁ ଅଟକାଯାଇଥିଲା । ସ୍କୁଟିର ନମ୍ବର ପ୍ଲେଟ୍‌ ଭାଙ୍ଗିଯାଇଥିଲା, ନମ୍ବର ଭଲ ଭାବରେ ଦେଖାଯାଉ ନଥିଲା। ଯୁବତୀ ଜଣଙ୍କ ହେଲମେଟ୍‌ ପିନ୍ଧିଥିଲେ ସତ, ହେଲେ ହେଲମେଟର ବେଲ୍ଟ ନଥିଲା। ଏହା ସହ ଯୁବତୀ ଜଣଙ୍କ ଗାଡି ଚଳାଉଥିବା ବେଳେ ଫୋନ୍‌ରେ କଥା ହେଉଥିଲେ । ପୁଲିସ ତାଙ୍କୁ ଅଟକାଇଲା ପରେ ସେ ପୁଲିସ ସହ ଯୁକ୍ତିତର୍କ କରିଥିଲେ । ଯୁବତୀ ଜଣଙ୍କ ସେଠାରୁ ଖସି ପଳାଇାବକୁ ଉଦ୍ୟମ କରୁବା ବେଳେ ପୁଲିସ ସ୍କୁଟି ଚାବି ତାଙ୍କଠାରୁ ନେଇଯାଇଥିଲେ । ଏଥିରେ ଯୁବତୀ ଜଣଙ୍କ ଉତକ୍ଷିପ୍ତ ହୋଇ ହେଲମେଟକୁ ରାସ୍ତାରେ କଚାଡି ଦେଇଥିଲେ ।

ଯୁବତୀଙ୍କ କହିବା ହେଲା ଗୋଟିଏ ଦିନ ପୂର୍ବରୁ କେହି ଦୁର୍ବୃତ୍ତ ତାଙ୍କ ନମ୍ବର ପ୍ଲେଟକୁ ଭାଙ୍ଗି ଦେଇଥିଲା। ଏହା ସହ ସେ ଫୋନ୍‌ରେ କଥା ହେଉନଥିଲେ ବରଂ ଇୟର ଫୋନ୍‌ ଦେଇ ଗୀତ ଶୁଣୁଥିଲେ ବୋଲି ସଫେଇ ଦେଇଥିଲେ । ଏହା ପରେ ଯୁବତୀ ଜଣଙ୍କ କାନ୍ଦିବାକୁ ଲାଗିଥିଲେ । ଏହି ସମୟ ମଧ୍ୟରେ ଯୁବତୀ ନିଜ ମା’ଙ୍କୁ ଫୋନ୍ କରି କଥା ହୋଇଥିଲେ । ଏହା ପରେ ଆଗକୁ ଏପରି ନକରିବା ପାଇଁ ଚେତାବନୀ ଦେଇ ପୁଲିସ ତାଙ୍କୁ ଛାଡି ଦେଇଥିଲେ । ଯୁବତୀଙ୍କ ଏହି ଅଜବ କାର୍ଯ୍ୟକଳାପର ଭିଡିଓ ପୁଲିସ ଅଧିକାରୀଙ୍କ କ୍ୟାମେରାରେ ରେକର୍ଡ ହୋଇଥିଲା। ଯାହା ସୋସିଆଲ ମିଡିଆରେ ଭାଇରାଲ ହୋଇଛି ।

Leave A Reply