ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀଙ୍କ ସ୍ବାସ୍ଥ୍ୟାବସ୍ଥା ଗୁରୁତର, କରୋନା ସାଙ୍ଗକୁ ନିମୋନିଆରେ ଆକ୍ରାନ୍ତ

ନୂଆଦିଲ୍ଲୀ: କରୋନା ଭୂତାଣୁରେ ସଂକ୍ରମିତ ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇପଡ଼ିଛି। ସେ ଏବେ ଦିଲ୍ଲୀର ରାଜୀବ ଗାନ୍ଧୀ ସୁପର ସ୍ପେଶାଲିଟି ହସ୍ପିଟାଲରେ ଚିକିତ୍ସିତ ହେଉଛନ୍ତି। ସତ୍ୟେନ୍ଦ୍ର ନିଃଶ୍ଵାସପ୍ରଶ୍ଵାସ ନେବାରେ ପୂର୍ବାପେକ୍ଷା ଅଧିକ କଷ୍ଟ ଅନୁଭବ କରୁଥିବା ଡାକ୍ତର କହିଛନ୍ତି। କରୋନା ଭୂତାଣୁ ତାଙ୍କ ଫୁସ୍‌ଫୁସ୍‌କୁ ସଂକ୍ରମଣ କରିସାରିଥିବାବେଳେ ସେ ଏବେ ନିମୋନିଆରେ ବି ଆକ୍ରାନ୍ତ ହୋଇଛନ୍ତି। ଡାକ୍ତରୀ ଟିମ୍‌ ତାଙ୍କ ସ୍ବାସ୍ଥ୍ୟାବସ୍ଥା ଉପରେ ନଜର ରଖିଛନ୍ତି। ଆବଶ୍ୟକ ପଡ଼ିଲେ ତାଙ୍କୁ ଉନ୍ନତ ଚିକିତ୍ସା ପାଇଁ ଅନ୍ୟ ହସ୍ପିଟାଲକୁ ସ୍ଥାନାନ୍ତର କରାଯାଇପାରେ ବୋଲି ଡାକ୍ତରୀ ଟିମ୍‌ କହିଛନ୍ତି।

ସୂଚନାଯୋଗ୍ୟ, ଦିଲ୍ଲୀରେ କରୋନା ଭୂତାଣୁ ଭୟଙ୍କର ରୂପ ଧାରଣ କରିଥିବାବେଳେ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ ନିୟମିତ ଭାବେ ବିଭିନ୍ନ କୋଭିଡ ହସ୍ପିଟାଲ ଗସ୍ତ କରି ସ୍ଥିତି ନିରୀକ୍ଷଣ କରୁଥିଲେ। ଏହି ସମୟ ମଧ୍ୟରେ ସେ ସଂକ୍ରମିତ ହୋଇଥିବା ଅନୁମାନ କରାଯାଉଛି। ଗତ ଶୁକ୍ରବାର ତାଙ୍କୁ ପ୍ରବଳ ଜ୍ଵର ହେବା ସହିତ କରୋନା ଲକ୍ଷଣ ଦେଖା ଦେବା ପରେ ପରୀକ୍ଷା କରାଯାଇଥିଲା। କିନ୍ତୁ ପ୍ରଥମ ପରୀକ୍ଷା ରିପୋର୍ଟ ନେଗେଟିଭ ଆସିଥିଲା। ମାତ୍ର ଜ୍ଵର ବଢ଼ିବାରୁ ପୁଣି ଥରେ ପରୀକ୍ଷା କରାଯାଇଥିଲା। ୨ୟ ରିପୋର୍ଟ କରୋନା ପଜିଟିଭ୍‌ ବାହାରିଥିଲା। ଏହା ପରେ ତାଙ୍କୁ ଗତ ରବିବାର ହସ୍ପିଟାଲରେ ଭର୍ତ୍ତି କରାଯାଇଥିଲା।

Comments
Loading...